Ku bokona mu madisá

Ku bokona mu madisá

Musoso 85: Jezú a mu Vualela mu Kibhanga

Musoso 85: Jezú a mu Vualela mu Kibhanga

EIE UEJIIA se o kamona kaka nanhi? Kiene, Jezú. Muéne a mu vualela mu kibhanga. O kibhanga kididi kia ku bhakela ibhaku. Madiia ua mu zekesa Jezú mu kidilu kia ibhaku, o kididi kia ku tela kúdia ku jibulu ni ibhaku ia mukuá. Maji mukonda diahi Madiia ni Zuze ala bhobha ni ibhaku? Ki kididi kia ku vualela mona, ki kiene?

Kana, ki kiene. Maji ene ala bhobha mukonda: O nguvulu ia Loma Sézalu Nguxi, ua bhana o kitumu kuila, athu oso a tokalele ku vutuka mu mbanza mua a vualela phala ku a soneka o majina mu divulu. Zuze a mu vualela mu Beleme. Maji kioso muéne ni Madiia kia bhixila, ki mu kexile dingi kididi phala ene. Mukonda dia kiki kiene kia a bhekesa kuia mu kibhanga kia ibhaku. Mu kizuua kieniókio, Madiia ua vuala Jezú! Maji, kála ki ua mu mona, muéne uala kiambote.

Zuze, Madiia, ni muzangala Jezú

U tena ku mona abhidi a mu kuíza mu tala Jezú? Ene akexile mu mukáu mu usuku mu kuinga o jimbudi, kioso kia muika o mukengeji mu kaxaxi kâ. Iexile anju! Maji abhidi akexile ni uôma uavulu. Maji o anju ixi: ‘Ki mu kale ni uôma! Ngala ni njimbu iambote phala enu. Lelu, Kristu o Ngana, a mu vualela mu Beleme. Muéne ua-nda bhulula o mundu! Ndenu, mua-nda mu sanga a mu futu mu milele, ni a mu zekesa mu kidilu kia ibhaku.’ Mu kithangana kieniókio kuíza ji-anju javulu ni a ximana Nzambi. Kienhiki, o abhidi a lenguluka mu ku sota Jezú, ni a mu sange.

Uejiia mukonda diahi Jezú uexile muthu uonene? Uejiia se muéne mu kidi uexile nanhi? Lembalala kuma, mu dimatekenu dia musoso ua divulu didi, tua zuela maka alungu ni Mona ua dianga ua Nzambi. O Mona iú ua kalakala ni Jihova mu ku bhanga o diulu ni ixi ni ima ioso. O iú Jezú!

Kiene, Jihova ua katula o muenhu ua Mon’ê ku diulu, iu ua u tula mu mala dia Madiia. Kienhiki, o kamona kaka, ka kudila mu mala diê, kála ki kula o tuana tua mukuá mu mala dia mama jâ. Maji o kamona kaka, kexile Mon’a Nzambi. Mu kusukáko, Jezú a mu vualela mu Beleme, mu kibhanga. Uejiia kiá se mukonda diahi, o ji-anju a sangulukile mu ku tangela athu, kuila Jezú a mu vuala?

Luka 2:1-20.



Ibhuidisu

  • Nanhi o mona mu fikula, ni kuebhi kua mu mu zekesa Madiia?
  • Mukonda diahi Jezú a mu vualela mu kibhanga ni ibhaku?
  • Mu fikula, a nanhi o maiala a mu bokona mu kibhanga, ni ihi ia a zuelela o anju?
  • Mukonda diahi Jezú mona ua kazola?
  • Mukonda diahi Jezú a mu ixana Mon’a Nzambi?

Ibhuidisu ia mukua

  • Tanga Luka 2:1-20.

    Ihi ia bhangele Sézalu Nguxi mu ki kumbidilu kia lungu ni kikanenu kia uvualukilu ua Jezú? (Luka 2:1-4; Mik. 5:2)

    Kiebhi o muthu u tena ku kala mu kaxaxi ka ió a exana “athu oso a mu uabhela”? (Luka 2:14; Mat. 16:24; Nzuá 17:3; Ikalakalu 3:19; Jih. 11:6)

    Se abhidi a Jijudé a sangulukile ni uvualukilu ua Mubhuludi, o jiselevende ja Nzambi lelu ki ja tokalele ku sanguluka kiavulu? (Luka 2:10, 11; Efe. 3:8, 9; Dij. 11:15; 14:6)