Ku bokona mu madisá

Ku bokona mu madisá

 DISÁ 2

Nzambi ua Bhange o Diiala ni Muhatu ua Dianga

Nzambi ua Bhange o Diiala ni Muhatu ua Dianga

Jihova ua kunu o díbhia bhu kididi a kixana Edene. O díbhia didi diexile kididi kia iuka kiezalele ni iama, mixi ni ithulu. Nzambi anga u bhanga o diiala dia dianga Adá, ni mavu anga u mu bhusila mu mazulu o mûha ua muenhu . Uejiia se ihi ia bhiti? Muthu anga u kala ni muenhu! Jihova ua bhana kua Adá o kikalakalu kia kulanga o jaludim, ua mu bhana ue o kikalakalu kia kubhana o majina ku iama ioso.

Jihova anga u tendelesa Adá uixi: ‘Ku ibundu ioso ia mixi u dié-ku kioso ki ua mesena, maji sai muxi umoxi ua katunda. Ku kibundu kiê, kana kudia-ku, o kizuua ki ua ka dia-ku ua-nda fua.’

Mu kubhita thembu Jihova uixi: ‘Nga-nda bhanga mukuatekexi phala Adá.’ Muene anga u bhangesa Adá kuia ku kilu kia zongo, Nzambi anga u katula lumbânji lumoxi kua Adá anga u bhanga na-lu o muhatu u mu bhana kua Adá. O dijina diê Eva. Adá ni Eva  ene exile o muiji ua dianga mu ixi. Kiebhi kia divu Adá mu kutambula muhatu uê? Adá ua sangulukile kiavulu. Anga u zuela uixi: ‘Tala ia bhange Jihova ni lumbânji luami! Uaué! Sai muthu ua difuangana n’eme.’

Jihova uambela Adá ni Eva kuila vualenu tuana ni mu izalese o ixi. Muéne ua mesenene kuila a kalakala kumoxi ni kusanguluka phala kuizalesa o ixi ioso, ni ku i bhanga palaízu kala kiexile o jaludim ia Edene. Maji o kikanenu kiki, ki ki dikumbidila. Mukonda diahi? Tu mone mu kibatulu ku pholo.

‘Ió uoso ua a bhanga mu dimatekenu, ua a bhanga diiala ni muhatu.’​—Matesu 19:4