Ku bokona mu madisá

Ku bokona mu madisá

Musoso 46: O Ilumbu Ia Jedikó

Musoso 46: O Ilumbu Ia Jedikó

MUKONDA diahi o ilumbu ia Jedikó ia mu lunduka? Iala kala a takula-ko bomba. Maji, mu izuua ienioió ki kua kexile jibomba; né mata. Kiki madiuanu engi a Jihova! Ndoko tu tale kiebhi ki kia bhiti.

O ilumbu ia Jedikó ia mu lundumuka

Jihova uambela Josuué: ‘Eie ni masoladi mê, mu kondoloka o mbanza. Mu kondoloka veji imoxi mu kizuua, katé mu izuua isamanu. Mu ambata o álaka ia kikutu. Sambuadi dia akunji a tokala ku tuamena ku pholo, ni ku xika o jingela jâ.

‘Mu kizuua kia kasambuadi, mu kondoloka o mbanza mu sambuadi dia veji. Mu xika o jingela, en’oso mu dikola ni dízui dia ita. O ilumbu ia-nda lundumuka bhoxi!’

Josuué ni mundu a bhange kala kia tumina Jihova. Mu ku kondoloka, oso a di xibhile. Ki kua kexile muthu uakexile mu zuela. Evu ngó o jibuia ja jingela, ni jibuia ja inama. O jinguma ja mundu ua Nzambi mu Jedikó, akexile ni uôma. Ua mu mona o ngoji ia kusuka io kutile mu njanela? O njanela iná ia nanhi? Kiene, Lahaba ua bhange ia mu tumina alondi aiadi. O muiji uê uoso uakexile nau m’onzo.

Josuué

Mu kusukáko, mu kizuua kia kasambuadi, a kondolokele o mbanza mu sambuadi dia veji, a xiki o jingela, o masoladi a dikola, inga o ilumbu ia lundumuka. Kienhiki, Josuué uixi: ‘Jibhenu athu’oso mu mbanza, ni mu i jokotesa. Jokotesenu ioso. Mu katula ngó o ulu ni phalata ni kóbidi, ni felu, mu iambata mu balaka ia Jihova.’

Josuué uambela alondi iiadi: ‘Ndenu kubhata dia Lahaba tubhulenu o muiji uê uoso, bhu kanga.’ Lahaba ni muiji uê a a bhulula, kala kia mu kanena alondi.

Josuué 6:1-25



Ibhuidisu

  • Ihi Jihova ia tumina o masoladi ni akunji ku bhanga mu izuua isamanu ia muvimba?
  • Ihi ia tokalele ku bhanga o maiala mu kizuua kia kasambuadi?
  • Kála ki ua mu mona mu fikula, ihi ia mu bhita ni ilumbu ia Jedikó?
  • Mukonda diahi a kutila o ngoji ia kusuka mu njanela?
  • Ihi ia tumina Josuué o masoladi ku bhanga ku athu ni ku mbanza, maji ihi ia tokalele ku bhanga ni phalata, ni ulu, ni kóbidi ni felu?
  • Ihi ia tokalele ku bhanga o alondi aiadi?

Ibhuidisu ia mukua

  • Tanga Josuué 6:1-25.

    Kiebhi o ku kondoloka kua akua Izalaiele mu Jedikó mu izuua isamanu kua sokela ni kikalakalu kia kuboka kia Jimbangi ja Jihova mu izuua íii ia sukina? (Josu. 6:15, 16; Iza. 60:22; Mat. 24:14; 1 Kol. 9:16)

    Kiebhi o kikanenu kio soneke mu divulu dia Josuué 6:26, kia di kumbidila mu 500 ja mivu ku pholo? Ihi íii i tu longa ia lungu ni kizuelu kia Jihova? (1 Jis. 16:34; Iza. 55:11)