Ku bokona mu madisá

Ku bokona mu madisá

Musoso 95: Kiebhi Jezú Kia Kexile Mu Longa

Musoso 95: Kiebhi Jezú Kia Kexile Mu Longa

SAÍ kizuua Jezú uambela o diiala, kuma muéne ua tokalele ku zola akuâ. O diiala uebhula Jezú: ‘O mukuetu-phe nanhi?’ Mbe, Jezú uejidile se ihi ia kexile mu banza o diiala. O diiala ua banzele kuma athu a ixi iê, ni ia ngeleja iê, ene ngó u tu zola. Kienhiki, ndoko tu tale, ihi ia mu tangela Jezú.

Mu ithangana ia mukuá, Jezú uakexile mu a longa, mu musoso. Kienhiki kiene kia bhangele. Muéne ua tange o musoso ua mukuá Judé ni mukuá Samádia. Tua dilongo kiá kuma, akua Judé ka di zolele ni akua Samádia. Íii iene o musoso ua Jezú:

Saí kizuua, mukuá Judé uakexile mu bhita mu njila ia mulundu ua Jedikó. Maji o jibandi ja mu kuata. A mu katula o kitadi kioso, iu a mu beta katé kiexile kuaji phala kufuá.

Anga, kua moneka mu njila mukunji ua Judé. Muéne ua mono o diiala a mu bhé-kibetu. Ihi ia bhange muéne? Muéne ua somboka ku mbandu iéngi ia njila, iu uaié. Kua bhiti ué muthu uéngi, mukuá ngeleja. Muéne uexile Levita. O kuila muéne uemanene? Kana, muéne kemanene phala ku kuatekesa o diiala a mu bhê-kibetu. Eie ua mu mona o mukunji mu njila ni Levita, a múia kala muthu ni njila iê.

Maji-phe, tala se nanhi uala ni diiala a mu bhê-kibetu. Muéne mukuá Samádia. Muéne ua kuatekesa o Judé. Ua mu te milongo mu jifidila jê. Inga uambata o Judé mu kididi kia tokalele phala muéne ku nhoha ni ku mu saka.

O mukua Samádia

Kioso kia zubha ku tanga o musoso, Jezú uebhula o diiala: ‘Mu kitatu kiâ, nanhi ua bhange o mbote ku diiala a mu bhê-kibetu? Uexile o mukunji, o Levita mba o mukuá Samádia?’

O diiala ua tambuijila: ‘O mukuá Samádia. Muéne ua bhangele o mbote ku diiala a mu bhê-kibetu.’

Jezú uixi: ‘Ua lungu’ê. Kienhiki, ndé ka bhange ku akuenu, kála kia bhange muéne.’

O ilongesu ia Jezú, ki ia ku uabhela? Tu tena ku dilonga maka avulu se tuívua ioso ia zuela Jezú mu Bibidia, ki kiene?

Luka 10:25-37.



Ibhuidisu

  • Ihi iebhula o diiala kua Jezú, ni mukonda diahi?
  • Mu ithangana ia mukuá kiebhi Jezú kia kexile mu longa, ni ihi i tua dilongo ia lungu ni Jijudé, ni akua Samádia?
  • Mu musoso ua tangele Jezú, ihi ia bhitile ni mukuá Judé mu njila ia Jedikó?
  • Ihi ia bhitile kioso o mukunji Judé ni mukuá Levita kia bhitile mu njila?
  • Mu fikula, nanhi ua mu kuatekesa o Judé ua kumbama?
  • Kioso kia zubha Jezú ku tanga o musoso, ihi iebhula muéne, ni kiebhi kia tambuijila o diiala?

Ibhuidisu ia mukua

  • Tanga Luka 10:25

    Mu veji dia ku tambuijila ngó, kiebhi kia kuatekesa Jezú o mesene ia Kitumu ku xinganeka o maka? (Luka 10:26; Mat. 16:13)

    Kiebhi o ilongesu ia Jezú, ni ifika ia kuatekesa athu ku xisa o kathombo? (Luka 10:36, 37; 18:9)