Ku bokona mu madisá

Ku bokona mu madisá

Musoso 83: O Jipalelu Ja Jeluzaleme

Musoso 83: O Jipalelu Ja Jeluzaleme
Akalakadi a mu tunga o jipalelu ja Jeluzaleme

TALA o ikalakalu ia mu bhanga mumu. Idikisa akua Izalaiele a mu kalakala kiavulu mu tunga o jipalelu ja Jeluzaleme. Kioso Sobha Nabukodonozolo kia buikile Jeluzaleme mu 152 ia mivu, muéne ua budile ué o jipalelu iu ua jokotesa o mabhitu a mbanza. Kioso kia tundu akua Izalaiele mu Babilonha ene ka tungile luua o jipalelu.

Xinganeka ngó, kiebhi kia kexile o mundu mu mivu ioso íii, mu kala mu mbanza sé jipalelu? Ene ka kexile kiambote. Mukonda o jinguma jâ a tenene ku a takala sé hele. Maji Nehemiia ua kuatekesa o mundu ku tunga dingi o jipalelu. Eie uejiia se nanhi uexile Nehemiia?

Nehemiia uexile mukuá Izalaiele ua tungile mu mbanza ia Suzana kua tungile Moledekai ni Estere. Nehemiia ua kalakalele mu mbonge ia sobha, kienhiki uexile dikamba dia Moledekai, ni dia mvuale Estere. Maji o Bibidia ki i zuela kuma, Nehemiia ua kalakalele phala muadi ua Estere, Sobha Asuuelu. Muéne ua kalakalele phala o Sobha ia kaiela, Artaxexe.

Lembalala kuma, Artaxexe uexile o sobha iambote, ua bhanene o kitadi kua Ejidala phala ku kiambata mu Jeluzaleme, phala ku iudika o tembulu ia Jihova. Maji Ejidala ka iudika o jipalelu ia mbanza. Ndoko tu tale kiebhi kia bhange Nehemiia o kikalakalu kiki.

Kua bhitile kiá 13 ia mivu, tundé kia bhana Artaxexe o kitadi kua Ejidala phala ku iudika o tembulu. Nehemiia uexile kopelu ia dikota ia Sobha Artaxexe. Uexile mu sidivila vinhu kua sobha, ni ku tala se bhuala muthu ua mesena ku ta venenu. Kiki kiexile kikalakalu kionene.

Kizuua kimoxi, phange ia Nehemiia, Hanani ni maiala a kamúkua a ixi ia Izalaiele, ejile mu menekena Nehemiia. Ene a mu tangela kuila Izalaiele ala ni ibhidi, ni jipalelu ja Jeluzaleme ki luua a ji tunga, kiki kia bhangesa Nehemiia ku luuala kiavulu, iu ua sambe kua Jihova.

Saí kizuua o sobha ua mono kuila, Nehemiia ua luuala iu ua mu ibhula: ‘Mukonda diahi ua luuala?’ Nehemiia ua mu tangela kuma, Jeluzaleme ki iala kiambote, o jipalelu ki luua a ji tunga. ‘O sobha ua mu ibhula’ ihi iu ua mesena?

Nehemiia u uendesa o kikalakalu kia jipalelu

Nehemiia uixi, ‘Ngehele ngiie mu Jeluzaleme,’ ‘ngi tunge dingi o jipalelu.’ Sobha Artaxexe uexile muthu uambote. Muéne uambela Nehemiia kala uia, ua mu kuatekesa, ua mu bhana o mixi phala ku tunga. Kioso Nehemiia kia bhixila mu Jeluzaleme, muéne uambela ku athu oso a mbanza. O kiki kia a uabhela, ni uambe: ‘Ndoko tu mateke o ku tunga.’

Kioso o jinguma ja mono kuila o jipalelu ji banda, ene exi: ‘Ndoko tu a jibhe, ni tu a lembuese o ku tunga.’ Maji Nehemiia kiévu kiki ua bhana ku akalakadi jixibhata ni jisosa. Inga muéne uixi: ‘Kanenu ku kala ni uôma ua jinguma jetu. Bhângelenu phange jenu, an’ê-nu, ni ahatu ni jinzo jenu.’

O mundu ua suínine kiavulu. Ene akexile ni jixibhata mu usuku ni mu muanha, ni a kolokotele mu ku tunga. Ene a zubha ku tunga o jipalelu mu 52 a izuua. Kienhiki, o mundu uakexile kiambote mu mbanza. Nehemiia, ni Ejidala a longo o mundu o itumu ia Nzambi, kienhiki o mundu ua sangulukile.

Maji, o ima ki ia kexile kala ki ia kexile ande dia akua Izalaiele kuia mu Babilonha kála abhika. Ene akexile mu ku a tumina ku sobha ia Pélesa. Maji Jihova ua kanena kuma ua-nda tumikisa sobha iobhe ua-nda bheka paze ku mundu. Nanhi ua-nda kala o sobha íii? Kiebhi kia-nda bheka paze mu ixi? Kua bhitile 450 a mivu ande ia kuijiia dingi maka alungu ni maka iâ. Kienhiki, a vuala-ko mona uonene. Maji iu musoso uéngi.

Nehemiia kibatulu 1-katé 6.



Ibhuidisu

  • Kiebhi kia divuile akua Izalaiele mukonda dia ku kamba o jipalelu mu mbanza ia Jeluzaleme?
  • Nanhi uexile Nehemiia?
  • Nehemiia uakexile ni kikalakalu kiahi, ni mukonda diahi kiexile kia valolo?
  • Njimbu iahi ia luualesa Nehemiia, ni ihi ia bhangele muéne?
  • Kiebhi kiedikisa o Sobha Artaxexe o mbote kua Nehemiia?
  • Ihi ia bhange Nehemiia phala o jinguma ja akua Izalaiele ka a palalesa o kikalakalu kia ku tunga?

Ibhuidisu ia mukua

  • Tanga Nehemiia 1:4-6 ni 2:1-20.

    Kiebhi Nehemiia kia soto o ilongesu ia Jihova? (Neh. 2:4, 5; Lom. 12:12; 1 Phe. 4:7)

  • Tanga Nehemiia 3:3-5.

    Ihi a tena ku dilonga o adiakimi ni madiiakono ia lungu ni akua Tékoua ka difuanganene ni “makota a jingana”? (Neh. 3:5, 27; 2 Tes. 3:7-10; 1 Phe. 5:5)

  • Tanga Nehemiia 4:1-23.

    Ihi ia bhana o nguzu ku akua Izalaiele phala ku kolokota o ku tunga, sumbala akexile ni kizukutisu? (Neh. 4:6, 8, 9; Jisá. 50:15; Iza. 65:13, 14)

    Kiebhi o phangu ia akua Izalaiele i tu suínisa lelu?

  • Tanga Nehemiia 6:15.

    Kiebhi kidikisa o nguzu ia kixikinu, mu ku tunga o jipalelu ja Jeluzaleme sé ku tenesa mbeji jiiadi? (Jisá. 56:3, 4; Mat. 17:20; 19:26)