Ku bokona mu madisá

Ku bokona mu madisá

Musoso 90: Ni Muhatu Bhu Fixi

Musoso 90: Ni Muhatu Bhu Fixi

JEZÚ uemana bhu fixi ia Samádia, phala ku nhoha. O maxibulu endele mu sumba kúdia. O muhatu ua mu zuela ni Jezú uéza mu teka menha. Muéne ua mu ambela: ‘Ngi bhane-ku tu menha, ngi nué.’

Jezú ua mu zuela ni muhatu Samádia

Kiki kia bhangesa o muhatu ku diuana kiavulu. Uejiia mukonda diahi? Mukonda Jezú uexile Judé, muéne uexile mukuá Samádia. Akua Judé ni akua Samádia, a di zembele. Ene ka kexile mu di zuelesa! Maji Jezú ua mesene o mbote phala athu oso. Kienhiki uambe: ‘Se eie uejidile nanhi ua mu ku bhinga o menha phala kunuá, eie ueji mu bhinga o menha a bhana o muenhu, inga muéne ueji ku bhana.’

O muhatu uixi, ‘Ngana,’ ‘o fixi íii, ia zongo, eie kuala ni kima kia ku katula na-kiu o menha. O menha ma muenhu ua-nda kua katula kuebhi?’

Jezú ua tambuijila, ‘Se u nuá o menha a fixi íii, ua-nda kala dingi ni dinhota.’ ‘Maji o menha U nga-nda ku bhana a tena ku bhangesa o muthu ku kala ni muenhu ua kalelaku.’

O muhatu uambe, ‘Ngana,’ ‘ngi bhane o menha iá! Kienhiki, nuka dingi nga-nda kala ni dinhota. Ki nga-nda kuíza dingi bhobha mu teka menha.

O muhatu ua fika kuma o menha a zuela Jezú, menha a kidi. Maji muéne ua zuelele maka alungu ni kidi kia Nzambi, ni utuminu uê. O kidi kiki, kia difuangana kála o menha a bhana o muenhu. Ki tena ku bhana ku muthu muenhu ua kalelaku.

Jezú uambela o muhatu: ‘Ndé ka kexane muadi uê, uize-nê.’

Muéne ua tambuijila, ‘Eme ki ngala ni diiala.’

Jezú uambe, ‘Kidi ki ua zuela.’ ‘Maji eie uakexile kiá ni maiala atanu, o ió uala nê, ki muadi uê.’

O muhatu ua diuanene, mukonda kiexile kidi. Kiebhi Jezú kiejidile o ima ienii? Ua kijidile mukonda Jezú uexile ió a mu Kanene kuala Nzambi, Nzambi ua mu tangela o maka enhá. Mu kithangana kieniókio, o maxibulu a Jezú a bhixila, ene a diuanene ué mu ku sanga Jezú ua mu zuela ni muhatu mukuá Samádia.

Ihi tu tena ku dilonga ni ioso íii? Íii i tu longa kuma Jezú muthu uambote ni athu oso. Etu tua tokala ué ku kala kála muéne. Ki tu tena ku banza kuma athu a kamúkua aiibha, mukonda a tokala diembu diéngi. Jezú ua-ndala kuma athu oso ejiia o kidi, phala ku nganhala ué o muenhu ua kalelaku. Etu tua tokala ku kuatekesa ué athu kuijiia o kidi.

Nzuá 4:5-43; 17:3.



Ibhuidisu

  • Mukonda diahi Jezú uemanene bhu fixi mu Samádia, ni ihi muéne ia mu zuela ku muhatu bhenhobho?
  • Mukonda diahi o muhatu ua diuanene, ihi ia mu zuelela Jezú, ni mukonda diahi?
  • Menha ahi a banzele o muhatu akexile mu zuela Jezú, maji mu kidi menha ahi akexile mu zuela muéne?
  • Mukonda diahi o muhatu ua diuana ni ima iejidile Jezú ia lungu ni muéne, ni kiebhi muéne kiejidile o ima íii?
  • Disá diahi di tu longa o musoso ua lungu ni muhatu bhu fixi?

Ibhuidisu ia mukua

  • Tanga Nzuá 4:5-43.

    Mu ku kaiela o phangu ia Jezú, ukexilu uahi u tua tokala ku kala nau ua lungu ni ku dibhana ni athu a ixi iéngi, ni ukexilu uéngi? (Nzuá 4:9; 1 Kol. 9:22; 1 Tim. 2:3, 4; Tito 2:11)

    Mabesá ahi a tambula o muthu u kituka dixibulu dia Jezú? (Nzuá 4:14; Iza. 58:11; 2 Kol. 4:16)

    Kiebhi ki tu tena kuidikisa o kiximanu kála kia bhangele o muhatu mukuá Samádia, kia mesenene ku tangela akuâ, ioso ia dilongele? (Nzuá 4:7, 28; Mat. 6:33; Luka 10:40-42)