Ku bokona mu madisá

Ku bokona mu madisá

Musoso 16: Izake ua Sange Muhatu ua Mbote

Musoso 16: Izake ua Sange Muhatu ua Mbote

EIE uejiia nanhi o kilumba mu fikula? Dijina diê Bebeka. O diiala dia múia ku mu sanga, Izake. Muéne ua-nda kala muhatu’ê. Kiebhi ki kia bhiti?

Kia bhiti kuma tat’â Izake, Mbalahamu, ua mesenene muhatu uambote phala mon’ê. Muéne ka mesenene kuila Izake u kazala ni muhatu mukuá Kanana, mukonda athu iâ akexile mu bheza jinzambi ja makutu. Kienhiki Mbalahamu uexana selevende iê, iú ua mu ambela: ‘Nga-ndala uia ku jindandu jami mu Halane, ni u takane-ko muhatu phala mona’mi Izake.’

Ni lusolo o selevende ia Mbalahamu ua katula dikuinhi dia jikamelu iu uendele njila ia dikanga. Kioso kia zukama ku jindandu ja Mbalahamu, muéne uemanene bhu mbandu ia fixi. Kiexile ngoloxi kiá, ola ia ahatu ia mbanza kuíza ku teka o menha. Kienhiki, o selevende ia Mbalahamu ua sambe kua Jihova: ‘Bhanga kuila o muhatu ua-nda ngi bhana o menha ni ku jikamelu, u kala muéne ua mu solo phala ku kala muhatu ua Izake.’

Bebeka u di sanga ni Izake

Mu ku bhita kithangana, Bebeka uéza ku teka o menha. O selevende kia mu bhingi o menha, muéne ua xikana. Muéne ua katuile menha avulu phala o jikamelu joso jinue. Kiexile kikalakalu kiavulu, mukonda o jikamelu jinua menha avulu.

Kioso Bebeka kia zubha ku bhanga kiki, o selevende ia Mbalahamu ua mu ibhula o dijina dia tat’ê. Ua mu ibhula ué se kuala kididi kubhata diâ, phala ku bhita-mu usuku. Muéne ua tambuijila: ‘Tata’mi Betuuele, kuala kididi phala eie ku bhita usuku n’etu.’ O selevende ia Mbalahamu uejidile kuma Betuuele mona a phange a Mbalahamu, Naholo. Muéne ua fukama iú ua sambe, ua sakidila Jihova mu ku mu endesa katé ku jindandu ja Mbalahamu.

Mu usuku uenió, o selevende ia Mbalahamu ua tangela Betuuele ni phange ia Bebeka Labanu mukonda diahi uendele kuenhoko. Ene a xikana kuila Bebeka aie ni selevende ia Mbalahamu phala ku kazala ni Izake. Kiebhi kia tambuijila Bebeka kioso kia mu ibhula? Muéne uixi, ‘Kiene’ nga-ndala kuia. Mu kizuua kia kamúkua, ene a habe ku jikamelu ni a mateka o njila ia ku vutuka mu Kanana.

A bhixila mu ngoloxi. Bebeka ua mono diiala dia mu kuenda mu mukáu. Uexile Izake. Muéne ua sangulukile mu ku mona Bebeka. Kua bhitile ngó mivu itatu tundé kia fuile manh’â, Sala, muéne uakexile hanji ni dilamba dia manh’â. Kienhiki, Izake ua zolele kiavulu Bebeka, iu ua sangulukile dingi.

Dimatekenu 24:1-67.



Ibhuidisu

  • Nanhi o diiala ni muhatu mu fikula?
  • Ihi ia bhange Mbalahamu phala ku kuata muhatu phala mon’ê, ni mukonda diahi?
  • Kiebhi kia tambuijila o musambu ua selevende ia Mbalahamu?
  • Kiebhi kia tambuijila Bebeka kioso kia mu ibhula se ua mesena ku kazala ni Izake?
  • Ihi ia bhangesa Izake ku sanguluka dingi?

Ibhuidisu ia mukua

  • Tanga Dimatekenu 24:1-67.

    Ukexilu uahi uedikisa Bebeka kioso kia sange o selevende ia Mbalahamu bhu fixi? (Dim. 24:17-20; Jisa . 31:17, 31)

    O ia bhange Mbalahamu phala mon’ê Izake i bhana phangu iahi ku Jikidistá ja lelu? (Dim. 24:37, 38; 1 Kol. 7:39; 2 Kol. 6:14)

    Mukonda diahi tua tokala ku sota thembu phala ku xinganeka, kala kia kexile mu bhanga Izake? (Dim. 24:63; Jisá. 77:12; Fil. 4:8)