Jisabhu 2:1-22
2 Mon’ami, se uxikina o itendelesu yami,Anga ubhaka o itumu yami ku muxima wê,
2 Se ubhana mátwi ku unjimu,Ni kulunga o muxima mu kutongoloka,
3 Se ubhinga we o kwijiya,Anga udikola mu kubhinga o kutongoloka,
4 Se usuluka mu kusota o ima yiyi kala kyasota o phalata,Anga usuluka mu ku isota kala kyasota o jimbongo josweke,
5 Se kyene ki ubhanga, eye wanda kwijiya ihi ilombolola o kukala ni wôma wa Jihova,Wanda sanga o kwijiya kwa Nzambi.
6 Mukonda, Jihova mwéne ubhana o unjimu.Mu dikanu dyê, mutunda kwijiya ni kutongoloka.
7 Mwéne o fixi ya unjimu phala o athu ayuka,Mwéne o ngubu phala yó ala jifiyele.
8 Mwene ulanga o jinjila ja yó ayuka,Ulanga o mwenyu wa yó a mukala fiyele.
9 Kyenyiki, wanda kwijiya o ima yoso yayuka ni yoso yafwama,Wanda kwijiya we o njila yoso yafwama, i watokala kuditela.
10 Kyoso ki wanda kala u njimu, o muxima wê wanda sanguluka,Wanda wabhela o kwijiya,
11 O kuxinganeka kyambote kwanda ku kubhaka,O kutongoloka kwanda kukondejeka,
12 Phala ku kubhulula mu njila yayibha,Ni ku athu azwela ima yayibha.
13 Ni kwa yó eha kwenda mu jinjila ja yuka,Phala kwenda mu kitombe,
14 Ni kwa yó awabhela kubhanga o phulu,Ni yó asanguluka mu kubhanga ima yayibha,
15 Ni kwa yó aditela mu jinjila jabhengalala,Ni yó awabhela kunganala akwa.
16 Kyenyiki, o unjimu wanda kubhulula ku muhatu mukwa undumbu,*Kiwanda mwehela ku kubhomba ni izwelu yê,
17 O muhatu yó uxisa mwadi wê wa unzangala,Ujimba o kikutu kyate ni Nzambi yê.
18 O kuya mu inzo ya kiwaya, kubhekela kufwa,O jinjila jê, jambata mwalunga.
19 Woso uzeka-nê, wadiboto,Kanda tena kuvutuka dingi mu njila ya mwenyu.
20 Mukyenyiki, endela mu njila ya athu ambote,Suluka mukwenda mu njila ya athu ayuka,
21 Mukonda o athu ayuka, ene ngo anda tunga mu ngongo,O yó abhanga ima yambote, ene anda nangenena-mu.
22 Maji, o athu ayibha-phe, mu ngongo anda ku abwika-mu,O yó kene mu kumbidila o ima yakanena, mu ngongo anda kwa vuza-mu.
Footnotes
^ Mu Heba.: “muhatu mukwa ixi yengi.” Nange, muhatu kimubhezi wa Nzambi.
