Ku bokona mu madisá

Ku bokona mu madisá

Musoso 3: O Diiala Dia Dianga ni Muhatu

Musoso 3: O Diiala Dia Dianga ni Muhatu

IHI ki i difu mu fikula? Muala athu. O diiala dia dianga ni muhatu. Nanhi ua a bhange? Nzambi. Uejiia o dijina diê? Dijina diê Jihova. O diiala ni muhatu a exanene Adá ni Eva.

Adá ni Eva mu jaludim ia Edene

Kienhiki, kiene Jihova Nzambi kia bhangele Adá. Ua katula mavu iu ua bhange mukutu ua iuka ua diiala. Kienhiki, muéne ua bhusila mu mazulu a diiala, Adá uéza ku muenhu.

Jihova Nzambi uakexile ni kikalakalu phala Adá. Ua tumina Adá ku luka majina ku iama ioso. Manhi se Adá ua bhitile thembu iavulu mu ku tala o iama, phala kua bhana majina ambote. Kioso Adá kia kexile mu luka o majina ku iama, muéne ua mono kima. Uejiia se ihi?

Iama ioso ia kexile ni ndumbe ni mukaji. Kua kexile tata ni mama ia jinzamba, ni tata ni mama ia jihoji. Maji Adá ka kexile ni muthu ua difuile nê. Kienhiki, Jihova ua bhangesa Adá kuia ku kilu kionene iu ua mu katula mbânji imoxi. O mbânji íii, Jihova ua bhange na-iu muhatu phala Adá, muéne ua kituka muhatu uê.

Adá ua sangulukile! Eva ué ua sangulukile mu ku kala mu jaludim ia uabha! Kienhiki eji vuala ana, ni eji kala kumoxi ni ku sanguluka.

Jihova ua mesenene kuila Adá ni Eva eji kala ni muenhu katé ku hádia. Ua mesene ué, kuila a bhilula o ixi ioso mu jaludim ia uabha kála o jaludim ia Edene. Adá ni Eva a sangulukile mu ku xinganeka ku bhanga ioso íii! Eie ua mesena ku kuatekesa mu ku bhilula o ixi ioso mu jaludim ia uabha? Maji o ku sanguluka kua Adá ni Eva ki kuendele dikanga. Tu tale mukonda diahi.

Jisálamu 83:18; Dimatekenu 1:26-31; 2:7-25.



Ibhuidisu

  • Ihi ki i difu mu fikula ia Musoso ua 3 ni mu fikula ia Musoso ua 2?
  • Nanhi ua bhange o diiala dia dianga, ni dijina diebhi dia mu luku?
  • Kikalakalu kiahi kia bhele Nzambi kua Adá?
  • Mukonda diahi Nzambi ua bhangesa Adá kuia ku kilu kionene?
  • Mu thembu ikuxi ia tokalele Adá ni Eva ku kala ni muenhu, ni kikalakalu kiahi kia a bhele Jihova?

Ibhuidisu ia mukua

  • Tanga Jisálamu 83:18.

    Diebhi o dijina dia Nzambi, ni kididi kiahi kia mu fuama? (Jel.16:21; Dim. 4:17)

  • Tanga Dimatekenu 1:26-31.

    Ihi ia bhangele Nzambi mu kizuua kia kasamanu, ni kiebhi o kibhangelu kiki ki kia difuile ni iama? (Dim. 1:26)

    Ihi ia bhana Jihova phala o diiala ni iama kudia? (Dim. 1:30)

  • Tanga Dimatekenu 2:7-25.

    O kikalakalu kia Adá kia ku luka majina ku iama, kia bhingile dingi ihi? (Dim. 2:19

    Kiebhi o divulu dia Dimatekenu 2:24, di tena ku tu kuatekesa mu kuijiia ihi i banza Jihova ia lungu ni ukaza, ni ku di xisa, ni ku di senga? (Mat. 19:4-6, 9)