Ku bokona mu madisá

Ku bokona mu madisá

Musoso 11: O Hongolo ia Dianga

Musoso 11: O Hongolo ia Dianga

EIE uejiia se kima kiahi kia dianga ku bhanga Noué, ni muiji uê kioso kia tubhuka bhu kanga dia álaka? Muéne ua bhana sata, mba ujitu kua Nzambi. Kála ki ua mu mona mu fikula. Noué ua bhanene sata ia ibhaku phala ku sakidila Nzambi, mukonda dia ku bhulula o muiji uê ku dilúvio.

O álaka ni hongolo

O kuila Jihova, o sata ia mu uabhela? Kiene, ia mu uabhela. Mukonda dia kiki, muéne ua kanena Noué kuma ka-nda buika dingi o mundu ni dilúvio.

Kua bhiti kithangana, o ixi ioso ia kukuta, Noué ni muiji uê a mateka o muenhu uobhe bhu kanga dia álaka. Nzambi ua a zediuisa, iu ua zuela: ‘Kalenu ni an’â avulu. Mu dimendale, phala o ixi izale ni athu.’

Maji kioso athu kia-nda kuívua maka alungu ni dilúvio dionene, a-nda kala ni uôma, a-nda banza kuma o dilúvio dia-nda kuíze dingi. Kienhiki, Nzambi ua bhele kijimbuete phala ku a lembalala o kikanenu kiê, kuma nuka dingi ua-nda bheka dilúvio mu ixi. Eie uejiia se kijimbuete kiahi kia a bhele phala ku a lembalala? O hongolo.

Noué ni muiji uê

Saí bhabha, o hongolo i moneka ku diulu kioso ki batuka o nvula, ni ki jikuka o muanha. O hongolo iala ni jikolo javulu jauabha. Ua monene kia imoxi? Ua mu i mona mu fikula?

Nzambi ua zuela kiki: ‘Eme ngi kanena kuma nuka dingi nga-nda buika athu mba iama ni dilúvio. Nga-nda tula o hongolo iami ku matuta. Kioso ki moneka o hongolo, nga-nda i mona, nga-nda lembalala o kikanenu kiami.’

Kienhiki, ki u mona o hongolo u lembalala ihi? Kiene, o kikanenu kia Nzambi, kuma nuka dingi ua-nda buika o mundu ni dilúvio.

Dimatekenu 8:18-22; 9:9-17.



Ibhuidisu

  • Kála kiedikisa o fikula, ihi ia bhange Noué kioso kia tubhuka mu álaka?
  • Kitumu kiahi kia bhanene Nzambi kua Noué ni muiji uê, kioso kia bhiti o Dilúvio?
  • Kikanenu kiahi kia bhanene Nzambi?
  • Kioso ki tu mona o hongolo, ihi i tu lembalala?

Ibhuidisu ia mukua

  • Tanga Dimatekenu 8:18-22.

    Kiebhi ki tu tena ku bhana “dizumba dia mbote” kua Jihova? (Dim. 8:21; Jih. 13:15, 16)

    Ihi iambele Jihova ia lungu ni ukexilu ua muxima ua muthu, ni kiebhi ki tua tokala ku di langa? (Dim. 8:21; Mat. 15:18, 19)

  • Tanga Dimatekenu 9:9-17.

    Kikutu kiahi kia bhangele Jihova ni ibhangelu iê mu ixi? (Dim. 9:10, 11)

    Thembu ikuxi ia-nda bhanga o kikutu kia hongolo? (Dim. 9:16)