Ku bokona mu madisá

Ku bokona mu madisá

Musoso 75: Mizangala Iuana Mu Babilonha

Musoso 75: Mizangala Iuana Mu Babilonha

O SOBHA Nabukodonozolo uambata akua Izalaiele oso a dimuka mu Babilonha. Anga, o sobha ua solo mu kaxaxi ka mizangala oso a iuka ni a dimuka. U tena ku mona o kiuana kia mizangala bhobha. Umoxi diâ Daniiele, o kitatu, akua Babilonha a exanene Sadalake, Mizake ni Abede-neko.

Nabukodonozolo ua mesenene ku longa o mizangala, phala ku kalakala mu mbonge iê. Kioso kia-nda bhita mivu itatu, muéne ua-nda sola o mizangala ia nguzu ni ia dimuka, phala ku kuatekesa mu ku fundisa o maka. O sobha ua mesenene kuila o mizangala a kala ni nguzu ni sauidi iambote, kioso kia kexile mu a longa. Kienhiki, muéne ua tumina o jiselevende jê, ku a bhana kúdia kua mbote, ni vinhu ia kexile mu tambula muéne ni muiji uê.

Daniiele, Sadalake, Mizake, ni Abede-neko a mu di jimbulula mua xikina

Tala o muzangala Daniiele. Eie uejiia ihi ia mu zuela ku mutuameni ua jiselevende ja Nabukodonozolo, Aspenaze? Daniiele ua mu zuela kuma, muéne ka mesene o kúdia kua meza a sobha. Maji Aspenaze ua tandanganha. Muéne uambe, ‘O sobha, muéne ua solo ioso i mua tokala kudia ni kunuá.’ ‘Se ki mu kala ni sauidi iambote, kála o mizangala ia kamúkua, muéne ua-nda ngi jibha.’

Kienhiki-phe, Daniiele uambela o mulangidi a mu tumina kuala Aspenaze ku mu tambula konda ni makamba mê. Muéne uambe, ‘Nga ku dióndo, tu fikise mu 10 dia izuua.’ ‘Tu bhane makúdia ma mábhia, ni menha phala kunuá. Kienhiki, u tale kioso ki tua-nda kala, ni u tale ué o mizangala ia kamúkua, ene mudia ioso i tunda ku meza a sobha, se tua sokela.’

O mulangidi ua xikana ku bhanga kienhiki. Kia bhiti 10 dia izuua, Daniiele, ni makamba mê atatu, akexile ni sauidi iambote, o mizangala ia kamúkua ndenge. Kienhiki, o mulangidi ua ehela kudia makúdia a mábhia, mu veji dia kúdia kua sobha.

Mu disukilu dia mivu itatu, o mizangala ioso a ambata kua Nabukodonozolo. Kioso kia zuela nau, o sobha ua mono kuma Daniiele ni makamba mê a betele kota mu ku dimuka. Kienhiki, muéne ua xala nau mu mbonge iê phala ku mu kuatekesa. Kienhiki, kioso o sobha kia ebhula mba u bhana maka a bhonzo kua Daniiele, Sadalake, Mizake, ni Abede-neko, ene a bandele 10 dia matala mu kuijiia, o jinganga ni akunji ndenge.

Daniiele 1:1-21.



Ibhuidisu

  • A nanhi o mizangala iuana mu fikula, ni mukonda diahi ala mu Babilonha?
  • Kikutu kiahi kiexile na-kiu Nabukodonozolo phala o mizangala iuana, ni kitumu kiahi kia bhele ku jiselevende jê?
  • Ihi ia bhingile Daniiele ia lungu ni kúdia ni kunuá phala muéne ni makamba mê atatu?
  • Mu ku sokesa ni mizangala ia mukuá, kiebhi kia kexile Daniiele ni makamba mê atatu, kioso kia dile o makúdia ma mábhia mu dikuinhi dia izuua?
  • Mukonda diahi Daniiele ni makamba mê atatu a ambatele mu mbonge ia sobha, ni mukonda diahi ene a betele kota, akunji ni jinganga ndenge?

Ibhuidisu ia mukua

  • Tanga Daniiele 1:1-21.

    Ihi i tua tokala ku bhanga, phala ku bhânga ni ji tendasá, phala tu kale ni nguzu? (Dan. 1:8; Dim. 39:7, 10; Nga. 6:9)

    Mu ukexilu uahi o mizangala lelu, nange a a tendala mba a a jijidika mu xikana íii i tu ixana “makúdia” phala ku bhanga o vondadi iâ? (Dan. 1:8; Jisa. 20:1; 2 Kol. 6:17-7:1)

    Kiebhi o musoso ua Bibidia ua lungu ni mizangala iuana ia Jihebeleu i tu kuatekesa, kioso ki tu tambula o kuijiia kua xikola? (Dan. 1:20; Iza. 54:13; 1 Kol. 3:18-20)