Zakadiya 4:1-14

  • Kisumwa kya katanu: Ditudilu dya tundeya ni mixi iyadi ya midiva (1-14)

    • ‘Kimunguzu ya athu, maji mukutena kwa nzumbi yami’ (6)

    • Kana kusebhulula o kizuwa kya dimatekenu dya ima yofele (10)

4  O anju yazwelele n’eme yavutuka dingi, ya ngiphaphumuna kala o muthu kya mubalumuna ku kilu. 2  Kyenyiki, mwene wa ngibhwidisa: “Ihi i wa mumona?” Eme nga mutambwijila: “ Nga mumona ditudilu dya tundeya, dyene dyoso dya ulu, ku thandu kwala ditijela. O ditudilu dyala ni sambwadi dya tundeya, kyene, sambwadi. O ku thandu dya tundeya kwala sambwadi dya tumbungu. 3  Ku mbandu ya ditudilu dya tundeya, kwala mixi iyadi ya midiva. Muxi umoxi wala ku mbandu ya kadilu, o wamukwa wala ku mbandu ya kyasu.” 4  Bhenyobho ngebhwidisa o anju yakexile muzwela n’eme, ngixi: “Ngana yami, o ima yiyi ilombolola ihi?” 5  O anju yexile muzwela n’eme ya ngitambwijila: “Eye kwijiya se o ima yiyi ilombolola ihi?” Eme ngambe: “Kana ngana yami.” 6  Mwene wa ngambela, wixi: “Yiyi yene o njimbu ya Jihova kwa Nzolobabele: Jihova dya ifuxi wambe kiki: ‘“O ima yiyi yanda bhita, kimunguzu ya athu, maji mukutena kwa nzumbi yami.” 7  Eye nanyi u mulundu wadikota? Eye wanda sengumuka bhu pholo ya Nzolobabele. Mwene wanda bheka o ditadi dyabeta-kota dya tembulu, o mundu wanda dikola: “Kwala o kuwabhé! Kwala o kuwabhé!”’” 8  Jihova wa ngambela dingi, wixi: 9  “Nzolobabele mwéne wate o kaboko ka inzo yiyi, mwéne we wanda zubha ku itunga. Enu mwanda kwijiya kwila Jihova dya ifuxi, mwéne wa ngitumikisa kokwenu. 10  Nanyi wasebhulula o kizuwa kya dimatekenu dya ima yofele? Mukonda ene anda sanguluka mu kumona o ditadi bhu maku a Nzolobabele. O sambwadi dya mesu, alombolola o mesu a Jihova atonginina o ngongo yoso.” 11  Kyenyiki, nga mwibhwidisa: “O mixi iyadi ya midiva yala ku mbandu ya kadilu ni ku mbandu ya kyasu ya ditudilu dya tundeya, ilombolola ihi?” 12  Nga mwibhwidisa dingi: “Ihi ilombolola o jithangu* jiyadi ja muxi wa mudiva mwamutunda o máji, ala ni kolo ya ulu a mu kunguluka bhukaxi ka jimbungu ja ulu?” 13  Bhenyobho, mwene wa ngibhwidisa: “Eye kwijiya se o ima yiyi ilombolola ihi?” Eme nga mutambwijila: “Kana ngana yami.” 14  Mwene wa ngambela: “O mixi yiyi, ya mulombolola o mayala ayadi emana bhu mbandu ya Ngana, wavu o ngongo yoso.”

Footnotes

^ Kifwa, o jithangu ja muxi jezala ni ibundu.

Copyrights for this publication