Ku bokona mu madisá

Ku bokona mu madisá

 DISÁ 43

O Kituxi Kia Sobha Davidi

O Kituxi Kia Sobha Davidi

Kioso Saulu kiafu, Davidi ua kituka sobha. Muéne ua kexile ni 30 a mivu. Mu kubhita mivu, tundé kia kituka sobha, saí kizuua mu usuku, muene uexile ku thandu’a inzu iê, iu ua mono muhatu ua uabha. Muéne ua soto kuijiia o dijina diê, diexile Bate-Seba, muéne ua kazelele kiá ni disoladi a mu ixana Udiia. Davidi uexana Bate-Seba mu inzu iê. Davidi ua zekele-nê, mu kiki Bate-Seba uemita. Davidi ua mesenene kusueka o kituxi kia tele. Muéne ua tumina kabhitangu kê phala kuta Udiia kupholo dia ita, phala ku mu xa ubheka. Kioso Udiia kiafu mu ita, Davidi ua kazala ni Bate-Seba.

Maji Jihova ua mono o ima ioso iaiibha ia bhiti. Ihi ieji bhanga? Jihova ua tumikisa polofeta Natane kua Davidi. Natane ua mu tangela uixi: ‘Saí diiala mvuama ua kexile ni jimbudi javulu, maji o mukuá uexile ngadiama, uexile ngó ni kamona kamoxi ka mbudi, muéne ua ka zolele kiavulu. O mvuama ua katula o kambudi ka ngadiama.’ Davidi ua futuka anga uambe: ‘O mvuama íii ua tokala kufua!’ Natane anga uambela Davidi: ‘O mvuama iú, éie-muene!’ Davidi anga ua luualele kiavulu, muéne uambela Natane: ‘Nga te kituxi kua Jihova.’ O kituxi kiki kia bhekela maka avulu kua Davidi ni muiji uê. Jihova ua kaxtikala Davidi, maji ua muehela kukala ni muenhu, mukonda uexile muthu uambote, ua lenduka.

Davidi ua mesenene kutunga o tembulu phala Jihova, maji Jihova ua solo o mon’â Davidi, Solomá, phala kutunga o tembulu. Davidi ua mateka kubhongolola o ima ia tokala phala  Solomá kutunga, iú uambe: ‘O tembulu ia Jihova ia tokala kubhenha. Solomá muéne munzangala hanji, maji nga-nda mu kuatekesa mu kubhongolola ima ia tokala phala muéne.’ Davidi ua bhanene kitadi kiavulu phala o sidivisu ia kutunga. Muéne ua solo akalakadi exile jihete. Muéne ua bhongolola ulu ni phalata, ua kexile ué ni jisédulu jo katule mu jixi ja Tilu ni Sidone. Ande dia kufua, Davidi ua bhanene mikanda kua Solomá ia lungu ni kutunga o tembulu. Muéne uambe: ‘Jihova ua soneka o ima íii phala eie. Jihova ua-nda ku kukuatekesa. Ku kale ni uoma. Kala u kindanda, u kalakale.’

“Muthu uoso u vunga o ikuma iê, katena kubhanduluka; maji muthu uoso-phe ikuma iê u i fisala, anga u i ambula, ió hinu a mu kuatela henda.”—Jisabhu 28:13