Ku bokona mu madisá

Ku bokona mu madisá

 DISÁ 103

“Utuminu ué Uize”

“Utuminu ué Uize”

Jihova ua kanena: ‘Ki kua-nda kala dingi kudila, ndolo, mauhaxi mba kufua. Nga-nda kua kondona o masoxi mâ moso. Ima ioso iaiibha ia bhiti kiá, ka-nda i lembalala dingi.’

Jihova ua te Adá ni Eva mu jaludim ia Edene phala kutunga-mu ni kutululuka ni kuzediua. Ene a tokalele kubheza Tat’â ia diulu ni kuizalesa o ixi ni tuana tuâ. Adá ni Eva a bhukumukine Jihova, maji o vondadi iê ki i lunguluka. Mu divulu didi tua mono kuila, ima ioso i kanena Nzambi i di kumbidila. O Utuminu Uê ua-nda bheka mabesá avulu mu ixi, kála kia kanene kua Mbalahamu.

Kua kambe ngó bhofele, Satanaji ni madimonho mê, ni athu aiibha a-nda buika. Mundu uoso mu ngongo ua-nda bheza ngó Jihova. Ki tua-nda kata dingi né ngó kufua. Mukonda dia kiki, izuua ioso tua-nda balumuka ni nguzu ioso ni kusanguluka kua kukala ku muenhu. Ixi ioso ia-nda kituka palaízu. Athu oso a-nda kala ni kudia kuambote ni jinzo jambote. Mu veji dia kukala akua njinda  mba akua usuéia, athu oso a-nda kala akua henda. O iama ia muxitu ki ia-nda kala ni uôma ua athu, etu ue ki tua-nda kala ni uôma uâ.

Kioso Jihova kia-nda mateka kufukununa athu afu, kia-nda kala kithangana kia kusanguluka. Tua-nda sangesa o athu a xahulu, kála Abele, Noué, Mbalahamu, Sala, Mozé, Lute, Estere ni Davidi. Ene a-nda kalakala kumoxi n’etu mu kukitula o Ixi palaízu. Kua-nda kala ikalakalu iavulu iambote phala ku i bhanga.

Jihova ua mesena kuila eie u kala-mu. Kiki kia-nda ku kuatekesa ku muijiia kiambote. Tundé lelu katé ku hádia tu suínienu phala tu zukame dingi kua Jihova!

“Eie u Ngana ietu, Nzambi ietu! Kia ku fuama o kutambula fuma ni ujitu, ni unéne. Mukonda é’Muène ua bhanga ioso, o vondadi ié iene ia i bhangesa kuiza-ku, íi ia di bhange, íi iala-ku.”—Dijingunuinu 4:11