Ku bokona mu madisá

Ku bokona mu madisá

Musoso 44: Lahaba u Sueka Alondi

Musoso 44: Lahaba u Sueka Alondi

OMAIALA iá, ala mu ibhidi. Se ka lenge a-nda fuá. Ene alondi akua Izalaiele, o muhatu ua mu a kuatekesa Lahaba. Lahaba ua tungu ku mulundu ua mbanza ia Jedikó. Ndoko tu tungunune mukonda diahi o maiala iá, ala mu ibhidi.

Kua kambele ngó bhofele phala akua Izalaiele kuzaúka o Ngiji ia Njolodá ni ku bokona mu ixi ia Kanana. Maji ande dia ku bokona, Josuué ua tumu alondi aiadi. Muéne ua ambela: ‘Ndenu mu tale kia kala o ixi, ni mbanza ia Jedikó.’

Lahaba ni alondi aiadi akua Izalaiele

Kioso alondi kia bokona mu Jedikó ene endele kubhata dia Lahaba. Maji saí muthu ua tangela o sobha ia Jedikó: ‘Kuma kiiadi kia akua Izalaiele a bokona mu usuku phala ku londa o ixi.’ O sobha kíevu kiki, ua tumu maiala kubhata dia Lahaba, ene a mu ambela: ‘Tubhula o maiala ala m’onzo iê!’ Maji Lahaba ua suekele o maiala ku thandu dia’nzo. Mu kiki, muéne uambe: ‘Saí maiala ejile kubhata diami, maji ki nga ejiia se akua kuebhi. Ene a tundu kioso kia mateke ku vunda, ande dia ku jika o dibhitu dionene dia mbanza. Se mu lenguluka, mua-nda ku a kuata! Kienhiki, o maiala ai ni lusolo ku dima diâ.

Kioso kia tundu, Lahaba ua bande ni lusolo ku thandu dia’nzo. Muéne uambela alondi, ‘Eme ngejiia kuma Jihova ua-nda mi bhana o ixi íii. ‘Etu tuevu ioso ia bhange muéne kia kukutisa o Kalunga Kakusuka, ni kiebhi ki mua tundu ku Ijitu, ni ki mua jibha jisobha Sihone ni Hoke. Eme nga mi bhange mbote, nga mi dióndo, ngi kanenenu kuma mua-nda ngi bhanga ué mbote. Bhululenu tat’etu ni mam’etu, ni jiphange jami ja mala ni ja ahatu.’

O alondi a kanena ku a bhulula, maji Lahaba ua tokalele ku bhanga kima. O alondi a mu ambela, ‘Kuata o ngoji íii ia kusuka u i kutila mu njanela iê,’ ‘U bhongolola o jindandu jê joso m’onzo iê, ni eie. Kioso tua-nda vutuka mu tambula Jedikó, tua-nda mona o ngoji mu njanela iê, ki tua-nda jibha muthu mu dibhata diê.’ Kienhiki, alondi kia vutuka a tangela Josuué ioso ia bhitilele.

Josuué 2:1-24; Jihebeleu 11:31.



Ibhuidisu

  • Kuebhi kua tungile Lahaba?
  • A nanhi o maiala aiadi mu fikula, ni mukonda diahi ene ala mu Jedikó?
  • Ihi o sobha ia Jedikó ia tumina Lahaba ku bhanga, ni ihi ia tambuijila muéne?
  • Kiebhi Lahaba kia kuatekesa o maiala aiadi, ni ihi ia bhingi muéne?
  • Kikanenu kiahi kia bhangele o alondi aiadi kua Lahaba?

Ibhuidisu ia mukua

  • Tanga Josuué 2:1-24.

    Kiebhi o kikanenu kia Jihova kio soneke mu divulu dia Makatukilu 23:28, ia di kumbidila kioso akua Izalaiele kia bhânge ni akua Jedikó? (Josu. 2:9-11)

  • Tanga Jihebeleu 11:31.

    Kiebhi o phangu ia Lahaba i bandekesa o ku beta-kota kia kixikinu? (Lom. 1:17; Jih. 10:39; Tii. 2:25)