Ku bokona mu madisá

Ku bokona mu madisá

Musoso 108: Mu Njila Ia Damásku

Musoso 108: Mu Njila Ia Damásku

EIE UEJIIA se iú, ua zeka bhoxi nanhi? Saúlu. Lembalala kuma, muéne ua kuatele o izuatu ia maiala a takuile o matadi kua Xitevá. Tala o mukengeji ua mu bhenha! Ihi ia mu bhita?

Kioso kia zubha ku jibha Xitevá, Saúlu ua tuamena mu zukutisa akaiedi a Jezú. Muéne uakexile mu bokona dibhata ni dibhata ni uakexile mu ku a koka katé mu kaleia. Kienhiki, maxibulu avulu akexile mu lengela mu jimbanza jengi, ni ku kolokota mu kuboka o “njimbu iambote.” Maji Saúlu uendele ué mu jimbanza ja kamúkua mu sota o akaiedi a Jezú. Kienhiki, muéne uala mu njila ia Damásku. Maji mu njila mua bhiti madiuanu:

Mu kithangana kieniókio, o mukengeji ku diulu ua bhenha kua Saúlu. Muéne ua dibhale bhoxi, kála ki tua mu mona bhabha. Kienhiki o dízui dixi: ‘Saúlu, Saúlu! Mukonda diahi ua mu ngi zukutisa?’ O maiala akexile ni Saúlu evu o dízui, a mono ué o mukengeji, maji ene ka kexile mu di tendela se ihi ia zuela.

Saúlu a mu bhenha ku mukengeji

Saúlu uebhula, ‘Ngana, eie nanhi?’

O dízui dixi, ‘Eme Jezú, ua mu mu zukutisa.’ Jezú uambe kiki, mukonda kioso Saúlu kia kexile mu zukutisa o akaiedi a Jezú, kia kexile kala ua mu ki bhanga kua Jezú.

Kienhiki Saúlu uebhula: ‘Ihi nga tokala ku bhanga, Ngana?’

Jezú uixi, ‘Balumuka, ndé katé ku Damásku.’ Kuenhoko a-nda ku tangela ihi iu ua tokala ku bhanga.’ Kioso Saúlu kia balumuka, kia jikula o mesu, muéne katenene ku mona kima. Ua kexile kafôfo! O maiala akexile mu kuenda nê, a mu kuata mu lukuaku, ni a muendesa katé mu Damásku.

Jezú ua tangela-phe o dixibulu diê mu Damásku, uambe: ‘Ananiia, Balumuka. Ndé mu njila a ixana kadilu. Mu dibhata dia Juda uebhula diiala a mu ixana Saúlu. Eme nga mu solo phala ku kala selevende iami ia kazola.’

Ananiia ua belesela. Kioso kia sange Saúlu muéne ua tula o maku ku thandu diê, iu uambe: ‘O Ngana ua ngi tumu kokué phala u mone dingi, ni u kale ni nzumbi ikôla.’ Mu kithangana kieniókio, kima kia difuangana ni ibalabala ia tundu ku mesu a Saúlu, kienhiki muéne ua tenene dingi ku mona.

Saúlu a mu bhana o ku tena kua kubokela athu mu jixi javulu. Muéne a muijidile mu dijina kála poxolo Phaulu, kála ki tua-nda dilonga maka alungu ni muéne. Kia dianga, ndoko hanji tu tale se ihi Nzambi ia tumina Phetele ku bhanga.

Ikalakalu 8:1-4; 9:1-20; 22:6-16; 26:8-20.



Ibhuidisu

  • Ihi ia bhangele Saúlu kioso kiafú Xitevá?
  • Kima kiahi kia madiuanu kia bhitile kioso Saúlu kia kexile mu njila ia Damásku?
  • Ihi Jezú ia tumina Saúlu ku bhanga?
  • Ilongesu iahi ia bhele Jezú kua Ananiia, ni kiebhi Saúlu kia tenene dingi ku mona?
  • Saúlu a muijidile mu dijina diebhi, ni kikalakalu kiahi kia tambuile?

Ibhuidisu ia mukua

  • Tanga Ikalakalu 8:1-4.

    Kiebhi o kizukutisu kia kilunga kia Jikidistá kia ubhe kia sidivila phala ku muangana o kixikinu kia Jikidistá, ni kima kiahi kia difuangana iene mu bhita mu izuua ia lelu? (Ikalakalu 8:4; Iza. 54:17)

  • Tanga Ikalakalu 9:1-20.

    Ikalakalu iahi itatu ieji tambula Saúlu kála kia mu tangele Jezú? (Ikalakalu 9:15; 13:5; 26:1; 27:24; Lom. 11:13)

  • Tanga Ikalakalu 22:6-16.

    Kiebhi tu tena ku kala kála Ananiia, ni mukonda diahi kiki kia beta-kota? (Ikalakalu 22:12; 1 Tim. 3:7; 1 Phe. 1:14-16; 2:12)

  • Tanga Ikalakalu 26:8-20.

    Kiebhi o ku xikina kua Saúlu kala Kidistá ki sidivila phala ku suínisa lelu oso a kala ni maiala mba ahatu ki jikidistá? (Ikalakalu 26:11; 1 Tim. 1:14-16; 2 Tim. 4:2; 1 Phe. 3:1-3)