Ku bokona mu madisá

Ku bokona mu madisá

Musoso 45: Kuzaúka mu Ngiji ia Njolodá

Musoso 45: Kuzaúka mu Ngiji ia Njolodá

TALA! akua Izalaiele a mu zaúka o Ngiji ia Njolodá! Maji o menha ai kuebhi? Mukonda kuene mu noka kiavulu mu thembu íii, o ngiji iezalele kiavulu. Maji kindala, o menha a kukuta! Kienhiki, akua Izalaiele a mu zaúka ku mavu a kukuta kala kia bhangele mu Kalunga Kakusuka! O menha oso ai kuebhi? Ndoko tu tale.

Akua Izalaiele a mu zaúka o Ngiji ia Njolodá.

Kioso kia bhixila o thembu ia akua Izalaiele kuzaúka o Ngiji ia Njolodá, Jihova ua tumina Josuué ku tangela o mundu: ‘O akunji a tokala kuambata o álaka ia kikutu, ni ku tuamena ku pholo ietu. Kioso ki mua-nda tula o inama mu Ngiji ia Njolodá, o menha a-nda kuimana.’

Kienhiki, o akunji a zangula o álaka ia kikutu, inga a itutu ku pholo ia mundu. Kioso kia bhixila mu Njolodá, o akunji a bokona mu kaxaxi ka menha. O ngiji ia zongele kiavulu. Maji kioso kia tula o inama iâ mu menha, o menha emana! Kiki kiexile madiuanu! Jihova uemanesa o menha. Kindala, mu ngiji ki mu kexile dingi menha!

O akunji ambatele o álaka endele katé mu kaxaxi ka Ngiji ia kukuta. U tena ku a mona mu fikula? Kioso kiemanene, akua Izalaiele a zaúka mu Ngiji ia Njolodá ia kukuta!

Kioso o mundu uoso kia zaúka, Jihova ua tumina Josuué ku ambela o 12 kia maiala a nguzu: ‘Ndenu mu kaxaxi ka ngiji muala akunji ni álaka ia kikutu. Mu bonga 12 dia matadi, mu a tula bhuoso bhu mua-nda zeka mu usuku. Kienhiki, ku hádia, an’enu kia-nda mi ibhula, ihi i lombolola o matadi iá, mu a tangela kuma o menha emanene kioso o álaka ia kikutu kia Jihova ia zaúka o Njolodá. O matadi a-nda sidivila phala ku mi lembalala o madiuanu enhá!’ Josuué ua tula 12 dia matadi mu kaxaxi ka ngiji mua kexile akunji.

Josuué

Mu kusukáko, Josuué uambela akunji ambatele o álaka ia kikutu: ‘Tundenu mu Njolodá.’ Kioso kia tundu, o ngiji ia mateka kuizala dingi.

Josuué 3:1-17; 4:1-18.



Ibhuidisu

  • Madiuanu ahi a bhange Jihova phala akua Izalaiele kuzaúka mu Ngiji ia Njolodá?
  • Kima kiahi kia kixikinu kia tokalele ku bhanga akua Izalaiele phala kuzaúka o Ngiji ia Njolodá?
  • Mukonda diahi Jihova ua tumina Mozé ku bonga 12 ia matadi onene mu kaxaxi ka ngiji?
  • Ihi ia bhitile kioso akunji kia tundu mu kaxaxi ka Njolodá?

Ibhuidisu ia mukua

  • Tanga Josuué 3:1-17.

    Kala kiedikisa o musoso iu, ihi i tua tokala ku bhanga phala ku tambula o kikuatekesu ni mabesá a Jihova? (Josu. 3:13, 15; Jisa. 3:5; Tii. 2:22, 26)

    Kiebhi kiexile o Ngiji ia Njolodá kioso akua Izalaiele kia zaúka phala ku bokona mu Ixi ia Kikanenu? Kiebhi kiki kia bhana kijingu ku dijina dia Jihova? (Josu. 3:15; 4:18; Jisá. 66:5-7)

  • Tanga Josuué 4:1-18.

    O 12 kia matadi a katula mu Njolodá ni a emika ku Jidingale, a sidivila phala’hi? (Josu. 4:4-7)