Malakiya 3:1-18

  • O Ngana wanda kwiza muzelesa o tembulu yê (1-5)

    • O mukunji wa kikutu (1)

  • Kiswinisu phala kuvutuka kwa Jihova (6-12)

    • Jihova kalunguluka (6)

    • “Vutukenu kokwami, eme nganda vutuka kokwenu” (7)

    • ‘Bhekenu o madijimu, Jihova wanda mibhana mabesá’ (10)

  • O muthu wayuka ni muthu wayibha (13-18)

    • Asoneka o majina mu divulu dya kulembalala (16)

    • Kutungula o muthu wayuka ni muthu wayibha (18)

3  “Talesenu! Nganda tumikisa o mukunji wami, mwene wanda yudika* o njila ku pholo yami. Mwanda tukumuka kwila, o Ngana, yó mwa mu mukinga, weza mu tembulu yê. O mukunji wa kikutu mwa mu mukinga ni hanji yoso, wanda kwiza.” Jihova dya ifuxi wambe: “Mwene wanda kwiza mwene.” 2  Kyenyiki-phe, nanyi wanda kolokota kyoso mwene kyanda kwiza? Nanyi wanda tena kwimana kyoso mwene kyanda tukuluka? Mukonda mwene wanda difwangana ni túbhya tuyukisa o felu ni nzabá izelesa o izwatu. 3  Mwene wanda xikama kala kixikama o mukwa kuzunza ni kuzelesa o phalata, phala kuzelesa o an’a Levi ni ku ayukisa, kala kya yukisa o ulu ni phalata. Ene anda kituka athu ayuka, abhakula jisata kwa Jihova. 4  Kyenyiki-phe, Jihova wanda sanguluka dingi ni jisata ja akwa Judá ni ja akwa Jeluzaleme, kala kyexile mubhita m’ukulu. 5  Jihova dya ifuxi wambe kiki: “Eme nganda kwiza mufundisa yó kene mu ngixila, kifwa, o aloji, o akwa kuta jiphanda, yó aloka mu kingoho, yó anyana o kitadi kya akalakadi’â, kya atudi ni kya an’a itungu.* Nganda fundisa we yó adituna kukwatekesa akwa jixi jengi.” 6  “Mukonda, eme ngi Jihova, ki ngilunguluka kana. Enu mu an’a Jakobo, kyene kyakambela ku mibwika hanji. 7  Tunde mu izuwa ya jikuku jenu, enu mwene mu bhukumukina o itumu yami, ki mwene mu ibelesela. Vutukenu kokwami, eme nganda vutuka kokwenu.” Kyene kyambe Jihova dya ifuxi. Maji-phe, enu mwebhula: “Kyebhi kitwanda vutuka kokwé?” 8  “Manyi o muthu utena kunyana Nzambi? Maji enu mwa mu nginyana mwene.” Enu mwibhula: “Twa mu kunyana kyebhi?” “Mwa mu nginyana mu kukamba ku ngibhana o madijimu* ni maujitu. 9  Nganda mikastikala mukonda enu mwa mu nginyana. O kifuxi kyoso kya mu nginyana. 10  Bhekenu o madijimu mu inzo yami, phala mu inzo yami mukale kudya. Jihova dya ifuxi wambe: “Ngamidyondo, ngilolyenu mu kima kiki ni mumone se kinganda jikula o mabhitu a dyulu ni ngi milundulwile mabesá avulu phala kikumikambe kima.” 11  “Nganda bhwisa o dibhebhu,* dyene kidyanda zanga dingi o idima ya mabhya menu. O mabhya menu a mividi anda kwima.” Kyene kyambe Jihova dya ifuxi. 12  “O ifuxi yoso yanda zwela kwila, enu mwazediwa, mukonda o ixi yenu yanda kala ixi yambote.” Kiki kyene kyambe Jihova dya ifuxi. 13  Jihova wambe kiki: “Enu mwa mu ngizwela kyayibha.” Maji enu mwa mu kwibhula: “Ihi i twazwela ya kuyibhila?” 14  Enu mwene muzwela: “O kusidivila Nzambi hadi yahatu ngo! Mbote yahi itumona mu kubhanga o ikalakalu yé? Mbote yahi itumona mu kuluwala mukonda dya ituxi itwate bhu pholo ya Jihova dya ifuxi? 15  O kiki-phe, twamono kwila o akwa kudizangeleka abeta-kota mu kuzediwa. O yó abhanga ima yayibha, ala ni mwenyu wambote. Ene alokalala Nzambi, maji ka abhange kima.’” 16  Mukiki, o yó exile ni wôma wa Jihova, exile mudizwelesa mudyâ. Kala muthu wexile muzwela ni mukwâ. Jihova wexile mu abhana mátwi ni kwivwa yoso yexile muzwela. O yó exile ni wôma wa Jihova ni yó exile muxila* o dijina dyê, mwene watumina kusoneka o majina mâ mu divulu phala ku alembalala. 17  Jihova dya ifuxi wambe: “Mu kizuwa ki nganda ku asola kala mundu wami,* ene anda ngitokala. Nganda ku akwatela henda kala o tata kyakwatela henda kwa mon’ê u mutumaka. 18  Bhenyobho, mwanda tena dingi kumona se nanyi o muthu wambote ni nanyi o muthu wayibha. Mwanda tena kumona we se nanyi usidivila Nzambi ni yó ka musidivila Nzambi.”

Footnotes

^ Mba, “jikula.”
^ Mba, “o ana kala dingi ni tata.”
^ Mba, “mu jimbandu ja kakwinyi.”
^ Nange dya mulombolola o dibhebhu dya mahoho.
^ Mba nange, “exile muxinganeka.”
^ Mba, “makembu ami.”

Copyrights for this publication