Ku bokona mu madisá

Ku bokona mu madisá

Musoso 1: Nzambi ua Mateka ku Bhanga o Ima

Musoso 1: Nzambi ua Mateka ku Bhanga o Ima

IMA ioso iambote i tuala na-iu ia tundu kua Nzambi. Muéne ua bhange o muanha phala ku bhana o mukengeji mu kizuua, ni dieji, ni jithéthembua, phala o mukengeji mu usuku. Katé ué Nzambi ua bhange o ixi phala tu kale-mu

Maji o muanha ni dieji ni jithéthembua ni ixi, ki iexile o ima ia dianga ku bhanga Nzambi. Uejiia se ima iahi ia dianga ku bhanga? Nzambi ua dianga ku bhanga athu kála muéne. Etu ki tu tena ku a mona, kála ki tu tena ku mona Nzambi. Mu Bibidia, athu iâ a exana ji-anju. Nzambi ua bhange o ji-anju phala ku kala nê ku diulu.

O anju ia dianga ku bhanga Nzambi iexile ia kazola. Uexile Mona ua dianga ua Nzambi, ua kalakalele ni Tat’ê. Muéne ua kuatekesele Nzambi mu ku bhanga ima ioso ia kamúkua. Ua kuatekesele ué Nzambi mu ku bhanga o muanha, o dieji, o jithéthembua, ni ixi ietu.

Kiebhi-phe kiexile o ixi ietu? Mu dimatekenu, kana muthu ua tenene ku kala mu ixi. Ki mua kexile kima, mua kexile ngó kalunga konene mu ixi ioso. Maji, Nzambi ua mesene kuila athu a kala mu ixi. Kienhiki, muéne ua mateka ku iudika ima phala etu. Ihi ia bhange?

Mu dianga, o ixi ia bhingile mukengeji. Kienhiki, Nzambi ua bhange mukengeji ua muanha phala ku muika o ixi. Muéne ua bhange kiki phala ku kale muanha ni usuku. Nzambi ua bhange o mavu ku thandu a menha a kalunga.

Ku dimatekenu, ki mua kexile kima mu ixi. Kála kidikisa o fikula. Ki mua kexile ithulu, mba mixi, né iama. Ki mua kexile ué mbiji mu kalunga. Nzambi uakexile hanji ni kikalakalu kiavulu kia ku iudika o ixi kiambote phala o iama ni athu ku kala-mu.

Jelemiia 10:12; Kolose 1:15-17; Dimatekenu 1:1-10.

Ixi ia Hatu


Ibhuidisu

  • O ima ioso iambote ia tundu kuebhi? Tanga kima kimoxi.
  • Kima kiahi kia dianga ku bhanga Nzambi?
  • Mukonda diahi o anju ia dianga iexile ia kazola?
  • Zuela kiebhi kiexile o ixi ku dimatekenu. (Tala o fikula.)
  • Kiebhi kia mateka Nzambi ku iudika o ixi phala o iama ni athu?

Ibhuidisu ia mukua

  • Tanga Jelemiia 10:12.

    Idifua iahi ia Nzambi i tu mona mu ibhangelu iê? (Iza.40:26; Lom. 11:33)

  • Tanga Kolose 1:15-17.

    Ki kuatekesu kiahi kia bhele Jezú mu kibhangelu, ni kiebhi kiki ki tu kuatekesa ku muijiia? (Kol. 1:15-17)

  • Tanga Dimatekenu 1:1-10.

    Kiebhi kia tukuluka o ixi? (Dim. 1:1)

    Ihi ia bhiti mu kizuua kia dianga kia kibhangelu? (Dim. 1:3-5)

    Zuela ihi ia bhiti mu kizuua kia kaiadi kia kibhangelu. (Dim. 1:7, 8)