Ku bokona mu madisá

Ku bokona mu madisá

Musoso 58: Davidi ni Ngoliia

Musoso 58: Davidi ni Ngoliia

AKUA Fidíxia ejile dingi mu bhânga ni akua Izalaiele. O jiphange jitatu ja Davidi akexile mu kifuxi kia masoladi a Saúlu. Kienhiki, saí kizuua Jese uambela Davidi: ‘Ambata masa ni mbolo, ndé ka bhekele o jiphange jê. Tala kiebhi kienda.’

Ngoliia

Kioso Davidi kia bhixila mu kilombo kia masoladi, ua lengela katé ku pholo dia ita phala ku mona o jiphange jê. O dizonda mukuá Fidíxa, Ngoliia, uejile mu dinanza ku akua Izalaiele. Muéne uakexile mu bhanga kienhiki izuua ioso mu kamene ni mu ngoloxi, mu 40 a izuua. Muéne uakexile mu dikola: ‘Solenu muthu, na bhânge n’eme. Se u ngi tolola, na ngi jibha, tua-nda kala tu abhik’enu. Se ngi mu tolala, mba ngi mu jibha, mua-nda kala mu abhik’etu. Eme ngi mi sombola ku sola muthu na bhânge n’eme.’

Davidi uebhula o masoladi: ‘Ihi ia-nda nganhala o diiala dia-nda jibha o mukuá Fidíxa iú, ni ku bhulula Izalaiele ku jisonhi?’

O disoladi uixi, ‘Saúlu ua-nda mu bhana jimbongo javulu.’ Muéne ua-nda mu bhana ué o mon’ê na kale muhatu’ê.’

Maji akua Izalaiele akexile ni uôma ua Ngoliia, mukonda muéne uexile muthu uonene. Muéne uakexile ni metulu 3 mu ku lebha, ni uakexile ni disoladi dia mu ambatele o ngubu.

Masoladi a mukuá endele mu zuela ni Sobha Saúlu, kuma Davidi ua-ndala ku bhânga ni Ngoliia. Maji Saúlu uambela Davidi: ‘Eie ku tena ku bhânga ni mukuá Fidíxa iú. Eie u muzangala hanji, muéne disoladi tundé mu u ndenge.’ Davidi ua tambuijila: ‘Eme nga jibhile o úlusu, ni hoji ia mesene kuambata o jimbudi ja tat’ami. O mukuá Fidíxa iú, kiene ué ki nga-nda mu bhanga. Jihova ua-nda ngi kuatekesa.’ Kienhiki Saúlu uixi: ‘Ndé, Jihova a kale n’eie.’

Davidi uai mu kangiji, iu ua bongo matadi atanu, ua te mu saka iê, kienhiki muéne ua kuata ku mbala-fundu iê, iu uai mu disanga ni dizonda. Kioso kia mu mono, Ngoliia katenene ua mu tende. Muéne ua banzele kuma ki kia-nda bhonza ku jibha Davidi.

Davidi ua mu takula o ditadi

Ngoliia uixi, ‘Zakunu,’ ‘Nga-nda bhana o kimbi kiê, ku jinjila ni ku iama, na kudie.’ Maji Davidi uixi: ‘Eie uíza ko-kuami, ni xibhata ni sosa, ni ngubu, maji eme ngiza ko-kué mu dijina dia Jihova. Lelu, Jihova ua-nda bhana o kimbi kiê ko-kuami, ni nga-nda ku jibha.’

Kienhiki, Davidi ua zukama kua Ngoliia. Muéne ua katula ditadi mu saka, iu ua di te mu mbala-fundu, iu ua di takula ni nguzu ioso. O ditadi dia tula ku mútue ua Ngoliia, muéne ua lunduka iu uáfu! Kioso akua Fidíxa kia mono kuma o dizonda diâ, diáfu, en’oso a lenge. Kienhiki akua Izalaiele a kaiela ku dima diâ, ni a nganhala o ita.

1 Samuuele 17:1-54.



Ibhuidisu

  • Kiebhi kia sombola Ngoliia akua Izalaiele phala ku bhânga nê?
  • Kitala kiahi kiexile na-kiu Ngoliia, ni kisakidilu kiahi kia kanena o Sobha Saúlu ku diiala dieji mu jibha?
  • Kiebhi kia tambuijila Davidi kioso Saúlu kia mu ambela kuma muéne ka tokalele ku bhânga ni Ngoliia, mukonda Davidi uexile hanji muzangala?
  • Mu ku tambuijila Ngoliia, kiebhi Davidi kiedikisa o kidielelu kiê kua Jihova?
  • Kála ki ua mu mona mu fikula, ihi ia kuata Davidi phala ku jibha na-iu Ngoliia, ni ihi ia bhitile ni akua Fidíxia kia bhiti o ima íii?

Ibhuidisu ia mukua

  • Tanga 1 Samuuele 17:1-54.

    Ihi iexile o kikutu kia ku suína kua Davidi, ni kiebhi tu tena ku kaiela o ku suína kuê? (1 Sam. 17:37, 45; Efe. 6:10, 11)

    Mukonda diahi o Jikidistá a tokala kueha o ukexilu ua ku beta-kota kála Ngoliia, mu ma tonokenu mâ? (1 Sam. 17:8; Nga. 5:26; 1 Tim. 4:8)

    Kiebhi o izuelelu ia Davidi iedikisa kuma muéne uakexile ni kixikinu ku kikuatekesu kia Nzambi? (1 Sam. 17:45-47; 2 Mal. 20:15)

    Mu veji ia ku tanga ngó o ku disokesa mu masoladi a jinguma jiiadi, kiebhi o musoso iú uidikisa kuma, o ita mu kidi iexile ia jinzambi ja makutu ni Nzambi ia kidi, Jihova? (1 Sam. 17:43, 46, 47)

    Kiebhi o a undu, a kaiela o phangu ia Davidi ia ku dielela kua Jihova? (1 Sam. 17:37; Jel. 1:17-19; Dij. 12:17)