Ku bokona mu madisá

Ku bokona mu madisá

Musoso 77: Ene Ka Fukamene

Musoso 77: Ene Ka Fukamene

EIE UA lembalala maka alungu ni mizangala itatu íii? Xe, ene makamba a Daniiele, a ditunine kudia ki kua uabhele phala ene. Akua Babilonha a exana Sadalake, Mizake ni Abede-neko. Maji, kindala ua a tala. Mukonda diahi ene ka fukamena ku kiteka kiemana kála kia mu bhanga athu oso? Ndoko tu tale.

Eie ua lembalala o itumu ia soneka Jihova, a ixana Dikuinhi dia Ijila? O kia dianga kiki: ‘Kana kubheza jinzambi jengi, kala eme ngó.’ O mizangala bhobha a mu belesela o kitumu kiki, kiki kia bhonzele ku ki bhanga.

O sobha ia Babilonha Nabukodonozolo uexana athu avulu a fuma, phala ku bhana kijingu ku kiteka kiemikine. Muéne ua tangela o mundu oso: ‘Kioso ki muivua o mbimbi ia jimbungu ni ia ji alapha ni jifalamenda ja mukuá, kala mu fukama, ni mu bheze o kiteka kiki kia ulu. Uoso u kamba ku fukama ni kubheza, a-nda mu takula mu kijiku kia túbhia tua muzukuta.’

Kioso Nabukodonozolo kiévu kuma, Sadalake, Mizake ni Abede-neko ka fukamene, muéne ua dizangala kiavulu. Ua tumina kua bheka. Muéne ua tumina dingi ku fukamena mu kithangana kieniókio. Maji, o mizangala a dielela kua Jihova. Ene ambela Nabukodonozolo,‘Nzambi i tua mu sidivila u tena ku tu bhulula. ‘Maji né muene ka tu bhulula, etu ki tua-nda fukamena o kiteka kiê kia ulu.’

Sadalake, Mizake, ni Abede-neko

Kioso Nabukodonozolo kiévu kiki, muéne uakexile ni njinda iavulu. Momo mua kexile kijiku kia túbhia, muéne ua tumina: ‘Mu i temesa sambuadi dia veji!’ Kienhiki, muéne ua tumina maiala a nguzu a kifuxi kiê, phala ku kasa Sadalake, Mizake ni Abede-neko, ni kua takula mu kijiku kia túbhia. O kijiku kia túbhia kia temene kiavulu, katé o maiala a nguzu afú ni mulenge. Maji, ihi ia bhitile ni mizangala itatu a a takula momo?

Kioso o sobha kia tale moxi dia kijiku kia túbhia, inga uôma ua mu kuata. Muéne uebhula, ‘Ki tua kase maiala atatu, etu tua a takula mu kijiku kia muzukuta?

O jiselevende ja tambuijila, ‘Kiene muene ki tua bhange.’

Muéne uixi, nga mu mona maiala auana a mu kuenda mu kaxaxi ka túbhia.’ ‘Ene a jituka, ka mu jikata ku túbhia. O ua kauana ua difu kála nzambi.’ O sobha uendele mu jikula o dibhitu kia kijiku dia túbhia, iu ua dikola: ‘Sadalake! Mizake! Abede-neko! Tundenu bhu kanga enu mu jiselevende ia Nzambi Muteni-a-Ioso!’

Kioso kia tundu, athu oso a mono kuma ene ka jikata. Kienhiki o sobha uixi: ‘Ximanenu o Nzambi ia Sadalake, ia Mizake ni Abede-neko! Muéne ua tumikisa o anju iê, iu ua a bhulula, mukonda ene ka fukamena, né kubheza nzambi iéngi, maji o iâ ngó.’

Kiki ki phangu iambote ia kixikinu kua Jihova phala tu i kaiela?

Makatukilu 20:3; Daniiele 3:1-30.



Ibhuidisu

  • Kitumu kiahi o sobha ia Babilonha, Nabukodonozolo, ua bhele ku mundu?
  • Mukonda diahi o makamba atatu a Daniiele ka fukamene ku kiteka kia ulu?
  • Kioso Nabukodonozolo kia bhele o kithangana kia mukuá ku Jihebeleu jitatu phala o ku fukama, kiebhi ene edikisile o kidielelu kiâ, kua Jihova?
  • Ihi ia tumina Nabukodonozolo ku maiala mê ku bhanga kua Sadalake, Mizake ni Abede-neko?
  • Ihi ia mono Nabukodonozolo kioso kia tale moxi dia kijiku kia túbhia?
  • Mukonda diahi o sobha ua ximanene o Nzambi ia Sadalake, Mizake ni Abede-neko, ni phangu iahi ia xisa ene phala etu?

Ibhuidisu ia mukua

  • Tanga Daniiele 3:1-30.

    Ukexilu uahi uedikisa o mizangala itatu ia Jihebeleu, ia tokala ku i kaiela o jiselevende ja Nzambi kioso kia kala ni polova ia ku iuka kua muxima? (Dan. 3:17, 18; Mat. 10:28; Lom. 14:7, 8)

    Disá diahi dionene dia longo Jihova Nzambi kua Nabukodonozolo? (Dan. 3:28, 29; 4:34, 35)