Ku bokona mu madisá

Ku bokona mu madisá

 DISÁ 19

O Mabhebhu Atatu a Dianga

O Mabhebhu Atatu a Dianga

Akua Izalaiele a a jijidika kukalakala kiavulu kala abhika. Jihova ua tumikisa Mozé ni Alá phala kutula o njimbu íii kua Falaó: ‘Eha mundu uami phala aie mu kikangalakata ku ngi bheza.’ Falaó ua dizangeleka dingi, uixi: ‘Jihova ki ngi muijiia, o kia mukuá dingi, ki nga-nda kueha o mundu ua Izalaiele o kuia.’ Mu kiki, Falaó ua jijidika dingi o mundu kukalakala kiavulu. Jihova ueji longa disá kua Falaó. Uejiia ihi ia bhange Jihova? Muene ua bheka Dikuinhi dia Mabhebhu mu ixi ia Ijitu. Jihova ua tangela Mozé: ‘Falaó ka mu ng’ívua. Mungu mu kamene, muene ua-nda kala mu Ngiji ia Nilu. Ndé kua muene, u mu tangela kuila kuma muene ua ditunu kueha o mundu kuia, o menha oso a Nilu a-nda bhiluka manhinga.’ Mozé ua belesela iu uai kua Falaó. Falaó ua kexile mu tala kioso Alá kia kexile mu beta o menha a ngiji ia Nilu ni mbangala iê, o menha oso a bhiluka manhinga. O ngiji ia mateka kunuha kiaiibha, jimbiji joso jafu, ki mu kexile menha a zele phala kua núa mu ngiji ia Nilu. Né muene kiki, Falaó ua ditunu kueha o mundu ua Izalaiele.

 Mu kubhita sambuadi dia izuua, Jihova ua tumikisa dingi Mozé phala kutula kua Falaó o njimbu íii: ‘Se u dituna kueha o mundu uami, Ijitu ioso ia-nda kuizala ni mazote.’ Alá ua zangula o mbangala iê, ixi ioso ia mateka kuizala ni mazote. Athu a sangele mazote avulu mu jinzo jâ, ku thandu dia jihama ni mu jimbia. Mu ididi ioso mua kexile mazote! Falaó ua bhingi Mozé kudionda kua Jihova phala kukatula o mazote enhó. Falaó ua kanena kuila ueji kueha kiá o mundu ua Izalaiele. Mu kiki, Jihova ua bhuisa o dibhebhu, akua Ijitu a mateka kubhongolola mu kididi kimoxi o mazote oso a fuile. Ixi ioso ia mateka kunuha kiaiibha. Maji lua mukuá dingi, Falaó kehela o mundu kuia.

Jihova anga u tangela Mozé: ‘Alá ua tokala kubeta o mavu ni mbangala iê, o fufutila ia-nda di bhanga jina.’ Bhenhobho, mu ididi ioso mua kexile jina javulu. Amoxi ku mundu ua Falaó, ambela Falaó: ‘Dibhebhu didi dia tundu kua Nzambi.’ Maji, né muene kiki, Falaó kehela o mundu ua Izalaiele o kuia.

“Nga-nda ku a ejidisa muene, kiki kia nga-nda kua ejidisa o lukuaku luami ni kutena kuami, anga a kejiia kuamba dijina diami eme Jihova.”​—Jelemiia 16:21