Ku bokona mu madisá

Ku bokona mu madisá

Musoso 62: Ibhidi Mu Dibhata Dia Davidi

Musoso 62: Ibhidi Mu Dibhata Dia Davidi

KIOSO Davidi kia mateka ku tumina mu Jeluzaleme, Jihova ua mu bhele ikoué iavulu ku jinguma jê. Jihova ua kanene ku bhana ku akua Izalaiele o ixi ia Kanana. Kienhiki-phe, ni ki kuatekesu kia Jihova, o ixi ioso ia kanene, mu disukilu a i tambuile.

Davidi uexile nguvulu iambote. Muéne ua zolele Jihova. Kienhiki, kia tambula Jeluzaleme, o kima kia dianga ku bhanga, ua bhekele o álaka ia kikutu ia Jihova. Inga, muéne ua mesene ku tunga o tembulu phala ku ta-mu o álaka.

Kioso Davidi kia kexile kia muadiakimi, muéne ua bhangele kima kiaiibha. Davidi uejidile kuma ku katula kima kia tokala kua mukuenu, kituxi. Maji saí kizuua mu ngoloxi, kioso kia kexile ku thandu dia mbonge iê, muéne ua tale bhoxi iu ua mono muhatu ua uabha kiavulu. Dijina diê Bete-seba, muadi uê, disoladi, a mu ixana Udiia.

Davidi ua mesene kiavulu Bete-seba, iu ua tumina ku mu bheka mu mbonge iê. Muadi uê uakexile mu ita. Kienhiki, Davidi ua zeka nê, mu ku bhita thembu uévu kuila uemita. Davidi ua thandanganhele kiavulu, iu ua tumikisa njimbu kua Jouabe phala ku ta Udiia ku pholo ia ita phala a mu jibhe. Kioso kiafú Udiia, Davidi ua kazala ni Bete-seba.

Jihova ua dizangalele kiavulu ni Davidi. Kienhiki, muéne ua tumikisa o selevende iê, Natane, phala ku mu ambela ia lungu ni ituxi iê. Ua mu mona Natane kuná ku zuela ni Davidi. Davidi ua diele kiavulu mu ioso ia bhangele, mukonda dia kiki Jihova ka mu jibhe. Maji Jihova uambe: ‘Mukonda ua bhange ima iaiibha, eie ua-nda kala ni ibhidi iavulu ku dibhata diê.’ Ibhidi iahi ia kexile na-iu Davidi!

Natane u bazela Davidi

Kia dianga, o mon’â Bete-seba uafú. O mona ua phande-kumbi ua Davidi, Amone ua kuata phang’ê Tamala kia kexile u bheka-uâ, ua mu jijidika iu ua zeka nê. O mon’a Davidi Abisalone ua dizangalele kiavulu, iu ua jibha Amone. Abisalone ua nganhala o favolo ia athu avulu, iu ua di bhange sobha. Mu kusukáko, Davidi ua nganhala o ita, Abisalone, a mu jibha. Kiene, Davidi uakexile ni ibhidi iavulu.

Bhu kaxaxi ka maka oso iâ, Bete-seba ua vuala mona ua mukuá, a mu luku Solomá. Kioso Davidi kia kuka, iu ua katele, o mon’ê Adoniia, ua mesenene ku di bhanga sobha. Kiki, Davidi ua tumikisa o mukunji, a mu ixana Zadoke, phala ku ta máji ku mútue ua Solomá, phala kuidikisa kuma Solomá ua-nda kala sobha. Mu ku bhita ji mbeji, Davidi uafú ni 70 a mivu. Muéne ua tumina mu 40 a mivu, maji kindala Solomá muene sobha ia Izalaiele.

2 Samuuele 11:1-27; 12:1-18; 1 Jisobha 1:1-48.



Ibhuidisu

  • Ni kikuatekesu kia Jihova, ihi ia bhitile ni ixi ia Kanana?
  • Kizuua kimoxi mu usuku, ihi ia bhitile kioso Davidi kia kexile ku thandu dia sabhalalu ia mbonge iê?
  • Mukonda diahi Jihova ua temene kiavulu ni Davidi?
  • Mu fikula, Jihova ua tumikisa nanhi phala ku zuela ni Davidi ia lungu ni ituxi iê, ni ihi ia zuela o diiala ieji bhita ni Davidi?
  • Ibhidi iahi ia kexile na-iu Davidi?
  • Mu kididi kia Davidi, nanhi uexile o sobha ia Izalaiele?

Ibhuidisu ia mukua

  • Tanga 2 Samuuele 11:1-27.

    Kiebhi o ku kalakala mu sidivisu ia Jihova i tu langa?

    Ihi ia bhangesa Davidi ku ta kituxi, ni kiebhi kiki ki sidivila phala ku dimuna o jiselevende ja Jihova lelu? (2 Sam. 11:2; Mat. 5:27-29; 1 Kol. 10:12; Tii. 1:14, 15)

  • Tanga 2 Samuuele 12:1-18.

    Disá diahi adiakimi ni jitata a tena ku dilonga kua Jonata kioso kia bhixila kua Davidi phala ku mu bhana mulongi? (2 Sam. 12:1-4; Jisa. 12:18; Mat. 13:34)

    Mukonda diahi Jihova ua loloka Davidi? (2 Sam. 12:13; Jisá. 32:5; 2 Kol. 7:9, 10)