Ku bokona mu madisá

Ku bokona mu madisá

 DISÁ 94

O Maxibulu a Tambula Nzumbi Ikola

O Maxibulu a Tambula Nzumbi Ikola

Mu kubhita kuinhi dia izuua kioso kia vutuka Jezú ku diulu, o maxibulu mê a tambula o nzumbi ikola. O kima kiki, kia bhiti ku Pendekoxi ia muvu ua 33 K.K. Ku muvu uenhó, athu a jixi javulu ejile mu Jeluzaleme, phala kubhanga o fesa íii. Kuexile 120 a maxibulu a Jezú ndenge, a diongekele mu inzo ia thandu. O kia tukumuka, kua moneka kima kia madiuanu. Ku mituê ia maxibulu, kua moneka kima kia difu ni mulengu ua túbhia, anga a mateka kuzuela mu madimi avulu. Mu inzo mua kexile, ene evu kinuminu, kala kia kitembu kia suina.

O athu akua jixi jengi ejile mu Jeluzaleme, evu o kinuminu, anga a lengela mu inzo, phala kumona se ihi ia kexile mu bhita. Kioso kia mono o maxibulu kuzuela mu madimi mâ, ene a diuana. Ene a zuela: ‘Maji o athu iá, akua Ngalileia. Kiebhi kia mu zuela mu madimi metu a uvualukilu?’

Mu kusuluka, Phetele ni jipoxolo ja mukuá, emana bhu pholo dia mundu. Phetele ua a jimbuluila kiebhi kia jibhile Jezú, ni  kiebhi kia mu fukunuine kua Jihova. Phetele uambe: ‘Kindala Jezú uala ku diulu, ku madilu ma Nzambi, muene ua lundulula o nzumbi ikôla ia kanene. Kiene-phe ki mua mono, ni kuívua o ima íii ia madiuanu.’

O athu a diuana kiavulu ni ima ia zuela Phetele. Mukonda dia kiki, ene ebhula: “Akuetu, etu tu bhanga-phe kiebhi?” Muene ua tambuijila: ‘Diele-nu ituxi ienu, n’a mi batizale mu dijina dia Jezú. Mua-nda tambula ue o ujitu ua nzumbi ikôla.’ O athu a di batizala mu kizuua kieniókio, a tena 3.000. Tundé o kizuua kieniókio, o maxibulu mu Jeluzaleme ai ni ku dibandekesa ni lusolo luoso. Ni kikuatekesu kia nzumbi ikola, o jipoxolo a sokejeka dingi ilunga ia mukuá, phala kulonga o maxibulu, o ima ioso ia tumine Jezú.

“Se u fisala ni dikanu dié kuma Jezú muene Ngana, anga u xikana mu muxima ué kuma Nzambi ua mu fukununa mu’alunga, eie u bhuluka.”—Loma 10:9