Ku bokona mu madisá

Ku bokona mu madisá

KIBATULU KUINHI NI NAKI

O Batizu ni Ukamba uê ni Nzambi

O Batizu ni Ukamba uê ni Nzambi

Kiebhi o Jikidistá kia bhanga o batizu?

Ihi i ua tokala ku bhanga phala ku ku batizala?

Kiebhi o muthu kia di bhakula kua Nzambi?

Mukonda diahi o muthu a tokala ku mu batizala?

‘TALESA, menha iá! Ihi i ngi fidisa o ku ngi batizala?’ O kibhuidisu kiki, a ki bhangele ku mukalakadi ua nguvulu, mukua Etiiopia, mu hâma ia dianga ia mivu. O Kidistá Filipe, ua mu idikisa kuma Jezú uexile o Mexiia a mu kanena. O maka enhá a di longo mu Mikanda ikôla, a tula kiambote ku muxima ua diiala mukua Etiiopia, iu ua banze ku bhanga kima. Muéne ua bhingi phala ku mu batizala!—Ikalakalu 8:26-36.

Disoladi mukua Etiiopia mu hama dianga

2 Se ua di longo kiambote, o ibatulu ia dianga ia divulu didi, ni Jimbangi ja Jihova, nange u dibhula, ‘Ihi i fidisa o ku ngi batizala?’ Eie ua di longo kiá o kikanenu kia Bibidia, kia lungu ni muenhu ua kalelaku mu Palaízu. (Luka 23:43; Dijingunuinu 21:3, 4) Eie ua di longo ué o kidi kia lungu ni ukexilu ua madifundu, ni difukunukinu. (Ndongixi 9:5; Nzuá 5:28, 29) Nange eie uene muia kiá mu iônge ia Jimbangi ja Jihova, ua mono kiá kuma ene ala ni ubhezelu ua kidi. (Nzuá 13:35) O kia beta-kota, eie ku mateka kiá o ukamba ué ni Jihova Nzambi.

3 Kiebhi ki u tena ku londekesa kuila ua mesena ku sidivila Nzambi? Jezú uambe ku akaiedi’ê: “Enu-phe ndenu, mua ka longe jixibulu ku akua jixi joso, ni ku a batizala.” (Matesu 28:19) Jezú ua bhana o phangu, mu ku mu batizala mu menha. Muéne ka mu takuile ngó tu menha, né ngó ku mu tá tu menha ku mutué. (Matesu 3:16) O kizuelu “batizu,” kizuelu kia Ngeleku, kilombolola “kubondeka.” Kiki, o batizu ia Kidistá, a ki bhanga, mu ku bondeka o muthu koxi a menha ni ku mu zangula.

4 O batizu mu menha, o kima kia bhingi phala oso a mesena ku kala ni ukamba ni Jihova Nzambi. O batizu ilondekesa ku athu oso, o vondadi iê ia ku sidivila Nzambi. Kilondekesa ué kuila eie ua-ndala ku bhanga o vondadi ia Jihova. (Jisálamu 40:7, 8) Phala ku ku batizala, saí ima i ua tokala ku bhanga.

KUA BHINGI KUIJIIA NI KIXIKINU

5 Eie ua mateka kiá ku bhanga o kima kia dianga. Kiebhi? O kuijiia Jihova Nzambi, ni Jezú Kristu, nange mu ku di longa o Bibidia izuua ioso. (Nzuá 17:3) Maji saí dingi ima i ua tokala ku di longa. O Jikidistá a-ndala ‘kuijiia kiambote o vondadi ia Nzambi.’ (Kolose 1:9) O kuia mu iônge ia Jimbangi ja Jihova, ia-nda ku kuatekesa ku bhanga kiki. (Jihebeleu 10:24, 25) O ku bhanga kiki izuua ioso, kua-nda ku kuatekesa ku bandekesa o kuijiia kuê kua lungu ni Nzambi.

O kuijiia o Maka a Nzambi kima kia beta-kota, phala ku ku batizala

A mu di longa Bibidia

6 Mu kidi, eie ki ua bhingi ku di longa ioso iala mu Bibidia, phala ku ku batizala. O mukalakadi ua nguvulu, mukua Etiiopia ua kexile ni kuijiia, maji ua mesenene dingi kikuatekesu phala ku tendela kiambote o ibatu ia mukuá, ia Mikanda Ikôla. (Ikalakalu 8:30, 31) Kiene kimoxi ué, eie uala hanji ni ima ia vulu phala ku di longa. Mu kidi, eie nuka ua-nda suka o ku di longa ia lungu ni Nzambi. (Ndongixi 3:11) Kienhiki, ande dia ku ku batizala, eie ua tokala kuijiia o ilongesu ia dianga ia Bibidia ni ku i xikina. (Jihebeleu 5:12) O ilongesu íii, o kidi kia lungu ni ukexilu ua madifundu, o valolo dia dijina dia Nzambi, ni Utuminu uê.

7 Ki kua bhingi ngó ku kala ni kuijiia, mukonda, “o muthu-phe ua kambe o kuxikana ka tena kuuabhela Nzambi.” (Jihebeleu 11:6) O Bibidia i tu tangela kuma, saí athu mu mbanza ia Kolindo, kioso kiévu o njimbu ia Kidistá, “a xikana, anga a a batizala.” (Ikalakalu 18:8) Kiene kimoxi ué, mu ku di longa o Bibidia, eie ua-nda kala ni kixikinu kuma, ene o Maka o bhuse kua Nzambi. A-nda ku kuatekesa ué, ku kala ni kixikinu mu ikanenu ia Nzambi, ni mu kutena kua ku bhulula mu sata ia Jezú.—Josuué 23:14; Ikalakalu 4:12; 2 Timote 3:16, 17.

KUZUELA O KIDI KIA BIBIDIA KU AKUENU

8 Ki uia ni ku di longa, ni ku dimendala o kixikinu kiê, ki ua-nda tena ku bhaka o ima i uene mu di longa. (Jelemiia 20:9) Ua-nda kala ni vondadi ia ku zuelela akuenu, o maka alungu ni Nzambi, ni ikanenu iê.—2 Kolindo 4:13.

O kixikinu kia tokala ku ku bhangesa ku zuelela akuenu ia lungu ni ima i ua di longo

Diiala ua mu londekesa o kixikanu kiê

9 Eie u tena ku mateka kuzuela ni muanhu, o kidi kia Bibidia, ku jindandu jê, ku makamba mê, ku jivizinhu jê, ni makamba mê a sidivisu. Mu ku bhita thembu, eie ua-nda mesena kuboka ni Jimbangi ja Jihova. Se kiene, kana ku kala ni hele, ia kuzuela ni Mbangi ia Jihova ua mu ku longa o Bibidia. Se u londekesa kuila, uala kiá mu kitala kia kuboka inzo ni inzo, tufunga tu iiadi a kilunga, a-nda xikama ni eie, ni mesene iê.

10 Kiki-phe, eie ua-nda tena kuijiia kiambote o tufunga a Jikidistá, ene mu kuinga o kilunga kia Nzambi. (Ikalakalu 20:28; 1 Phetele 5:2, 3) Se tufunga tutu, a mona kuila eie uejiia kiambote o ilongesu ia dianga ia Bibidia, iu ua i xikina, uene mu belesela o itumu ia Nzambi, ni ua-ndala ku kala Mbangi ia Jihova, ene a-nda ku tangela kuila, eie uala kiá mu kitala kia kuboka o njimbu iambote kála muboki, ka mu batizala.

11 Lua kamúkua, nange saí ukexilu ku muenhu ué, ni ku ífua iê, i ua tokala kueha, phala ku kala muboki. Íii ia lungu ni ima i ua kexile mu bhanga mu kasuekele. Kienhiki, ande dia ku bhinga phala ku kála muboki, eie ua tokala kueha o ituxi kála, o undumbu, o uhôlua, ni ku xibha diamba.—1 Kolindo 6:9, 10; Ngalásia 5:19-21.

KU DIELA NI KU BHILUKA

12 Saí dingi ima i ua tokala ku bhanga phala ku ku batizala. O poxolo Phetele uambe: “Enu-phe dielenu,…mu vutuke kua Nzambi, o muène ituxi ienu phala a mi jimune-iu.” (Ikalakalu 3:19) O ku diela, kulombolola ku di tatela o ima i ua bhange m’okulu. O muthu ua tokala ku diela, se ua kexile ni ukexilu ua iibha, maji né muene se o muthu ua kexile mu bhanga ima iambote, ua tokala ku diela ué. Mukonda diahi? Mukonda, athu oso akua ituxi, a bhingi o muloloki ua Nzambi. (Loma 3:23; 5:12) Ande dia ku di longa o Bibidia, eie ki uejidile se iebhi o vondadi ia Nzambi. Kienhiki-phe, kiebhi ki ueji tena ku kumbidila o vondadi iê? Kua bhingi ku diela.

13 O ku diela kua bhingi ku di bhilula, mba “ku xisa ku dima” o ima ia iibha. Eie ua tokala ku bhanga dingi ima ia mukuá, o ku diela ngó ki ki soko. Ua tokala ku xisa o ukexilu uê ua iibha uokulu, ni ku mateka kiá ku bhanga o ima iambote. O ima i ua tokala ku bhanga ande dia ku ku batizala o ku diela ni ku bhiluka o ima i ua tokala ku bhanga ande dia ku ku batizala.

O KU DI BHAKULA KUÊ

14 Kuala hanji kima kia beta-kota ki ua tokala ku bhanga, ande dia ku u batizala. Eie ua tokala ku di bhakula kua Jihova Nzambi.

15 Kioso ki u di bhakula kua Jihova Nzambi mu musambu mu ubheka, eie u kanena ku bheza ngó muéne, katé ku hádia. (Matendelelu 6:15) Mukonda diahi muthu ueji mesena ku bhanga kiki? Banza o diiala ua mateka ku tangesa o muhatu. Kioso kiaia ni ku muijiia, ni ku mona o ífua iê iambote, muéne ua-nda ku mu uabhela dingi. Mu ku bhita thembu, muéne ua-nda mu bhinga mu ukaza. Mu kidi, o ukaza u bheka ikalakalu ia mukuá. Maji o ku zola, kua-nda mu bhangesa ku kazala nê.

16 Kioso ki uejiia Jihova ni ku mu zola, eie ua-nda sola ku mu sidivila sé hele, mba ku mu bheza sé dizubhilu. Muthu uoso-uoso ua mesena ku kaiela o Mona Nzambi, Jezú Kristu, ua tokala ku “jimba ku di xinganeka muène” (Marku 8:34) Tu di jimba ku di xinganeka mu dietu, mu ku dituna o ku bhanga o vondadi ietu, ni ima i tua mesena ku bhanga, i tu fidisa ku belesela Nzambi. Ande dia ku ku batizala, o kima kia tokala ku dianga ku muenhu uê, o ku bhanga o vondadi ia Jihova Nzambi.

KIEBHI KI TU TOLOLA O UÔMA UA KU LUEZA

17 A mukuá a lembua ku di bhakula kua Jihova, mukonda ala ni hele ia ku bhanga kiki. Mukonda se ene a di bhakula kála Kidistá, a-nda ku a fundisa kua Nzambi. Ene ala ni hele ia ku lueza, ni ku luualesa Jihova, kienhiki, ene a xinganeka kuma ka tokala ku di bhakula luua kua muéne.

18 Kioso ki u suluka mu zola Jihova, eie ua-nda kala ni vondadi ia ku di bhakula kua muéne, ni ku bhanga ioso phala ku kumbidila o vondadi iê. (Ndongixi 5:4) Kioso ki u di bhakula, eie ua-nda mesena “kuenda kioso kiandala Ngana [Jihova], ni ku bhanga jinga ioso ia mu uabhela kiambote muène.” (Kolose 1:10) Mukonda dia henda iê kua Nzambi, eie ua-nda mona kuila ki kia bhonzo ku bhanga o vondadi iê. Sé phata, ua-nda xikina mu kisoneku kia poxolo Nzuá kiambe kuma: ‘O henda ia kuzola Nzambi ienhi’íi, o ku kumbidila o ijila iê. O ijila iê-phe ki ia bhonzo ku i kumbidila.’—1 Nzuá 5:3.

19 Eie ku bhingi ku kala muthu uaiuka, phala ku di bhakula kua Nzambi. Jihova uejiia kuebhi ku u sukila, muéne ka bhingi o ima ki u tena ku i bhanga. (Jisálamu 103:14) Muéne ua mesena kuila eie ue-nda kiambote, muéne u kolokotesa ni u ku kuatekesa. (Izaia 41:10) Xikina kuila, se u dielela kua Jihova, ni muxima uoso, muéne ua-nda ‘iukisa o njila jê joso.’—Jisabhu 3:5, 6.

IDIKISA O KU DI BHAKULA KUÊ MU BATIZU

20 Mu ku xinganeka mu ima i tua di longo kiá, i tena ku ku kuatekesa ku di bhakula kua Jihova, mu musambu. Athu a zolo Nzambi, a tokala ué ‘ku fisala ku athu, n’a bhuluke.’ (Loma 10:10) Kiebhi ki u tena ku bhanga kiki?

Ua di bhakula kiá mu musambu kua Nzambi?

Diiala ua mu samba

21 Zuela ku kafunga uala ku pholo mu kilunga mu ua tokala, kuila eie ua mesena kiá ku ku batizala. Muéne ua-nda bhinga o tufunga tua kilunga, na bhitulule ni eie o ilongesu ia dianga ia Bibidia. Se o tufunga iá, a mona kuila eie uala kia mu kitala, a-nda kuambela kuila a-nda ku batizala mu kiônge kia-nda kuíza.* Mu iônge ienii, ene mu bhana diskursu dia lungu ni kijimbuluilu dia batizu. O mulongi-phe, u bhinga ió a-nda ku a batizala, na tambuijile o ibhuidisu iiadi mu ukexilu ua ku ‘fisala ku athu’ o kixikinu kiâ.

22 O batizu, ilondekesa kuila o muthu ua di bhakula kua Nzambi, iu ua kituka Mbangi ia Jihova. O ió a-nda ku a batizala, a a bondeka mu menha, ni a a zangulula phala kuidikisa ku athu oso kuila, a di bhakula kua Jihova.

IHI IJIMBULULA O BATIZU IÊ

23 Jezú uambe kuma o maxibulu mê, a tokalele ku a batizala “mu dijina dia Tata, ni dia Mona, ni dia Nzumbi Ikôla.” (Matesu 28:19) Kiki, kilombolola kuma o muthu a-nda mu batizala, ua xikina o ungana ua Jihova Nzambi ni Jezú Kristu. (Jisálamu 83:18; Matesu 28:18) Muéne u xikina ué, mu ibhangelu ia nzumbi ikôla, kála o nguzu ionene ia Nzambi.—Ngalásia 5:22, 23; 2 Phetele 1:21.

O batizu ilombolola ku xisa o ukexilu uokulu, ni ku kala mu kitala kia ku bhanga o vondadi ia Nzambi

Diiala a mu mu batizala

24 Kienhiki, o batizu ki ku bondeka ngó mu menha. Maji kilombolola kima kia beta-kota. O ku bondeka mu menha, kilombolola kuila o muthu ua xisa o ukexilu uê uokulu. O ku zangulula mu menha, kilombolola kuila kindala eie, uala kiá mu kitala phala ku bhanga o vondadi ia Nzambi. Ua tokala ku di lembalala kuma, eie ua di bhakula kua Jihova Nzambi, ki ku kikalakalu, mba ku athu, mba ku kisangela. O ku di bhakula kuê, ni batizu, o dimatekenu dia ukamba uê ni Nzambi—o ukamba uê ua kazola ni muéne.—Jisálamu 25:14.

25 O batizu ki ku bhuluka kana. O poxolo Phaulu ua soneka: “Tutumbenu ni ujitu uoso ni uôma, phala mu mone o kubhuluka.” (Filipe 2:12) O batizu o dimatekenu ngó. Kua kambe hanji kibhuidisu phala ku ki tambuijila, kiebhi ki ngi tena ku kolokota mu henda ia Nzambi? O kibatulu kietu kia sukina-ku, kia-nda tambuijila o kibhuidisu kiki.

IHI I LONGA O BIBIDIA

  • O batizu ia Kidistá mu menha, i bhinga kuila o muthu a mu bondeka mu menha, ki ku mu tá ngó tu menha ku mutué.—Matesu 3:16.
  • O ima i diangela ku batizu, o kuijiia kua kidi, ku londekesa o kixikinu, o ku diela o ituxi, o ku bhiluka, ni ku di bhakula kua Nzambi.—Nzuá 17:3; Ikalakalu 3:19; 18:8.
  • Mu ku di bhakula kua Jihova, eie ua tokala ku di jimba mu ku di xinganeka, kála kia bhangele athu m’okulu phala ku kaiela Jezú.—Marku 8:34.
  • O batizu ilombolola ku xisa o ima iokulu, ni ku kala mu kitala phala ku bhanga o vondadi ia Nzambi.—1 Phetele 4:2.

*  O batizu a i bhanga mu iônge ionene, ni mu iônge ia dikota ku mivu ioso, ku Jimbangi ja Jihova.


Ibhuidisu

1. Mukonda diahi o mukalakadi ua nguvulu, mukua Etiiopia, ua bhingile ku mu batizala?

2. Mukonda diahi eie ua tokala ku banza mu batizu?

3. (a) Ihi ia tumina Jezú ku akaiedi’ê? (b) Kiebhi kia batizala mu menha?

4. Ihi ilondekesa o batizu mu menha?

5. (a) Kima kiahi kia dianga ki ua tokala ku bhanga phala ku ku batizala? (b) Mukonda diahi o iônge ia jikidistá i kuatekesa?

6. Kuijiia kuahi kua Bibidia ku ua tokala ku kala na-ku phala ku ku batizala?

7. O ku di longa o Bibidia ia tokala ku ku bhanga ihi?

8. Ihi ia-nda ku bhangesa ku zuelela akuenu ia lungu ni ima i uene mu di longa?

9, 10. (a) A nanhi u ua tokala ku mateka kuzuela nau o kidi kia Bibidia ki ua mu di longa? b) Ihi i ua tokala ku bhanga se ua mesena kuboka ni Jimbangi ja Jihova?

11. A mukuá a tokala ku bhanga ihi phala ku kala aboki?

12. Mukonda diahi kua bhingi ku diela?

13. O ku bhiluka ihi?

14. Kima kiahi kia beta-kota ki ua tokala ku bhanga ande dia ku u batizala?

15, 16. Ihi ijimbulula o ku di bhakula kua Nzambi, ni ihi i bhangesa o muthu ku bhanga kiki?

17. Mukonda diahi saí athu a kala ni hele ia ku di bhakula kua Nzambi?

18. Ihi ia-nda ku bhangesa ku di bhakula kua Jihova?

19. Mukonda diahi eie, ku tokala ku kala ni hele ia ku di bhakula kua Nzambi?

20. Mukonda diahi o ku di bhakula kua Jihova ki kima kia ku sueka?

21, 22. Kiebhi ki u tena ku ‘fisala ku athu’ o kixikinu kiê?

23. Ihi ilombolola o batizu “mu dijina dia Tata, dia Mona, ni dia Nzumbi Ikôla”?

24, 25. (a) O batizu ilombolola ihi? (b) Kibhuidisu kiahi kia tokala ku ki tambuijila?