Ku bokona mu madisá

Ku bokona mu madisá

Musoso 99: Mu Sala Ia Sabhalalu

Musoso 99: Mu Sala Ia Sabhalalu

KUA bhitile kiá izuua iiadi, kiexile kiá, kia Kinda mu usuku. Jezú ni 12 dia jipoxolo jê endele mu sala ionene ia sabhalalu phala kudia o Phasu. O diiala di ua mu mona ku tunda, Juda dia Kadiota. Muéne ua múia mu tangela akunji a jingeleja, kiebhi kia-nda tena ku kuata Jezú.

O sata ia Ngana

Ande dia kizuua kieniókio, Juda uendele mu zuela ni ene, iu ua ebhula: ‘Ihi mua-nda ngi bhana, se ngi mi kuatekesa ku kuata Jezú?’ Ene a tambuijila: ‘Makuinhi atatu a itadi ia phalata.’ Kienhiki, Juda uai ku disanga ni maiala iâ, phala kua ambata katé kua Jezú. Ki kima kiaiibha?

A zubha kudia o Phasu. Maji kindala, Jezú ua mateka o fesa ia mukuá ia beta-kota. Muéne ua uane o mbolo, iu ua i bhana o jipoxolo, uixi: ‘Dienu, mukonda íii ilombolola o mukutu uami, u nga-nda bhana phala enu.’ Kienhiki, muéne ua bhana ué o kopho ia vinhu, uixi: ‘Nuenu, íii ilombolola o manhinga mami, a-nda zunzumuka phala enu.’ O Bibidia ixana ‘O sata ia Ngana,’ mba ‘Seialu ia Ngana.’

Akua Izalaiele adile o Phasu phala ku di lembalala kioso o anju ia Nzambi ‘ki ia bhitile’ mu jinzo ja Ijitu, i ia jibhile ana phande-kumbi oso mu mabhata a akua Ijitu. Maji, Jezú ua mesene kuma akaiedi’ê a mu lembalala, mukonda muéne ua bhana o muenhu uê, phala ku a bhulula. Mukonda dia kiki muéne ua tumina ku bhanga o fesa íii mu mivu ioso.

Kioso kia zubha o Kúdia, Jezú uambela jipoxolo jê phala a kolokote ni kixikinu kia nguzu. Mu kusukáko, ene embile o mimbu ia kiximanu kua Nzambi, ia a tundu. Kiexile kiá tádidi, nange mu kaxaxi ka usuku. Ndoko tu tale kuebhi kuendele.

Matesu 26:14-30; Luka 22:1-39; Nzuá kibatulu 13-katé 17; 1 Kolindo 11:20.



Ibhuidisu

  • Kála kidikisa o fikula, mukonda diahi Jezú ni 12 kia jipoxolo ala mu sala ia sabhalalu?
  • Nanhi o diiala dia mu tunda-mu, ni ihi muéne ia múia mu bhanga?
  • Kúdia kuahi kuatokala kua mateka Jezú kioso kia zubha o kudia o Phasu?
  • O Phasu iexile mu lembalala ihi ku akua Izalaiele, ni ihi i lembalala o seialu ia ngana ku akaiedi a Jezú?
  • Kioso kia zubha o Kudia o Seialu ia Ngana, ihi ia zuela Jezú ku akaiedi’ê, ni ihi ene a bhangele?

Ibhuidisu ia mukua

  • Tanga Matesu 26:14-30.

    Kiebhi kidikisa o divulu dia Matesu 26:15, kuma kioso Juda kia bhakuile Jezú, ua ki bhangele muene mu vondadi iê?

    Mu ima iahi iiadi ia sidivila o manhinga a Jezú? (Mat. 26:27, 28; Jel. 31:31-33; Efe. 1:7; Jih. 9:19, 20)

  • Tanga Luka 22:1-39.

    Kiebhi kia bokona Satanaji mu muxima ua Juda? (Luka 22:3; Nzuá 13:2; Ikalakalu 1:24, 25)

  • Tanga Nzuá 13:1-20.

    Kála kiedikisa o divulu dia Nzuá 13:2, o kuila Juda uakexile ni ki kuma? Disá diahi dia tena ku di dilonga o jiselevende ja Nzambi? (Dim. 4:7; 2 Kol. 2:11; Nga. 6:1; Tii. 1:13, 14)

    Disá diahi dia nguzu dia tu bhana Jezú? (Nzuá 13:15; Mat. 23:11; 1 Phe. 2:21)

  • Tanga Nzuá 17:1-26.

    Mu ukexilu uahi ua sambela Jezú phala akaiedi’ê a “kale umoxi”? (Nzuá 17:11, 21-23; Lom. 13:8; 14:19; Kol. 3:14)