Ku bokona mu madisá

Ku bokona mu madisá

KIBATULU MOXI

Kiebhi o Kidi Kia Lungu ni Nzambi?

Kiebhi o Kidi Kia Lungu ni Nzambi?

O kuila Nzambi ua ku zolo?

Nzambi nanhi? Muéne uala ni dijina?

O kuila tu tena ku zukama kua Nzambi?

UA MONO kiá kiebhi o tuana a uabhela kuibhula? Avulu, a mateka kuibhula kioso kia di longa zuela. Ni mesu a jikuka, ene a ku tala ni ebhula ima kála: Mukonda diahi diulu dia zulu? Kiebhi kia bhange o jithéthembua? Nanhi ua longo o jinjila kuimba? Eie nange u fikisa ku tambuijila, maji um ithangana ia mukuá ki bhonza. Né muene ki u tambuijila kiambote, u kuibhula dingi: Mukonda diahi?

2 Ki ana-ndenge ngó ebhula. Kioso ki tu kula, tu suluka mu ku bhanga ué ibhuidisu. Tu bhanga kiki phala ku sanga o ukexilu uetu, phala tu di longe o iluezu i tua tokala ku lenga, mba kuijiia o ima ia mukuá. Maji athu avulu eha o ku bhanga ibhuidisu, bhenge-bhenge o ibhuidisu ia beta-kota. Mu kusukáko, ene ka-ndala dingi ku sota o itambuijilu.

Mona-ndenge u bhanga ibhuidisu

3 Xinganeka mu ibhuidisu kiala ku thandu dia divulu didi, mba mu ibhuidisu iala ku dimatekenu dia kibatulu kiki. Íii o ibhuidisu ia beta-kota i ua tokala ku bhanga. Maji saí athu a lembua ku sota o itambuijilu. Mukonda diahi? O kuila o Bibidia itambuijila? A mukuá a banza kuila o itambuijilu ia bhonzo ku i tendela. A mukuá a kala ni hele kuma o ku ibhuidisa ku kuatesa jisonhi. A mukuá ehela atuameni a jingeleja ni ji mesene, phala a a lombuelela o ibhuidisu iâ. Abha eie?

4 Tuejiia kuma, eie ua mesena kuijiia o itambuijilu ia beta-kota ku muenhu. Sé phata, eie ua dibhuile kiá: ‘Mukonda diahi tuala ku muenhu? O muenhu iú uene ngó? Mu kidi, Nzambi nanhi?’ Kia uabha kuibhuidisa kienhiki, kana kueha kuibhula, katé ki u sanga o itambuijilu ia kidi. O mesene ia fuma, Jezú Kristu uambe: ‘Bhinga, a-nda ku bhana; sota, ua-nda sanga; phupa, a-nda ku jikuila.’ -Matesu 7:7.

5 Se u “sota o itambuijilu ia ibhuidisu ia beta-kota, ua-nda tambula mabesá avulu. (Jisabhu 2:1-5) Nange a mukuá a kuambela kia kima, maji kuala itambuijilu, eie u tena ku i sanga-mu Bibidia. O itambuijilu ki ia bhonzo ku i tendela. Iene, i ku bhana kidielelu ni kisangusangu. Iene, i tena ku ku kuatekesa ku kala ni muenhu ua sanguluka lelu. Phala ku mateka, ndoko tu di longe o kibhuidisu kiene mu thandanganhesa athu avulu.

O KUILA NZAMBI KA TU SUU?

6 Saí athu a banza kuma o kitambuijilu kia kibhuidisu kiki, kidi muene. Ene amba, ‘se Nzambi ua tu zolele’ ‘o mundu ki ueji kala kididi kia uabha?’ kioso ki tu tala mu kaxaxi ketu, tu mona o mundu uezala ni ita, ni ku di zemba, ni hadi. Etu’oso tuene mu kata, tu bhita ni jiphaxi, tu funda athu u tua zolo. Kienhiki, saí athu ebhuidisa, ‘se Nzambi ua tu zolele, muéne keji fidisa, o ima íii ku bhita ni etu?’

7 O jimesene ja jingeleja uê a bhangesa athu ku banza kuma Nzambi kale ni henda. Kiebhi-phe? Kioso ki bhita o ibhidi, ene a zuela kuma, o vondadi ia Nzambi. Mu kidi o jimesene jiji a tatela Nzambi mu ima ioso ia iibha iene mu bhita. O kuila, kiki kiene o kidi kia lungu ni Nzambi? Mu kidi ihi i longa o Bibidia? O divulu dia Tiiaku 1:13 di tambuijila: “o muthu kia dianguka mu ithangana ia malamba ienhi’íi, k’ele, uixi: Nzambi muène ua ngi diangula. Mukonda Nzambi kene ku mu diangula ku kima kiaiibha kioso-kioso, o muéne ué kene mu diangula muthu.” Kienhiki, Nzambi ki muéne uene mu bheka o ima ia iibha i bhita ku mundu. (Jobe 34:10-12) Mu kidi, muéne uehela o ima ia iibha ku bhita. Maji ki kiene kimoxi kuehela kima ku bhita, ni ku ki bheka.

8 Mu kifika, xinganeka o tata mukuá unjimu, mukuá henda, uala ni mona ua kulu kiá, uala hanji kubhata. Se o mona iú u bhukumuka, ni u sola ku thunda kubhata, o tat’ê ka mu fidisa ku thunda. O mona u sola o njila ia iibha, ni u di ta mu ibhidi. O kuila o tat’ê muéne ua mu bhekela o ibhidi? Kana. (Luka 15:11-13) Kiene kimoxi ué, Nzambi ka fidisa athu ku kaiela o njila iâ ia iibha iene mu sola, ki muéne uene mu kua bhekela o ibhidi. Mukonda dia kiki, ki tua tokala ku tatela Nzambi mukonda dia ibhidi ioso ia athu.

9 Nzambi ua lungu mu kuehela, athu ku sola o njila iâ, ia iibha. Mukonda o Mubhangi uetu mukuá unjimu, ni muteni-a-ioso, ki bhuala muthu u mu jijidika ku tu jimbulula se mukonda diahi. Maji mu henda iê, Nzambi ua tu jimbulula. Eie ua-nda di longa dingi ia lungu ni maka enhá, mu kibatulu 11. Maji tua tokala ku xikina kuma Nzambi ki mukuá ki kuma kia maka u tu bhita nau. Muéne u tu bhana o kidielelu kia ku batula o maka!—Izaia 33:2.

10 Nzambi muthu ukôla (Izaia 6:3) Kiki kilombolola kuma, muéne muthu ua iuka iu ua zela. Ki bhuale kima kia iibha ko kuê. Tu tena ku mu dielela ni kidi kioso. Ki kiene kimoxi ni athu a kambe o kuiuka, a bhukumuka. Katé muene, saí jinguvulu ja mbote kene mu tena ku zubha o ima ia iibha iene mu bhanga athu a bhukumuka. Maji Nzambi o muteni-a-ioso. Muéne u tena, iu ua-nda zubha o kuiibha kuoso, kuene mu talesa hadi ku athu. Kioso Nzambi kia-nda ki bhanga, muéne ua-nda zubha o kuiibha kuoso katé ku hádia!—Jisálamu 37:9-11.

KIEBHI KI MONA NZAMBI O JIPHAXI JI TU BHITA NA-JU?

11 Kiebhi Nzambi kia mona ioso i bhita ku mundu ni ku muenhu uetu? O Bibidia i longa kuma Nzambi kia “mu uabhela o ku batula mu kidi.” (Jisálamu 37:28) Kienhiki, muéne u mona o ima ia iuka ni ia iibha. Muéne ua zembe o ku iibha kuoso. Bibidia izuela kuma Nzambi “kia mu bhekela lamba ku muxima uê” kioso m’ukulu o kuiibha kuezalele mu ngongo. (Dimatekenu 6:5, 6) Nzambi ka lunguluka (Malakiia 3:6) Muéne ua zembe hanji ku mona o jiphaxi mu ngongo. Nzambi ua zembe uê ku mona athu ku tala o hadi. O Bibidia izuela, “Muène ua mi kuatela muanhu.”—1 Phetele 5:7.

12 Kiebhi ki tu tena kuxikina kuila Nzambi ua zembe o hadi? Ndoko tu tale polova ia mukuá. O Bibidia i longa kuma o muthu a mu bhange ni kidifuanganu kia Nzambi. (Dimatekenu 1:26) Etu tuala ni ídifua iambote mukonda Nzambi uala na-iu. Mu kifika, o kuila eie u kala ni dilamba kioso ki u mona athu a mu tala o hadi? Se ima ia iibha ia ku iibhila, ijiia na-kiu kuma Nzambi ia beta ku mu iibhila.

13 Kima kimoxi kia beta-kota ku athu, o ku tena ku zola. Kiene ué kia kala Nzambi. O Bibidia i longa kuma “ Nzambi henda.” (1 Nzuá 4:8) Etu tu zola mukonda Nzambi ua tu zolo. O kuila o henda ieji ku bhangesa ku bhuisa o hadi ni ku iibha kuoso mu ngongo? Se eie ua tenene ku bhanga kiki, ueji ki bhanga? Mu kidi ueji ki bhanga! Xikina kuila Nzambi ua-nda zubha o jiphaxi ni ku kamba o kuiuka. O ikanenu ia tange mu dimatekenu dia divulu didi, ki nzoji kana. O ikanenu ia Nzambi ia-nda dikumbidila ni kidi kioso! Phala ku xikina mu ikanenu íii, eie ua tokala kuijiia dingi ia lungu ni Nzambi ua kanena o ima íii.

NZAMBI UA MESENA KUILA EIE U MUIJIIE

14 Se ua mesenene kuila o muthu o kuijiia, ihi ueji bhanga? Kueji mu tangela o dijina diê? O kuila Nzambi uala ni dijina? O jingeleja amba kuila o dijina diê “Nzambi” mba “Ngana” maji iá, ki majina a muthu. Ene, majina a ujitu, kála “sobha,” ni “mukulundu.” O Bibidia i longa kuma Nzambi uala ni majina a ujitu. “Nzambi” ni “Ngana” ene o majina a mukuá a ujitu. Kienhiki, o Bibidia i longa ué kuma Nzambi uala ni dijina diê muene: Jihova. O divulu dia Jisálamu 83:18 dizuela kuma: “Eie ngó uavu o dijina diê dia Jihova, ku moneka luiadi; eie-muène ngó Suke-ku mu ngongo ioso.” Se mu Bibidia iê ki mu moneka o dijina didi, ua tokala ku sota mu Kibandekesu, phala kuijiia se mukonda diahi ki di moneka-mu. Mu kidi o dijina dia Nzambi dimoneka ji midi ja veji mu isoneku iokulu ia Bibidia. Kienhiki, Jihova ua mesena kuila eie uijiia o dijina diê ni u di tumbule. Muéne ua tu bhana o Bibidia phala tu muijiie.

Muhatu ua mu tangela o dijina diê kua mukuá

Se ua mesena kuila muthu u kuijiia, ku mu tangelé o dijina diê? Nzambi u tu tangela o dijina diê mu Bibidia

15 Nzambi ua di luku o dijina diala ni ijimbuluilu avulu. Dijina diê Jihova, dijimbulula kuma, Nzambi u tena ku bhanga ioso ia mesena ni ku kumbidila ioso ia kanena.* O dijina dia Nzambi diene dimoxi-élele, ki dia difu. Dia tokala ngó kua muéne. Jihova muéne ngó u moxi-élele mu ukexilu uoso. Kiebhi-phe?

16 Tua mono kuma o divulu dia Jisálamu 83:18 dizuela ia lungu ni Jihova: “Eie-muène ngó Suke-ku.” Kienhiki Jihova ngó a mu ixana “o Mutene-a-Ioso.” O divulu dia Dijingunuinu 15:3 dizuela: “Eie Ngana [Jihova], Nzambi, Muteni-a-Ioso, o ikalakalu ié kukula kuahi, ikalakalu i diuanesa kinéne! Eie, Ngana [Jihova], u Sobha ia miji ioso, [inangenena, NW].” O dijina dia ujitu “ o Mutene-a-Ioso” di tu longa kuma Jihova ua beta-kota mu kutena. O kutena kuê ki kuale muthu uala na-ku; muéne u Suke-ku. O dijina dia ujitu ‘Sobha inangenena’ di tu lembalala kuma Jihova ka difu ni muthu uéngi. Muéne umoxi-élele tundé dia tundé. O divulu dia Jisálamu 90:2 dizuela: “tunde xahulu katé ku hádia, eie Nzambi u nangenena.” Kiki madiuanu, ki kiene?

17 O Jihova ué ka difu ni muthu, muéne ngó o Mubhangi. O divulu dia Dijingunuinu 4:11 dizuela: “Eie u Ngana ietu [Jihova], Nzambi ietu! Kia ku fuama o kutambula fuma, ni ujitu ni unéne. Mukonda é’Muéne ua bhanga ioso, o vondadi ié iene ia i bhangesa kuiza-ku, íi ia di bhange, íi iala-ku.” Ioso iu u tena kubanza—kála o ji-anju ku diulu, o jithéthembua ji bhenha mu usuku ku diulu ni ibundu i sabhuka ku mixi, o jimbeji jala mu kalunga ni mu jingiji—ioso iala ni muenhu, mukonda Jihova muéne o Mubhangi!

U TENA KU ZUKAMA KUA JIHOVA?

18 Ku tanga ia lungu ni ídifua ia Jihova, i bhangesa athu a kamúkua ku banza kuma kia bhonzo ku mu zukama. Ene a banza kuila Nzambi muthu uonene, kienhiki nuka a-nda tena ku zukama kua Nzambi. O kuila o ku banza kienhiki kiauabha? O Bibidia ki i longa kienhiki. Iene i zuela ia lungu ni Jihova: “Muéne kana muthu ua mu kala dikanga.” (Ikalakalu 17:27) O Bibidia ué i tu longesa: ‘Zukamenu kua Nzambi, muéne u mi zukama enu.’ -Tiiaku 4:8.

O Bibidia i longa kuma Jihova mukuá henda, o Mubhangi ua ngongo ioso

Ibhangelu ia Nzambi

19 Kiebhi ki u tena ku zukama kua Nzambi? Phala ku mateka, kolokota ku bhanga i ua mu bhanga kindala-ku di longa ia lungu ni Nzambi. Jezú uambe: “O muenhu ki uàbhua uenhú: kuila oso a kuijiie eie u Nzambi ia kidi umoxi-élele, ni kuijiia ue [Jezú] Kristu, ió ua mu tumu eie.” (Nzuá 17:3) Kiene, i Bibidia i longa kuma o ku di longa ia lungu ni Jihova ni Jezú, i tuendesa katé ku “muenhu ki uabhua”! kala kia ki tange kiá, “Nzambi henda” (1 Nzuá 4:16) Jihova uala ué ni ídifua ia mukuá ia iuka. Mu kifika, o Bibidia iambe kuma Jihova o “Nzambi ia jihenda ia [kidi], ua lunduka, u kolokota mu kuthathamana, ukôla mu kuatela henda, ufiiele u vula.” (Makatukilu 34:6 NW) Muéne muthu “uambote, u lenduka ku loloka.” (Jisálamu 86:5) Nzambi mukuá muanhu. (2 Phetele 3:9) Muéne mukuá ku iuka. (Dijingunuinu 15:4) Kioso ki u tanga mu Bibidia, ua-nda mona kiebhi Jihova kiene mu kuidikisa kuma muéne uala ni ídifua íii ni ia mukuá dingi ia uabha.

20 Mu kidi, ki tena ku mona Nzambi, mukonda muéne nzumbi. (Nzuá 1:18; 4:24; 1 Timote 1:17) O ku di longa ia lungu ni muéne mu Bibidia, ua-nda muijiia kala muthu. Kala kiambe o mukuá jisálamu, eie u tena ‘ku tala o ku uabha kua Jihova.’ (Jisálamu 27:4; Loma 1:20) Se u kolokota ku di longa ia lungu ni Jihova, ua-nda mona kuma muéne muthu ua kidi, ua-nda mesena ku mu zola ni ku mu zukama dingi.

Tata ni mon’ê

O henda ia tata ku mon’ê, idikisa o henda ia beta-kota ia Tat’etu ia diulu ko kuetu

21 Ua-nda kuijiia se mukonda diahi o Bibidia i tu longa ku mona Jihova kála Tat’etu. (Matesu 6:9) Muéne ka tu bhana ngó o muenhu, maji ua mesena ué kuma tu kala ni kisangusangu ku muenhu—kála ki mesena o tata phala an’ê. (Jisálamu 36:9) O Bibidia i longa ué kuma athu a tena ku kala makamba a Jihova. (Tiiaku 2:23) Xinganeka—eie u tena ku kala dikamba dia Mubhangi ua ngongo ioso!

22 Se u kolokota ku di longa o Bibidia, ua-nda mona kuila saí athu a-nda ku jijidika ku bhuila o ku di longa. Ene nange a kala ni hele kuma eie ua-nda xisa o kixikinu kiê kiokulu. Maji kana kuehela muthu u ku fidisa ku bhanga o ukamba ua beta-kota ku muenhu.

23 Mu kidi, o dimatekenu ua-nda sanga-mu ima ki ua-nda ku i tendela kiambote. Nange eie u kala ni jisonhi ja ku bhinga ki kuatekesu, maji kana kuehela kuma o jisonhi ji ku fidisa. Jezú uambe kuma, kima kiambote ku tululuka kála ana-ndenge. (Matesu 18:2-4) Kála ki tuejiia kiá, ana-ndenge ebhuidisa kiavulu. Nzambi ua mesena kuila eie u sanga o itambuijilu. O Bibidia iximana athu a mesenene ku di longa ia lungu ni Nzambi. Ene akexile mu bhitulula o mikanda-ikôla phala kuijiia se o ima ia kexile mu di longa, kiene o kidi.—Ikalakalu 17:11.

24 O ukexilu uambote phala kuijiia ia lungu ni Jihova, o ku di longa o Bibidia. Iene ki ia difu ni madivulu a mukuá. Mu ukexilu uahi? O kibatulu ku pholo kia-nda tanga o maka enhá.

IHI I LONGA O BIBIDIA

  • Nzambi ua tu zolo.—1 Phetele 5:7.
  • O dijina dia Nzambi, Jihova.—Jisálamu 83:18.
  • Jihova u ku ixana phala ku mu zukama.—Tiiaku 4:8.
  • Jihova mukuá henda, mukuá mbote, ni mukuá kuloloka.—Makatukilu 34:6; 1 Nzuá 4:8, 16.

*  Muala dingi ilombuelelu ia lungu ni dijimbuluilu, ni kiebhi kia zuela o dijina dia Nzambi, mu Kibandekesu.


Ibhuidisu

1, 2. Mukonda diahi kima kiambote kuibhuidisa?

3. Mukonda diahi athu a lembua ku sota o itambuijilu ia beta-kota ia maka iebhuidisa?

4, 5. Iebhi o ibhuidisu ia beta-kota ku muenhu, ni mukonda diahi tua tokala ku sota o itambuijilu?

6. Mukonda diahi athu avulu a banza kuila Nzambi ka suu kioso ki tu bhita ni jiphaxi?

7. Kiebhi o jimesene já jingeleja ji bhangesa athu avulu kubanza kuma Nzambi kala ni henda? Um kidi ihi i longa o Bibidia ia lungu ni jiphaxi ji tu bhita na-ju?

8, 9. Kiebhi ki tu tena kuidikisa o kuehela o hadi ku bhita, ni ku ibheka? Mukonda diahi ki kima kiambote ku tatela Nzambi mukonda dia kuehela o mundu ku kaiela o njila iâ ia iibha?

10. Mukonda tu tena ku kala ni kidielelu kuma Nzambi ua-nda zubha o ima ioso ia iibha?

11. Kiebhi Nzambi kia mona o kuiibha? Kiebhi kia mona Nzambi o jiphaxi jetu?

12, 13. Mukonda diahi tuala ni ídifua kála o henda, ni kiebhi o henda i tu kuatekesa ku mona ia um bhita ku mundu? Mukonda diahi tu tena kuxikina kuma Nzambi ua-nda zubha o jiphaxi joso um ngongo?

14. Diebhi o dijina dia Nzambi, ni mukonda diahi tua tokala ku di tumbula?

15. Ihi ijimbulula o dijina, Jihova?

16, 17. Ihi i tu longa o majina’á, a ujitu a lungu ni Jihova: “Muteni-a-Ioso”? ‘Sobha inangenena’? “Mubhangi”?

18. Mukonda diahi athu a banza kuila ene nuka a-nda zukama kua Nzambi, maji ihi i longa o Bibidia?

19. Kiebhi ki tu tena ku mateka ku zukama kua Nzambi, ni mabesá ahi tua-nda tambula? Ídifua iebhi ia Nzambi ia beta ku ku uabhela?

20-22. O kuila ku kamba ku mona Nzambi, ku tu fidisa ku um zukama? Jimbulula. Ihi nange athu ia-nda ku jijidika ku bhanga, maji ihi iu ua tokala ku bhanga?

23, 24. Mukonda diahi ua tokala ku kolokota um kuibhula ia lungu ni ima iu ua um di longa? O kibatulu ku pholo kia-nda tanga mak’ahi?