Ku bokona mu madisá

Ku bokona mu madisá

Musoso 78: O Kisoneku Ku Phalelu

Musoso 78: O Kisoneku Ku Phalelu
O lukuaku lua mu soneka ku phalelu

IHI IA mu bhita bhobha? Athu a mu bhanga fesa ionene. O sobha ia Babilonha uexanene midi ia athu a fuma. Ene a nuina mu jikopho ja ulu ni ja phalata, ni adila mu ji basia ja katuile mu tembulu ia Jihova mu Jeluzaleme. Maji mu kithangana kieniókio bhua moneka milembu ia lukuaku lua muthu lua mu soneka ku phalelu. Athu oso a sasumukine ia kexile ni uôma.

Belxazale ni athu a exana

Belxazale, mulaula a Nabukodonozolo, muéne uexile o sobha. Muéne ua tumine ku ixana o jinjimu jê. O sobha uixi, uoso ua-nda tena ku tanga o kisoneku kiki, ni ku ngi tangela o kijimbuluilu kiê, ‘Nga-nda mu bhana ujitu uavulu, muéne ua-nda kala muthu uonene ua katatu mu utuminu.’ Maji ki bhu kexile njimu imoxi ngó, ia tenene ku tanga o kisoneku ku phalelu ni ku kijimbuluila.

O manh’â sobha, kioso kiévu o jibuia, uéza mu sala ionene. Muéne uambela o sobha, ‘Nga ku dióndo, kana ku kala ni uôma.’ Saí muthu mu utuminu uê, uejiia o jinzambi jikôla. Kioso o kuku’ê, Nabukodonozolo kiexile sobha, muéne ua mu bhangele kabhitangu ka jinjimu joso jê. Dijina diê Daniiele. Tumina ku mu ixana, muéne ua-nda ku tangela o kijimbuluilu kia ima ioso íii.’

Kienhiki, ni lusolo luoso a bheka Daniiele. Sé ku mesena ku tambula o ujitu, Daniiele ua mu tangela mukonda diahi Jihova ua katuile kuku a Belxazale, Nabukodonozolo, ku utuminu kála sobha. Daniiele uixi, ‘Muéne uexile mukuá luímbi uavulu.’ ‘Jihova iu ua mu kaxtikala.’

Daniiele uambela Belxazale, ‘Maji eie,’ ‘uejiia ioso ia bhitile ni muéne, maji eie ua di bhange kála Nabukodonozolo kuku’ê. Eie ua tumina ku bheka o jikopho eie ua nuina-mu, ni jibasia ja tembulu ia Jihova. Eie ua ximana jinzambi jo bhange ni mabaia, ni matadi, maji ku ximane o Mubhangi Uonene. Mukonda dia kiki, Nzambi ua tumina o lukuaku ku soneka o isoneku íii.

‘A ki soneka kiki,’ Daniiele uixi: ‘MENE, MENE, THEKELE, NI PERES.’

‘MENE ijimbulula kuma Nzambi ua kondala o izuua ia utuminu uê, iu ua u zubha. THEKEL ijimbulula kuma eie a ku pezala ku pezu, a ku sange kua tenena. PERES ijimbulula kuma, o utuminu uê a-nda ku u bhana ku akua Midiia, ni ku akua Pélesa.’

Kioso Daniiele kia kexile hanji mu zuela, akua Mediia ni akua Pélesa a mateka ni ita mu Babilonha. Ene a tambula o mbanza, ni a jibha Belxazale. Mu usuku uenió, o kisoneku ku phalelu kia di kumbidila! Maji, ihi ia-nda bhita ni akua Izalaiele? Tua-nda kijiia ku pholo, ndoko tu tale hanji se ihi ia bhiti ni Daniiele.

Daniiele 5:1-31.



Ibhuidisu

  • Ihi ia bhitile kioso o sobha ia Babilonha kia bhangele o fesa ionene ni a nuine mu jikopho, ni adile mu jibasia ja katuile mu tembulu ia Jihova mu Jeluzaleme?
  • Ihi ia zuela Belxazale ku jinjimu jê, maji ihi ene ka tenene ku i bhanga?
  • Ihi o manh’â sobha ia mu ambela ku bhanga?
  • Kála kia zuelele Daniiele kua sobha, mukonda diahi Nzambi ua tumikisa lukuaku phala ku soneka ku phalelu?
  • Kiebhi kia jimbulula Daniiele o dilombuelelu dia kisoneku ku phalelu?
  • Ihi ia bhitile kioso Daniiele kia kexile hanji mu zuela?

Ibhuidisu ia mukua

  • Tanga Daniiele 5:1-31.

    Ihi ki i difuangana ni uôma ua Nzambi, ni uôma uakexile nau Belxazale kia mono o kisoneku ku phalelu. (Dan. 5:6, 7; Jisá. 19:9; Lom. 8:35-39)

    Kiebhi Daniiele kiedikisa o ku suína ni nguzu mu zuela ni Belxazale ni jinguvulu ja utuminu uê? (Dan. 5:17, 18, 22, 26-28; Ikalakalu 4:29)

    Kiebhi o divulu dia Daniiele, kibatulu 5 kibandekesa o utuminu ua Jihova mu ngongo ioso? (Dan. 4:17, 25; 5:21)