Ku bokona mu madisá

Ku bokona mu madisá

 DISÁ 98

O Ulongelu ua Jikidistá u di Muanga mu Jixi Javulu

O Ulongelu ua Jikidistá u di Muanga mu Jixi Javulu

O jipoxolo ja belesela o kitumu kia Jezú kia kutula o njimbu iambote mu jixi joso. Ku muvu ua 47 K.K., o jiphange mu mbanza ia Andiioka a tumikisine Phaulu ni Barbabé mu kikalakalu kia ukunji. Ni kusuina kuoso kiiadi kiâ a bokele mu Ázia Menor mu mbanza ia Derbe, Listra ni Ikônio.

Phaulu ni Barnabé akexile mu bokela athu oso, jimvuama, jingadiama, minzangala ni adiakimi. Athu avulu a xikina o kidi kia lungu ni Kristu. Kioso Phaulu ni Barnabé kia bokele o nguvulu ia Xipele, Serju Phaulu, kuexile nganga mba muloji ua mesenene kua fidisa. Phaulu ua tangela o nganga uixi: ‘Lukuaku lua Jihova lua ku tula.’ Mu kithangana kienhiókio, o nganga ua kituka kafofo. Mu kumona o maka enhá, o Nguvulu Phaulu ua kituka kidistá.

Phaulu ni Barnabé a boko mu ididi ioso, nzo ni inzo, mu itanda, mu ikoka ni mu malombe. Kioso kia sakele kinema mu mbanza ia Listra, o mundu ua muene o madiuanu enhó a banzele kuila ene exile jinzambi, mu kienhiki a mesenene kua bheza. Maji Phaulu ni Barnabé a a fidisa, anga ambe exi: ‘Bhezienu ngó Nzambi! Etu uetu tuala tu athu ni akuenu.’ Mu kienhiki, sai Jijudé a bhixila anga a bhangesa o mundu kulungulukila Phaulu. O mundu ua buba Phaulu ni mátadi, a mu koko katé ku mukau kuma a fika uafu. Maji Phaulu ka fuile! Ni lusolo luoso, o jiphange ai phala ku mu kuatekesa anga a mu ambata dingi mu mbanza. Mu kubhita kithangana, Phaulu ua vutuka mu mbanza ia Andiioka.

Ku muvu ua 49 K.K., Phaulu uendele mu jimbanza ja mukuá. Kioso kia vutuka phala kumona o jiphange mu kibatu kia Ázia Menor, muene ua tula o njimbu iambote mu jixi ja makanga mu kibatu kia Europa.  Muene uai mu jimbanza kala Atena, Efezo, Filipe, Tesalonika, ni mu ididi ia mukuá. Sila, Luka ni munzangala a mu ixana Timote ai kumoxi ni Phaulu. Ene a kalakalele kumoxi mu kujikula ilunga ni ku i kuatekesa kukula mu nzumbi. Phaulu ua xala mu mbanza ia Kolindo muvu umoxi ni kaxaxi mu kukuatekesa o jiphange. Muene ua boko, ua longo, ua sonekene ue mikanda phala kukuatekesa o ilunga. Muene ua kexile ni kikalakalu kia kutunga jibalaka. Mu kubhita kithangana, Phaulu ua vutuka mu mbanza ia Andiioka.

Ku muvu ua 52 K.K., Phaulu uendele o njila ia katatu, mu kumateka mu kibatu kia Ázia Menor. Muene uendele ku thunda mu mbanza ia Filipe anga u kulumuka mu mbanza ia Kolindo. Phaulu ua bhiti mivu iavulu mu mbanza ia Efezo mu kulonga, kusaka, ni kukuatekesa o kilunga. Izuua ioso muene ua kexile ue mu bhanga madiskursu mu kithádi kia xikola. Athu avulu a kexile mu muívua, mukonda dia kiki a lungulula ukexilu uâ. Mu kusuka-ku, kioso kia bokele o njimbu iambote mu jixi javulu, Phaulu uai mu mbanza ia Jeluzaleme.

“Enu-phe ndenu, mua ka longe jixibulu ku akua jixi joso.”—Matesu 28:19