Ku bokona mu madisá

Ku bokona mu madisá

 DISÁ 18

O Kisasa Kia Uama Túbhia

O Kisasa Kia Uama Túbhia

Mozé ua tungu mu ixi ia Midiiana mu 40 a mivu. Ua kazala iu ua vuala ana. Sai kizuua, kioso kia kexile mu kuinga o jimbudi jê bhua zukamene ku Mulundu ua Sinai, muene ua mono kima, nuka ua ki muene. Kisasa kia kexile mu kaxi ka túbhia ki kia kexile mu jokota kana! Kioso Mozé kia zukama phala kutala kiambote, muene uévu dízui dia kexile mu tunda m’oxi a kisasa, diambe: ‘Mozé! Kana kuzukama bhabha. Zula o jiihai jé mukonda uemana mu kididi kikôla.’ Jihova muene ua kexile mu zuela bhu kaxi ka anju.

Mozé uôma ua mu kuata, iu ua xiti o pholo iê. O dízui diambe: ‘Ngene mu mona o hadi iene mu tala akua Izalaiele. Nga-nda ku a bhulula bhu maku ma akua Ijitu ni kua ambata mu ixi iambote. Eie nga ku solo phala kukatula o mundu uami m’oxi ia Ijitu.’ Mozé ua sasumuka kiavulu mu kuívua o kizuelu kiki.

Mozé uebhula: ‘Se o mundu u ng’ibhula nanhi ua ngi tumu, nga-nda zuela kiebhi?’ Nzambi ua mu vutuila: ‘U a tangela kuila Jihova, o Nzambi ia Mbalahamu, Nzambi ia Izake ni Nzambi ia Jakobo muéne ua ngi tumina ko kuenu.’ Mozé uambe dingi: ‘Ihi i nga-nda bhanga se né kiki mundu ka ng’ivu?’ Jihova ua bhana polova kua Mozé kuila Muene ueji mu kuatekesa. Muene ua bhingi Mozé phala kutakula o mbangala iê bhoxi. O mbangala ia kituka nhoka! Kioso Mozé kia kuata o nhoka ku mukila, o nhoka ia kituka dingi mbangala. Jihova uambe: ‘Ki ua-nda bhanga o madiuanu enhá, mundu ua-nda kuijiia kuila eme nga ku tumu.’

Mozé uambe: ‘Ki ngejiia kuzuela.’ Jihova ua mu tangela: ‘Nga-nda ku tangela o ima i ua-nda zuela, ua-ndaia ni phang’ié Alá phala ku ku kuatekesa.’ Mu kuijiia kuila Jihova ua kexile ku mbandu iê phala ku mu kuatekesa, Mozé uambata muhatu’ê ni ana iu ua vutuka mu ixi ia Ijitu.

“Enu-phe, kuila a mi kutu, ki mu kale ni hele kioso ki mu zuela, mba hundu ioso i mu kuata, mukonda bhu kumbi dienhódio, Nzambi kiene kia kà mi bhana kioso ki mu zuela.”​—Matesu 10:19