Ku bokona mu madisá

Ku bokona mu madisá

 DISÁ 30

Lahaba ua Sueka o Alondi

Lahaba ua Sueka o Alondi

Kioso o alondi akua Izalaiele kiai mu mbanza ia Jedikó, ene a bokona mu dibhata dia muhatu a mu ixanene Lahaba. O sobha ia Jedikó mu kuijiia o maka enhá, ua tumikisa masoladi aiiadi mu dibhata dia Lahaba. Muene ua sueka o alondi aiiadi ku thandu dia inzo, iu ua tangela o masoladi akua Jedikó ku ila njila iéngi. Muene uambela alondi: ‘Nga-nda mi kuatekesa, mukonda ngejiia kuila, Jihova uala bhu kaxi kenu ni kuila, mua-nda tolola o mbanza íii. Nga mi dióndo, ngi lokelienu kuila, mua-nda tu bhulula ni muiji uami.’

O alondi ambela Lahaba: ‘Tu ku kanena kuila, sé-ku muthu mu kaxi kenu ua-nda fua.’ Ene ambe dingi: ‘Kutila o lungoji lua kusuka mu njanela iê, o muiji uê ua-nda bhuluka.’

Lahaba ua tangela o alondi phala kutulukila mu njanela bhu kaxi ka mukolo. Ene ai katé ku mulundu a di sueka-ku izuua itatu anga a vutuka kua Josuué. Mu kubhita kithangana, o akua Izalaiele a zauka o Ngiji ia Njolodá, a kexile ue polondo phala kutambula o ixi. Ene a diangela kutolola o mbanza ia Jedikó. Jihova ua a tangela  kunhunga veji imoxi o mbanza mu samanu dia izuua. Mu kizuua kia sambuadi, ene a nhungu o mbanza sambuadi dia jiveji. Anga o akunji a xiki o jimbungu, ia a dikola ni dízui dia suina. O ilumbu ia mbanza ia bu bhoxi! Maji o inzu ia Lahaba iexile ku mulundu, ki i buile. Lahaba ni muiji uê a bhuluka, mukonda a dielele kua Jihova.

“Manhi ki kiene ue kia bhitile ni Lahaba dia kidianzunga, kioso kia tambululula o ilolo ia Jijudé ku dibhata diê, iú ua i sulula njila iengi? Muène-phe ua bongele ujitu kua Nzambi mukonda dia ima iê ia bhangele.”​—Tiiaku 2:25