Ku bokona mu madisá

Ku bokona mu madisá

 DISÁ 23

A Kanena Kubelesela Jihova

A Kanena Kubelesela Jihova

Kioso akua Izalaiele kia tundu mu Ijitu, mu kubhita mbeji jiiadi, ene a bhixila ku Mulundu ua Sinai ia a tungu kuenhoko. Jihova uexana Mozé phala kubanda ku Mulundu anga ua muambela, uixi: ‘Nga bhulula akua Izalaiele. Se ene a belesela o itumu iami, ene a-nda kituka mundu uami uosole.’ Mozé ua tuluka iu ua tangela akua Izalaiele ioso ia zuelele Jihova. Kiebhi kia tambuijila o mundu? Ene a tambuijila, exi: ‘Ioso ia tange Jihova iene muene i tu bhanga.’

Mozé ua bande dingi ku mulundu. Kuenhoko, Jihova uambe: ‘Nga-nda zuela n’eie mu izuua itatu. Tangela o mundu phala ka bande ku Mulundu ua Sinai.’ Mozé ua tuluka iú ua tangela o mundu phala ku disokejeka n’evu o izuelu ia Jihova.

Mu kubhita izuua itatu, akua Izalaiele a mono jinzaji ni dituta dia kitombe dia kexile ku thandu’a mulundu. Ene evu kinuminu kia dikota, ni mbimbi ia jikoloneta. Jihova anga ua tuluka ku mulundu mu’axaxi ka túbhia. Akua Izalaiele akexile mu teketa ni uôma. Mulundu uoso ua kexile mu tunguta ni kusuina kuoso, anga uizala ni dixi. O mbimbi ia koloneta ia mateka kudibandekesa kiavulu kithangana ni kithangana. Nzambi uambe: ‘Eme ngi Jihova. Enu ki mu tokala kubheza jinzambi jengi.’

Mozé ua tuluka ku mulundu, Jihova ua mu bhana itumu phala o mundu n’ejiie kiebhi kia tokalale ku Mu bheza ni kuenda. Mozé ua soneka o itumu iu ua tangela akua Izalaiele. Ene a kanena: ‘Tua-nda bhanga ioso ia tu bhingi Jihova.’ Ene a kanene kubelesela Nzambi. Maji o kuila a kumbidile o kikanenu kiâ?

“Zola Ngana, Nzambi iê, ni muxima ué uoso, ni muenhu ué uoso, ni kilunji kié kioso.”​—Matesu 22:37