Ku bokona mu madisá

Ku bokona mu madisá

Musoso 100: Jezú Mu Jaludim

Musoso 100: Jezú Mu Jaludim

KIOSO kia tundu mu sala ia sabhalalu, Jezú ni jipoxolo jê endele katé mu jaludim ia Ngetesemane. Ene endele kuenhoko mu veji javulu. Jezú ua ambelele phala ka zeke, maji a tokalele ku sambe. Kienhiki, muéne ua sondoloka, iu ua bhetama phala ku samba.

Anga, Jezú u vutuka kua kexile o jipoxolo jê. Ihi ene akexile mu bhanga? Ene akexile mu zeka! Mu veji jitatu Jezú ua ambela kuma ene a tokalele ku dilangidila, maji mu veji joso, kioso muéne kia vutukile ua a sangele a zeka. Jezú uebhula mu veji ia sukina-ko. ‘Kiebhi mu tena ku zeka mu kithangana kála kiki?’ ‘O ola iéza kiá, phala ku ngi bhakula ku jinguma jami.’

Mu kithangana kieniókio, evu jibuia ja athu avulu. Tala! Kua mu kuíza maiala ni jixibhata ni ji mbangala! Ene a mu kuíza ni imuikinu phala a kale ni mukengeji. Kioso kia zukama, o mukuá uéza ku pholo ia Jezú. Muéne ua bejala Jezú kála ki ua mu mona. O diiala uexile Juda dia Kadiota! Mukonda diahi muéne ua bejala Jezú?

Juda u bhakula Jezú

Jezú uebhula: ‘Juda, u ngi bhakula ni beju?’ O beju kiene o kijimbuete. Kiki kia bhangesa o maiala akexile ni Juda kuijiia kuma Jezú, o muthu a mu mesenene. O jinguma ja Jezú eza ku mu kuata. Maji Phetele ka-ndalele kuehela ku kuata Jezú sé ku bhânga. Muéne ua katula o xibhata ia kexile na-iu, iu ua koko o diiala dia kexile bhu mbandu iê. O xibhata ia kuata ku ditui, inga o ditui dia kadilu dia batuka. Maji Jezú ua kuata ku ditui dia diiala iu ua di sake.

Jezú uambela Phetele: ‘Vutuila o xibhata bhu kididi kiê. Ki u fika kuila eme ngi tena ku bhinga kua Tat’ami jimidi ja ji-anju phala ku ngi bhulula?’ Kiene, muéne u tena! Maji Jezú ka bhingile ji-anju kua Nzambi, mukonda muéne ua kijidile kuma, o thembu phala o jinguma jê ku mu kuata ia bhixile kiá. Mukonda dia kiki, muéne uehela ku mu ambata. Ndoko tu tale se ihi ia bhiti ni Jezú.

Matesu 26:36-56; Luka 22:39-53; Nzuá 18:1-12.



Ibhuidisu

  • Kuebhi kuendele Jezú ni jipoxolo jê kia tundile mu sala ia sabhalalu
  • Ihi ia sangele Jezú kioso kia vutuka bhu kididi kia kexile o jipoxolo jê
  • Nanhi ua bokona mu jaludim
  • Mukonda diahi Juda ua bejala Jezú
  • Ihi ia zuela Jezú kua Phetele

Ibhuidisu ia mukua

  • Tanga Matesu 26:36-56.

    Kiebhi o milongi ia Jezú ku maxibulu mê, phangu iambote phala adiakimi a Jikidistá ja lelu ku i kaiela? (Mat. 20:25-28; 26:40, 41; Nga. 5:17; Efe. 4:29, 31, 32)

    Ihi ia banzele Jezú ia lungu ni ku kuata mauta phala ku jibha akuenu? (Mat. 26:52; Luka 6:27, 28; Nzuá 18:36)

  • Tanga Luka 22:39-53.

    Kioso kia moneka o anju kua Jezú mu jaludim ia Ngetesemane phala ku mu kolokotesa, o kuila kiki kiedikisa kuma Jezú uexile mu bhuila mu kixikinu? Jimbulula-kiu. (Luka 22:41-43; Iza. 49:8; Mat. 4:10, 11; Jih. 5:7)

  • Tanga Nzuá 18:1-12.

    Kiebhi kia lange Jezú o maxibulu mê ku jinguma jê, ni ihi tu tena ku dilonga ku phangu íii? (Nzuá 10:11, 12; 18:1, 6-9; Jih. 13:6; Tii. 2:25)