Ku bokona mu madisá

Ku bokona mu madisá

 DISÁ 90

Jezú Ufua mu Ngolongota

Jezú Ufua mu Ngolongota

O akunji a makota ambata Jezú ku mbonge ia nguvulu. Pilatu ua a ebhuidisa, uixi: ‘O diiala didi mua mu tatela ihi?’ Ene ambe: ‘Ua mu zuela kuila muene sobha!’ Pilatu uebhuidisa Jezú, uixi: “Eie u Sobha ia Jijudé?” Jezú ua mu tambuijila, uixi: “Eme o usobha uami, ki ua mu ngongo mumu.”

Mu kusuluka, Pilatu ua tumikisa Jezú kua Helode, o sobha ia Ngalileia, phala kumona se u mu sanga ni kikuma phala ku mu fundisa. Helode ka mono kima kua Jezú. Mukonda dia kiki, ua mu tumikisa dingi kua Pilatu. Mu kusuluka, Pilatu ua tangela o mundu, uixi: ‘Kikale eme, kikale Helode, ki tua sange kikuma mu ima ioso i mua mu tatela. Nga-nda mueha n’aie.’ O mundu ua dikola, uixi: ‘Mu jibhienu! Mu jibhienu!’ O masoladi a kuata Jezú, a mu beta ni jixikote, a mu phamena mathe, a mu bhana ji home. Ene a mu te kitundu kia minha ku mutué, anga a mu xonguena, exi: ‘Tana-ku! Eie u sobha ia Jijudé!’ Pilatu uambela dingi o mundu, uixi: ‘Eme ki ngi sange kikuma mu ima ioso i mua mu tatela.’ Maji ene a dikola exi: ‘Mu te ku taka!’ Mu kusuka-ku, Pilatu ua a bhana Jezú phala ku mu jibha.

Ene ambata Jezú mu kididi a kixana Ngolongota, a mu phaphela ku taka, anga a i zangula. Jezú ua sambe: ‘Tata, athu iá a loloke. Mukonda kejiia kia mu bhanga.’ O athu a xonguena Jezú, mu kuzuela: ‘O ki kala-phe u Mon’â Nzambi, tuluka ku taka! Di bhulule.’

Sai kifumbe a mu phaphela ku mbandu iê, uambe: “Ngi lembalale, hádia ki uiza ku Usobha mu Utuminu ué.” Jezú ua mu kanena, uixi: ‘Ua ka kala ni eme mu Palaízu.’ Mu ngoloxi, o ixi ioso anga i kala mua vundu mu ola jitatu. Sai maxibulu, emanene bhu mbandu a taka. Katé muene ni Madiia, manh’â Jezú, bhene bhua kexile. Jezú ua bhingi kua Nzuá, phala kulanga Madiia, kala manh’ê.

Mu kusukáku, Jezú uambe: “Kuabhu! Ioso iòtenese kiá!” Muene ua bheteka o mútue, muenhu anga u batuka. Mu kithangana kieniókio, o ixi ia tunguta. Kibatulu kia Tembulu, ki uana o Kididi  Kikôla, ni Kididi Kikôla Kinene, anga ki tanduka mu’axaxe. Sai kabhitangu ka masoladi, uambe: ‘Muthu iú ua kexi Mon’a Nzambi.’

“Ikanenu ia Nzambi i vula kinéne, kua muene kua kala kiene.”—2 Kolindo 1:20