Jisabhu 31:1-31
31 Izwelu ya sobha Lemuwele. O itendelesu yambote ya mubhana manya phala ku mulonga:
2 Mon’ami ihi i nganda kutangela?Ihi i nganda kutangela éye u mona watundu mu vumu dyami?Ihi i nganda kutangela éye u mona u ngabhingi kwa Nzambi?*
3 Kana kudibotesa o nguzu yé ni ahatu,Kana kukayela o jinjila jibwikisa o jisobha.
4 Lemuwele tata! Kikima kyambote o jisobha kunwa vinyu,Kikima kyambote, kana,Kikima kyambote o jinguvulu kuzwela, exi: “O uholwa wami wala kwebhi?”
5 Phala kikibhite kwila, anwa, ajimba o kitumu,Anga adituna kubatula ni kuyuka o milonga ya yó atate.
6 Uholwa u ubhana kwa yó a mufwa kya,Bhana o vinyu kwa yó ala ni kikote ku muxima.
7 Phala anwe n’a jimbi o wadyama wâ,Phala ene kabanze dingi mu hadi yâ.
8 Jikula o dikanu dyé phala kuzokela o dibubu,Zokela yó a mufwa kya.
9 U azwelela bhu kididi kyâ ni ubatule o milonga ni kuyuka,Zokela o jingadyama ni yó atate.
א [álefe]
10 Nanyi utena kusanga muhatu wambote?
Mwene wabetakota mu kukala ni valolo, tumatadi twafwama* ndenge.
ב [bete]
11 O mwadi wê u mudyelela ni muxima woso,Mwene wala ni ima yoso yabhindamena, kikumukambe kima.
ג [guímel]
12 Izuwa yoso ya mwenyu wê,Muhatu mwenyú, u mubhangela mbote, kamubhangela ima yayibha.
ד [dálete]
13 Mwene uya musota milele yobhange ni ndemba ya mbudi ni milele ya linyu,Mwene wawabhela kukalakala.
ה [hê]
14 Mwene wedi kala o jibaluku ja jingenji,Uya mutakana o kudya kwê dikanga.
ו [vau]
15 Usuku hanji, mwene wabalumuka kya,Phala kubhana o kudya ku akwa dibhata dyê,Ni kubhana kudya ku jiselevende jê ja ahatu.
ז [zaine]
16 Mwene winda kusumba mavu phala kudima, anga u asumba mwene,Mwene ukuna mixi ya jiuva ni nganyu yoso yatundu mu kikalakalu kya maku mê.
ח [hete]
17 Né mwene ikalakalu yabhonzo, mwene udisokejeka phala ku ibhanga,Mwene ukolesa o maku mê.
ט [tete]
18 Mu kuta o wenji, mwene umona nganyu,Mu usuku, o kandeya kê kikene mujima.
י [iode]
19 Mwene ukwata kamuxi phala kubhanga o jidinya janda tunga-naju,Ukwata mwene o kamuxi ubhanga o jidinya.
כ [cafe]
20 Mwene ukwatekesa yó watate,Ubhana kima ku jingadyama.
ל [lâmede]
21 Mwene katandanganya ni akwa dibhata dyê kyoso ki kukala mbundu,Mukonda ene oso adizakela kyambote.
מ [meme]
22 Mwene uditungila o mibeletolo yê.
Izwatu yê, mwene u itunga ni milele ya linyu ni milele yobhange ni kibha kya mbudi.
נ [Nune]
23 Mwadi wê a mwijiya kyambote bhu myelu ya mbanza,Bhwa xikama kumoxi ni adyakime a ixi.
ס [sâmeque]
24 Mwene utunga izwatu ni milele ya linyu anga u isumbisa,Mwene usumbisa jiphonda ku jingenji.
ע [aine]
25 Mwene muhatu wanguzu o athu a muxila,Mwene kale ni wôma wa ima yanda bhita ku hádya, mukonda wadyelela.
פ [pê]
26 Kyajikula o dikanu, uzwela ni unjimu,Mwene ulonga akwa ni henda yoso.
צ [tsadê]
27 Mwene utonginina o ikalakalu yoso ya inzo yê,Kaxikama ngo se kubhanga kima.
ק [cofe]
28 An’ê, emana anga a muximana,*Mwadi wê, wimana we anga u muximana.
ר [rexe]
29 Kwala ahatu avulu ambote,Maji eye wabetakota enyoso ndenge.
ש [chim]
30 O kusanguluka, nange kutena kukala kwa makutu, o kuwabha o pholo kutena kubhwa,Maji o muhatu wala ni wôma wa Jihova, mwéne anda muximana.
ת [tau]
31 Muhatu mwenyú, a mubhane o futu mu yoso yene mubhanga,A muximane bhu myelu ya mbanza, mukonda dya ikalakalu yê.
