Ku bokona mu madisá

Ku bokona mu madisá

Musoso 33: Kuzaúka mu Kalunga Kakusuka

Musoso 33: Kuzaúka mu Kalunga Kakusuka

TALA ia mu bhita! Iú Mozé ni mbangala iê, ia sununa mu Kalunga Kakusuka. Muéne uala ni akua Izalaiele a bhuluka. Maji Falaó ni kifuxi kiê a bhobha mu kalunga. Ndoko tu tale kiebhi ki kia bhiti.

O masoladi akua Ijitu a mu bhobha

Kala ki tua dilongo Falaó ua tumina akua Izalaiele ku xisa Ijitu kioso kia bhekele Nzambi o 10 dia mabhebhu ku akua Ijitu. A tundu mu Ijitu, 600.000 ja maiala akua Izalaiele ni ahatu ni an’a-ndenge. Kua tundu ué athu avulu a kamúkua a xikanene Jihova, endele ni akua Izalaiele. En’oso ambatele jimbudi ni jikamelu ni jihombo jâ joso.

Ande dia ku tunda, akua Izalaiele a bhingile izuatu, ni ima ia ulu, ni phalata ku akua Ijitu. Akua Ijitu akexile ni uôma uavulu, mukonda dia dibhebhu dia sukina-ku. Kiki-phe ene a bhanene ku akua Izalaiele ima ioso ia bhingile.

Kia bhiti izuua, akua Izalaiele a bhixila mu Kalunga Kakusuka. Bhenhobho ene a nhohele. Mu kithangana kieniókio, Falaó ni maiala mê a mateka ku diela mu kueha akua Izalaiele ku tunda. Ene exi, ‘Tu’ehela abhika etu kuia!’

Kienhiki, Falaó ua bhilula dingi o ndunge iê. Muéne ni lusolo luoso, ua iudika o dikalu diê, ni kifuxi kiê. Muéne ua kaiela akua Izalaiele ni 600 ja makalu a fuamena, ni makalu a kamúkua a Ijitu.

Kioso akua Izalaiele kia mono Falaó ni masoladi mê a mu kuíza, ene akexile ni uôma uavulu. Ene ka kexile ni njila phala ku lenga. O Kalunga Kakusuka ka kexile ku pholo iâ, ku dima diâ, akua Ijitu akexile mu kuíza. Maji Jihova ua tele dituta mu kaxaxi ka akua Izalaiele ni akua Ijitu. Kienhiki, a akua Ijitu ka tenene ku mona a kua Izalaiele phala ku a kuata.

Kienhiki, Jihova ua tumina Mozé ku sununa o mbangala iê mu Kalunga Kakusuka. Kioso kia ki bhange, Jihova ua bhangesa mulenge ku bhusila. O menha a kalunga a diuanuna mu mbandu jiiadi ni emanene.

Kienhiki, akua Izalaiele a zaúka o kalunga mu mavu a kukuta. Kia suku-ko kua bhitile thembu iavulu phala jimidi ja athu ku bhuluka ni ibhaku iâ ioso mu kalunga. Mu kusukáko, akua Ijitu a tenene dingi ku mona akua Izalaiele. Abhika akexile mu lenga! Ene a bokona-phe mu kalunga ku dima diâ.

Kioso kia bhange kiki Nzambi ua sokomona o malola a makalu mâ. Akua Ijitu akexile ni uôma uavulu, ni a dikola: ‘Jihova ua mu bhangela akua Izalaiele. Ndoko tu lenge’nu!’ Maji kiexile kiá tádidi.

Kienhiki, Jihova ua tumina Mozé ku beta ni mbangala iê ku Kalunga Kakusuka, kála ki ua mu mona mu fikula. Kioso Mozé kia bhange kiki o menha a lundumuka, ni a xiti akua Ijitu ni makalu mâ. Kienhiki, o masoladi akexile mu kaiela akua Izalaiele, a bokona mu kaxaxi ka kalunga. Né ngó mukuá Ijitu ua subhuka ni muenhu!

O mundu ua Nzambi ua sangulukile mu ku bhuluka! O maiala embile mu ku sakidila Jihova, exi: ‘Jihova ua nganhala kijingu kia kikoué. Muéne ua takula o jikabalu ni maiala mê mu kalunga.’ Midiiana phange ia Mozé ua kuata kangoma ka manzuela, ahatu a mukuá a mu kaiela. Ene a kini ni ku sanguluka kuoso, embile o muimbu uakexile mu kuimba o maiala: ‘Jihova ua nganhala kijingu kia kikoué. Muéne ua takula o jikabalu ni maiala mu kalunga.’

Makatukilu kibatulu 12 katé 15.



Ibhuidisu

  • Maiala akuxi ni ahatu ni ana-ndenge a tundu mu Ijitu, ni a nanhi ué endele nau?
  • Kiebhi kia divuile Falaó, kioso kiehela akua Izalaiele ku tunda, ni ihi ia bhangele muéne?
  • Ihi ia bhange Jihova phala ku fidisa akua Ijitu ku kuata o mundu uê?
  • Ihi ia bhitile kioso Mozé kia sununa o mbangala iê, ku Kalunga Kakusuka, ni ihi ia bhangele akua Izalaiele?
  • Ihi ia bhitile kioso akua Ijitu kia bokona mu kalunga mu ku kaiela akua Izalaiele?
  • Ihi ia bhangele akua Izalaiele phala kuidikisa kuma a sangulukile, ni kisakidilu kia Jihova mu ku a bhulula?

Ibhuidisu ia mukua

  • Tanga Makatukilu 12:33-36.

    Ihi ia bhangele Jihova phala o mundu uê ku tambula kisakidilu ku mivu ioso ia bhitile mu ubhika mu Ijitu? (Mak. 3:21, 22; 12:35, 36)

  • Tanga Makatukilu 14:1-31.

    Kiebhi o izuelu ia Mozé mu divulu dia Makatukilu 14:13, 14, i fikila o Jihova a mu kingila o ita ia Alumajedone? (2 Mal. 20:17; jiselevende ja Jisá. 91:8)

  • Tanga Makatukilu 15:1-8, 20, 21.

    Mukonda diahi o jiselevende ja Jihova, a tokala ku mu imbila kiximanu? (Mak. 15:1, 2; Jisá. 105:2, 3; Dij. 15:3, 4)

    Phangu iahi ia ku ximana Jihova ia xisa Midiiana ni ahatu bhu Kalunga Kakusuka phala ahatu Jikidistá ja lelu? (Mak. 15:20, 21; Jisá. 68:11)