Kala Kyasoneka Nzwá 13:1-38
13 Ande dya kubhixila o Fesa ya Phasu, Jezú wejidile kwila, o kithangana kyê kyakuxisa o ngongo yiyi ni kuya kwa Tata, kya zukamene kyá. Kuma Jezú wazolele o maxibulu mê akexile mu ngongo, mwene wasuluka mu ku azola katé kudisukilu.
2 Kyoso ene kyakexile mudya, Dyabhu watele kyá ku muxima wa Juda dya Kadyota, mon’a Ximá, o kibanzelu kya kusumbisa Jezú.
3 Mu kwijiya kwila, o Tata wa bhakwile o ima yoso bhu maku mê ni kwila, watundile kwa Nzambi yu weji vutuka kwa Nzambi,
4 Jezú wa balumuka ku meza, anga ukatula o divunga dyê. Wakwata ditwaya, wadikutu nadyu mu mbunda.
5 Anga wate menya mu mbasiya, yu wamateka kusukula o inama ya maxibulu ni ku ikondona ni ditwaya dya dikutu nadyu.
6 Kyenyiki, wazukama kwa Ximá dya Phetele. Phetele anga u mwambela, wixi: “Ngana, eye wanda ngi sukula o inama?”
7 Jezú wa mu tambwijila: “Kindala eye ki wa mu tendela luwa o kima ki nga mu bhanga, maji ku hádya wanda kitendela.”
8 Phetele wambe: “Eye nuka wanda ngi sukula o inama.” Jezú wa mu vutwila, wixi: “Se ki ngi ku sukula o inama, kiwala ni ukamba n’eme.”
9 Ximá Phetele wa mu tambwijila, wixi: “Se kyenyiki, Ngana, kana ku ngi sukula ngó o inama, ngi sukule we o maku ni mútwe.”
10 Jezú wa mu vutwila: “Woso wazowo, wazele kyá, wabhingi ngó kusukula o inama. Enu mwazele kyá, maji enu oso kana.”
11 Mukonda mwene wejidile se nanyi weji mu sumbisa. Kyene kyambe kwila: “Ki mwazele enu oso.”
12 Kyoso kyazubha kusukula o inama yâ ni kuzwata o divunga dyê, Jezú waxikama dingi ku meza, yu wambe: “O kwila mwatendela o kima ki nga mi bhange?
13 Enu mwene mu ng’ixana, ‘Mesene’ ni ‘Ngana,’ kidi ki mwazwela, mukonda éme mwene.
14 Se eme ngi Ngana, ngi Mesene, nga mi sukula o inama, enu wenu, mwatokala kudisukula o inama mudyenu.
15 Eme nga mixila phangu, phala enu wenu mubhange kala ki nga mi bhange eme.
16 Ngi mi tangela ni kidi kyoso kwila: O mubhika katúndu o ngana yê, o muthu a mutumu, katúndu yó wa mu tumikisa.
17 Kindala mwejiya kyá o ima yiyi, maji mwanda zediwa se mu ikumbidila.
18 Eme ki nga muzwela yalungu ni enu oso, mukonda ngejiya oso u ngasolo. Kiki kyabhiti phala kudikumbidila o ima yosoneke mu Mikanda Ikôla: ‘O yó wakexile mudya ku mbolo yami, wa ngi lungulukila.’*
19 Ngi mi tangela o ima yiyi ande dya kubhita, phala kyoso ki yanda bhita muxikine kwila éme mwene.
20 Ni kidi kyoso ngi mi tangela kwila, woso utambulula muthu nga mu tumikisa, u ngi tambulula we eme, woso u ngi tambulula, utambulula we Yó wa ngi tumikisa.”
21 Kyoso kyazubha kuzwela o ima yiyi, Jezú ukala ni kikote ku muxima, yu wambe, wixi: “Ni kidi kyoso ngi mi tangela kwila, sayi muthu mudyenu wanda ngi sumbisa.”
22 O maxibulu anga aditala mudyâ, ene kejidile se mwene wakexile muzwela yalungu ni nanyi.
23 Umoxi ku maxibulu mê, yó a muzolele kyavulu kwa Jezú, wa mu zukama.*
24 Ximá dya Phetele anga ubhalula ni mútwe o dixibulu didi, yu wa mwibhwidisa: “Tutangele, mwene wa muzwela yalungu ni nanyi?”
25 O dixibulu didi wa bhetamena kwa Jezú, yu wa mwibhwidisa: “Ngana, wa muzwela yalungu ni nanyi?”
26 Jezú wa mu tambwijila, wixi: “Yó nganda mubhana kakibhasu ka mbolo ku nganda bonda mu ditijela.” Kyoso mwene kyazubha ku kabonda, ukabhana kwa Juda, mon’a Ximá dya Kadyota.
27 Kyoso Juda kya tambula o kakibhasu ka mbolo, Satanaji wa mu funyisa. Jezú anga u mwambela, wixi: “O kima ki wa mubhanga, bhanga-kyu ni lusolo.”
28 Maji sé-ku muthu waxikamene kumoxi ni mwene ku meza, watendela se mukonda dyahi wazwela o ima yiyi.
29 Kuma Juda mwéne wakexile mubhaka o ngonga ya kitadi, a mukwá abanzele kwila Jezú wakexile mu mutangela: “Sumba o ima i twa bhindamena phala o fesa.” Mba watokalele kubhana kama koso-koso ku jingadyama.
30 Kyazubha kutambula o kakibhasu ka mbolo, Juda watundu ni lusolo. Wexile kyá usuku.
31 Kyoso Juda kyatundu, Jezú wambe, wixi: “Kindala o Mon’a muthu a mu fumanesa, o Nzambi a mu fumanesa we bhukaxi ka mwene.
32 Nzambi wanda fumanesa o Mon’a muthu, mwene wanda kibhanga kindala.
33 Twana twami twa kazola, nganda kala hanji kakithangana ni enu. Enu mwanda ngisota, maji kala ki nga tangele o Jijudé, ngi myambela we kindala kwila: ‘Kwoso ku ngandaya, enu kimutena kuya-ku.’
34 Ngi mi bhana kitumu kya ubhe: Dizolyenu mudyenu. Kala ki nga mi zolo eme, enu-wenu dizolyenu mudyenu.
35 Kyenyiki, o athu oso anda mijiya kwila mu maxibulu mami, se mudizola mudyenu.”
36 Ximá dya Phetele wa mu ambela, wixi: “Ngana, kwebhi ku wandaya?” Jezú wa mu tambwijila: “Ku ngandaya, eye kutena luwa ku ngi kayela, maji ku hádya wanda ngi kayela.”
37 Phetele wa muvutwila, wixi: “Ngana, mukonda dyahi ki ngi tena ku ku kayela kindala? Eme ngibhana o mwenyu wami, mukonda dyé.”
38 Jezú wa mu tambwijila, wixi: “Wanda bhana o mwenyu wé mukonda dyami? Ngi ku tangela ni kidi kyoso kwila, ande dya dikolombolo kukokola eye wanda ngi dituna lutatu.”
