Ku bokona mu madisá

Ku bokona mu madisá

 DISÁ 88

Jezú a mu kuta

Jezú a mu kuta

Jezú ni jipoxolo, ende tundé ku Kahonga ka Kidelone katé ku Mulundu ua Midiva. Kua bhitile kiá ku makolombolo, kua kexile dieji. Kioso kia bhixila ku jaludim ia Ngetesemane, Jezú ua a ambela uixi: ‘Xalenu bhabha, dilangie-nu.’ Mu kusuluka, Jezú uai ku mbandu iéngi ia jaludim, anga ua fukama. Kuma muene ua luualele, ua sambe kua Jihova: ‘O ima i bhite kála ki ua mesena eie.’ Kienhiki, Jihova ua tumikisa anju imoxi phala kusuinisa Jezú. Kioso Jezú kia vutuka kua kexile o jipoxolo, ua sange kitatu kiâ a zeka. Muene uambe: ‘Balumukenu! Íii ki ola ia kuzeka! O ola ia ku ngi sumbisa ku jinguma jami ia bhixila.’

Mu kubhita tu ithangana, Juda ua bhixila ni kifuxi kia masoladi kia dibhakata ni jixibhata ni jimbangala. Muene uejidile kuebhi kueji sanga Jezú, mukonda ene akexile muia mu jaludim ienióio luavulu. Juda uambela o masoladi kuila, ueji ku a kuatekesa kutungula Jezú. Muene ua zukama kua Jezú, iú uambe: “Mesene, nga ku menekena,” anga u mu bhana nzobole. Jezú uambe: ‘Juda ua mu ngi sumbisa ni nzobole?’

Jezú uemana kupholo iâ, anga uebhula o mundu: ‘Mua mu sota nanhi?’ Ene ambe: ‘Jezú mukua Nazalé.’ Muene ua tambuijila: “Eme’ú,” o maiala a sondoloka bhofele, anga a dibhale. Jezú uebhuidisa dingi o mundu: ‘Mua mu sota nanhi?’ Ene a tambuijila dingi: ‘Jezú dia Nazalé.’ Jezú ua tambuijila: ‘Nga mi tangela kiá kuila, eme. Ehelenu o maiala iá kuia.’

Kioso Phetele kia mono kiki, ua sunga o xibhata, ua batula o dítui dia Máluku, o mubhika ua mukunji ua dikota. Maji Jezú ua kuata ku dítui dia diiala anga ua mu sake. Mu kiki, muene uambela Phetele: ‘Bhaka o xibhata ié. Se u  bhânga ni xibhata ua-nda fua ue ni xibhata.’ O masoladi a kuata Jezú, a mu kutu, o jipoxolo ja lenge. Mu kusuluka, o mundu ua muambata kua Hana o mukunji ua kexile kupholo. Hana ua fundisa Jezú, anga ua mu tumikisa kubhata dia Mukunji ua Dikota Kaiafa. Maji ihi-phe ia bhiti ni jipoxolo?

“Mu ngong’umu mua-ndu kala ni hadi, maji kuatenu-phe muanu, ngongo iíi eme nga i tolola kiá.”—Nzuá 16:33