TANGA o jurnale ioso-ioso. Tala mu mutelembe ua izunzumbia, mba uivua njimbu mu mutelembe ua ifofo. Ua-nda kuívua misoso iavulu ia lungu ni usuéia, ita ni ijibhangânga! Xinganeka mu ibhidi iê. Nange o uhaxi mba o kufuá kua muthu u ua zolo u ku bhekela malamba. Nange eie u divua kála Jobe diiala diambote uambele, ‘ngezala ni malamba.’—Jobe 10:15.

Dibhule mudiê:

• O kuila íii iene ia mesenene Nzambi phala eme ni athu uoso?

• Kuebhi ku ngi tena ku sanga o kikuatekesu phala o ibhidi iami?

• O kuila saí kizuua tua-nda kala ni kutululuka mu ixi?

O Bibidia itambuijila o ibhuidisu íii.

“Muène u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.”—Dijingunuinu 21:4

“Inema ia kà tuka-tuka, kala jimbambi.”—Izaia 35:6

“O mesu a ifofo a kà jikuka.”—Izaia 35:5

 “Oso ala mu jimbila ni . . . kutunda-mu.”—Nzuá 5:28, 29

“Ki bhua kà kala mukua-bhata . . . uila: ‘Nga kata.’”—Izaia 33:24

“Mu ngongo mu kale nzungule ia masa katé ni ku thandu dia milundu.”—Jisálamu 72:16

Kana ku dituna ioso i tua tange ku dima, kála ima sé valolo. Nzambi ua kanena ku bhanga o ima íii, o Bibidia i tu tangela kiebhi muéne kia-nda bhanga kiki.

Maji o Bibidia ki izuela ngó maka enhá. Iene i bhana o ndunge phala eie ku kala ni muenhu ua uabha lelu. Xinganeka hanji mu ibhindamu iê, ni mu ibhidi iê. Nange ia lungu ni uadiama, maka ku muiji, kukata mba kufuá kua muthu u tua zolo. O Bibidia i tena ku u kuatekesa mu bhânga ni ibhidi lelu, ni ku u bhana o itambuijilu iá kála íii:

• Mukonda diahi tuene mu tala hadi?

• Kiebhi ki tu tena ku bhânga ni ibhindamu ku muenhu?

• Kiebhi ki tu tena ku zediuisa o muiji uetu?

• Ihi i bhita n’etu ku’alunga?

• O kuila saí kizuua tua-nda mona dingi o jindandu jetu, ni makamba mê-tu ai ku’alunga?

• Kiebhi ki tu tena ku kala ni kixikinu, kuma Nzambi ua-nda kumbidila o ikanenu iê?

 O ku tanga o divulu didi, idikisa kuma eie ua mesena kuijiia ihi i longa o Bibidia. O divulu didi dia-nda ku kuatekesa. Tala kuma, ku disukilu dia dífue, kuala o ibhuidisu ia lungu ni jimbandu. Jimidi ja athu a mu di longa o Bibidia ni Jimbangi ja Jihova, a zolo o ilongesu íii ia ibhuidisu ni itambuijilu. Tua kingila kuma eie ué ki ku uabhela. Tambula o mabesá a Nzambi, ni u kale ni kisangusangu kioso ki ua mu di longa, mu kidi ihi i longa o Bibidia!