Ku bokona mu madisá

Ku bokona mu madisá

Musoso 65: O Diuanenu Dia Utuminu

Musoso 65: O Diuanenu Dia Utuminu

UEJIIA mukonda diahi o diiala didi ua mu tandujula o kizuatu kiê? Jihova ua mu tumina ku ki bhanga. O diiala didi polofeta ia Nzambi, Ahiia. Eie uejiia se o polofeta ihi? Muéne muthu u tambula o njimbu ia Nzambi ia lungu ni ioso ia-nda bhita.

Ahiia ni Jelobouamu

Ahiia bhobha ua mu zuela ni Jelobouamu. Solomá ua bhange Jelobouamu kabhitangu ka ikalakalu ia lungu ni ku tunga. Kioso Ahiia kia disangele ni Jelobouamu mu njila, Ahiia ua bhange kima kia madiuanu. Muéne uazula o kizuatu kiê, iu ua ki tandujula mu 12 kia mbandu. Muéne uambela Jelobouamu: ‘Kuata o 10 dia mbandu phala eie.’ Uejiia mukonda diahi Ahiia ua bhana kua Jelobouamu o 10 dia mbandu?

Ahiia ua mu jimbuluila kuma Jihova ua-nda katula o utuminu ua Solomá. Muéne uambe kuma ua-nda bhana o 10 dia diembu kua Jelobouamu. Kiki kilombolola kuma, o madiembu aiadi a-nda xala ni mon’a Solomá, Lobouamu phala ku a tumina.

Kioso Solomá kiévu ia zuela Ahiia kua Jelobouamu, muéne ua dizangala kiavulu. Muéne ua mesene ku jibha Jelobouamu. Maji, Jelobouamu ua lengela ku Ijitu. Mu bhita thembu Solomá uafú. Muéne uexile sobha mu 40 a mivu, maji kienhiki o mon’ê, Lobouamu ua kituka sobha. Ku Ijitu Lobouamu uévu kuma Solomá uafú, kienhiki muéne ua vutuka mu Izalaiele.

Lobouamu kexile sobha uambote. Muéne ua betele kota mu tatesa o mundu, o tat’ê, Solomá ndenge. Jelobouamu ni adiakimi a mukuá, endele ku Sobha Lobouamu ku mu bhinga phala ku talatala kiambote o mundu. Maji Lobouamu ka ki xikina. Muéne ua kituka dingi muthu uaiibha. Kienhiki, o mundu ua bhange Jelobouamu sobha ia 10 dia diembu, maji o madiembu aiadi a Bejamí ni a Juda, a xala ni Lobouamu kála sobha iâ.

Jelobouamu ka mesene kuila o mundu uê uia mu tembulu, mu Jeluzaleme phala ku bheza Jihova. Kienhiki, muéne ua bhange tu ngombe tu iiadi tua ulu, iu ua bhange o mundu ua 10-dia diembu ku tu bheza. Mu kusukáko, o ixi iezala ni usuéia ni ima iaiibha.

Mua kexile ué ibhidi mu utuminu ua diembu-dia kaiadi. Ande dia Lobouamu ku tenesa mivu itanu kala sobha, o sobha ia Ijitu uejile mu bhânga ni Jeluzaleme. Muéne ua katula mbongo javulu mu tembulu ia Jihova. Kua bhitile ngó thembu iofele tundé kia tungile o tembulu.

1 Jisobha 11:26-43; 12:1-33; 14:21-31.



Ibhuidisu

  • Kiebhi kiexanene o maiala aiadi ala mu fikula? Ene a nanhi?
  • Ihi ia bhangele Ahiia ni izuatu ia tandujuka, ni ihi ilombolola íii ia mu bhanga?
  • Ihi Solomá ia fikisa ku bhanga kua Jelobouamu?
  • Mukonda diahi athu a bhange Jelobouamu sobha ia dikuinhi dia madiembu?
  • Mukonda diahi Jelobouamu ua bhange tu ngombe tu iiadi tua ulu? Mukonda dia kiki, ihi ia bhitile ni ixi?
  • Ihi ia bhitile ni utuminu ua madiembu aiadi, ni tembulu ia Jihova mu Jeluzaleme?

Ibhuidisu ia mukua

  • Tanga 1 Jisobha 11:26-43.

    Muthu uahi uexile Jelobouamu? Ihi ia mu kanene Jihova se muéne ua kumbidile o itumu ia Nzambi? (1 Jis. 11:28, 38)

  • Tanga 1 Jisobha 12:1-33.

    Ihi o jitata ni adiakimi a kilunga a tena ku dilonga ni phangu iaiibha ia Jelobouamu, ia lungu ni ungana? (1 Jis. 12:13; Ndo. 7:7; 1 Phe. 5:2, 3)

    Kua nanhi o mizangala ia lelu a tokala kuia mu takana milongi kioso kia mesena ku bhanga kima kioso-kioso ku muenhu? (1 Jis. 12:6, 7; Jisa. 1:8, 9; 2 Tim. 3:16, 17; Jih. 13:7)

    Ihi ia bhangesa Jelobouamu ku bhanga ididi iiadi ia ubhezelu ua tu ngombe, ni kiebhi kiki kidikisa o ku kamba o kixikinu kua Jihova? (1 Jis. 11:37; 12:26-28)

    Nanhi ua bhangesa o mundu ua utuminu ua dikuinhi-dia diembu ku bhukumukina o ubhezelu ua kidi? (1 Jis. 12:32, 33)