Ku bokona mu madisá

Ku bokona mu madisá

Musoso 36: O Kangombe ka Ulu

Musoso 36: O Kangombe ka Ulu

UÁ, UÁ! Ihi ia mu bhanga o mundu? A mu bheza o kangombe! Mukonda diahi a mu bhanga kiki?

Kioso Mozé kia kexile mu nangena ku mulundu, o mundu uixi: ‘Etu ki tuejiia ihi ia bhiti ni Mozé. Ndoko, tu iudike o nzambi na tu katule mu ixi íii.’

Mozé ua takula bhoxi o matadi a iiadi

Alá phange ia Mozé uixi, ‘Kiene.’ ‘Katulenu o jibixa jenu ja ulu, mu ngi bhekele na-ju.’ Kia ji bheka, Alá ua jizunzumuna iu ua bhange o kangombe ka ulu. Inga o mundu uixi: ‘Íii iene o Nzambi ietu ia tu katula mu Ijitu!’ Kienhiki, a bhange fesa ionene, ni a bhezele o kangombe ka ulu.

Jihova kia mono kiki ua dizangalele kiavulu. Muéne uambela Mozé: ‘Lenguluka, tuluka. O mundu ua mu bhanga kima kiaiibha. Ene a jimbi o itumu iami, ia mu bheza o kangombe ka ulu.’

O mundu ua mu bheza o kangombe ka ulu

Mozé ua tuluka ni lusolo ku mulundu. Kioso kia zukama, íii iene ia mono. O mundu uakexile mu kina ni kuimba bhu mbandu ia kangombe ka ulu! Mozé ua dizangalele kiavulu iu ua takula bhoxi o matadi mua kexile o itumu, ni a budika. Muéne ua kuata o kangombe ka ulu iu ua ka jokotesa mu túbhia. O utokua uê ua u texi.

O mundu ua bhangele kima kiaiibha. Mozé ua tumina maiala ku kuata o jixibhata jâ. Mozé ua ambela, ‘Uoso ua bheza o kangombe ka ulu ua tokala kufuá.’ Kienhiki, o maiala a jibha 3.000 ja athu! Kiki ki idikisa kuma tua tokala ngó ku bheza Jihova, jinzambi jengi kana?

Makatukilu 32:1-35.



Ibhuidisu

  • Mu fikula, ihi ia mu bhanga o mundu, ni mukonda diahi?
  • Mukonda diahi Jihova ua dizangala, ni ihi ia bhangele Mozé kioso kia mono iexile mu bhanga o mundu?
  • Ihi ia tumina Mozé ku maiala a kamúkua ku bhanga?
  • Disá diahi di tu longa o musoso iú?

Ibhuidisu ia mukua

  • Tanga Makatukilu 32:1-35.

    Kiebhi kidikisa o disá didi, o ukexilu ua Jihova ua lungu ni kufunga o ubhezelu ua kidi ni ua makutu? (Mak. 32:4-6, 10; 1 Kol. 10:7, 11)

    Mukonda diahi o Jikidistá a tokala kualuka kioso kia sola o u tonokenu kála ua ku kina mba ua kuimba? (Mak. 32:18, 19; Efe. 5:15, 16; 1 Nzuá 2:15-17)

    Kiebhi kia bhana o diembu dia Levi o phangu iambote ia lungu ni ku zokela o ku iuka? (Mak. 32:25-28; Jisá. 18:25)