‘O ima i nga uabhele, ia kexile ni an’a athu.’JISABHU 8:31.

1, 2. Kiebhi Jezú kia londekesa o henda iê ku athu?

O MON’A phande kumbi ua Nzambi, muene o phangu ia dikota ia unjimu ua Jihova. Muéne uexile “dixibulu” dia Tat’ê. Xinganeka o kisangusangu kia Jezú, mu ku mona Tat’ê ku “polondala maúlu” ni ku bhanga ‘o madisesa ma’xi.’ Maji ku ima ioso ia bhangele Tat’ê, Jezú ua beta ku ‘uabhela o an’a athu.’ (Jisabhu 8:22-31) Sé phata, tundé ku dimatekenu, muéne ua zolo o athu.

2 Mu ku bhita thembu, Jezú ua londekesa o ufiiele uê ni henda kua Tat’ê, ni henda iê ku athu, kioso kia xisa o diulu mu vondadi iê, phala kuíza mu ixi kala muthu mu xitu. Jezú ua bhangele o kima kiki ni henda ioso, phala kubhana o muenhu uê mu “kukula mundu.” (Matesu 20:28; Filipe 2:5-8) Kioso kiexile mu ixi, Nzambi ua mu bhana o kutena kua ku bhanga madiuanu. O madiuanu iâ, a londekesa o henda ia kexile na-iu Jezú ku athu, ni ima iambote ia-nda bhanga muéne phala o athu.

3. Ihi i tua-nda di longa mu milongi íii?

 3 Kioso kiexile mu ixi, Jezú ua boko “o njimbu iambote ia Utuminu ua Nzambi.” (Luka 4:43) Muéne uejidile kuila, o Utuminu iú, ueji zelesa o dijina dia Tat’ê, ni ku batula o maka oso ene mu bhita nau o athu. Kioso kia kexile mu boka, Jezú ua kexile mu bhanga madiuanu avulu. O madiuanu iâ, a londekesa o henda iê ku athu. Mukonda diahi o ima ia bhangele, iala ni valolo phala etu? Mukonda o ima ia bhangele, i tu kuatekesa ku dielela mu ima ia-nda bhita ku hádia. Tua-nda di longa madiuanu a uana a bhangele Jezú.

‘O KUTENA KUA NGANA ANGA KU KALA NI JEZÚ MU KUSAKA O JIHAXI’

4. Ihi ia bhitile kioso Jezú kia sange diiala ni uhaxi ua dibhute?

4 Kioso kia kexile mu boka, Jezú uendele mu mbanza ia Ngalileia. Saí sanzala mua sange diiala dia kexile ni uhaxi ua dibhute. (Marku 1:39, 40) O diiala dia kexile mu kata kiavulu, mukonda dia kiki, Luka, uexile dotolo, uambe kuma, o ‘mukutu uê uoso ua kexile ni dibhute.’ (Luka 5:12) O Bibidia i zuela kuila, kioso kia mono Jezú, o diiala dia kexile mu kata, u ‘bhetama pholo bhoxi, u mu dionda, uixi: Ngana, Eie ki u ki mesena, ua ki soko, o ku ngi bhana kudisanza.’ O diiala diejidile kuila, Jezú ua kexile ni kutena, maji ua mesenene kuijiia se Jezú ua mesenene ku mu saka, mba kana. Mukonda diahi? Mukonda o diiala didi diejidile kuila, o Jifalizeu kexile mu suua o athu akexile ni dibhute. Maji ihi ia kexile mu banza Jezú? Kiebhi kieji saka o diiala didi dia kexile ni mukutu uezala ni dibhute? Ihi i ueji bhanga?

5. Mukonda diahi Jezú ua mesenene ku saka o diiala dia kexile ni dibhute?

5 Tu mona kuma o diiala dia kexile mu kata, ka di kola: “Nga xidi! Nga xidi!” kala kia tumine o Kitumu kia Mozé. (Ijila 13:43-46) Maji Jezú ka kexile ni njinda. Mu veji dia kiki, muéne ua thandanganhele ni diiala didi, iú ua mesenene ku mu kuatekesa. Ki tuejiia kiambote o ima ia kexile mu banza Jezú, maji tuejiia kiebhi kia kexile mu divua muéne. Muéne ua mu kuatela henda, mukonda dia kiki, ua bhange madiuanu. Muéne ua kuata o diiala, se-ku muthu ueji xikina ku kuata o diiala didi. Ni kidielelu, ni henda ioso, Jezú uambe: “Nga mesena muene, disanze.” Mu kithangan’okio ‘o dibhute diê dia-bhu.’ (Luka 5:13) Sé phata, Jihova ua bhana kua Jezú, o kutena kua kubhanga o madiuanu iâ a dikota, ni ku londekesa kuila, ua zolele kiavulu o athu.Luka 5:17.

6. Valolo iahi iala na-iu o madiuanu a Jezú, ni ihi ilondekesa o madiuanu iá?

6 Ni kutena kua mu bhanene Nzambi, Jezú ua bhange madiuanu avulu. Muéne ka sake ngó o athu akexile ni dibhute. Jezú ua sake ué o athu akexile ni mauhaxi a mukuá. O Bibidia i zuela kuila, o athu a tukumuka kioso kia mono kuila, “mabubu ia zuela, inema íi di sanza, atenguine ia enda kiambote, ifôfo íi mona.” (Matesu 15:31) Phala ku saka muthu, Jezú ka bhingile o idiandu ia muthu ua disanze. Jezú ua kexile ni kutena kua ku saka o mauhaxi oso. Kabasa kithangana, muéne ua kexile mu saka o athu, katé muene ni ió akexile dikanga. (Nzuá 4:46-54) Ihi ilondekesa o phangu íii? O phangu íii, ilondekesa kuila, Sobha  ietu Jezú Kristu, uala ni kutena, ni vondadi ia ku zubha o mauhaxi oso, katé ku hádia ni hádia. Kioso ki tu di longa kiebhi Jezú kia sake o athu, tu kala ni kidielelu kuila, ku mundu uobhe, muéne ua-nda “lendukila o ngadiama ni phulungu ua bhondalala.” (Jisálamu 72:13) Kuma kiene kia mesena kubhanga, Jezú ua-nda saka oso a mu tala hadi.

“BALUMUKA, ZANGULA O HAMA IÉ, NDA UENDE”

7, 8. Jimbulula o ima ia bhitile ande dia Jezú ku sanga o diiala dia kexile mu kata mu dizanga dia Betezata.

7 Mu ku bhita jimbeji, kioso kia sake o diiala diexile ni dibhute, Jezú ua tundu mu Ngalileia, anga uia mu Judeia mu ku boka o njimbu iambote ia Utuminu ua Nzambi. Nange midi ni jimidi ja athu evu o njimbu ia Jezú, anga a diuana mukonda dia henda ia a londekesa Jezú. Jezú ua mesenene ku konda o malamba a jingadiama ni ió akexile mu ku a zukutisa, mu ku a bhana kidielelu.Izaia 61:1, 2; Luka 4:18-21.

8 Ku mbeji ia Nizá, Jezú uendele mu Jeluzaleme, phala kubhanga o fesa ia Phasu. O mbanza iezalele ni athu ejile ku fesa. Ku thunda dia tembulu, kua kexile dizanga, a dixana Betezata. Bhu kididi kieniókio, Jezú ua sange-bhu diiala diexile kinema.

9, 10. (a) Mukonda diahi o athu endele mu dizanga dia Betezata? (b) Ihi ia bhangele Jezú bhu dizanga, ni ihi i tu longa o phangu íii? (Tala o foto ia dianga.)

9 O athu akexile mu kata, akexile múia mu dizanga dia Betezata. Mukonda diahi? Mukonda ene a xikinine kuila, o muthu ua mu kata, u tena ku disanza mu madiuanu, se uia mu dizanga dia mu vunzuka o menha. O athu akexile mu sota o ku a saka, a vudile, ene a thandanganhele kiavulu, ka kexile ni kidielelu. Mu kiki, xinganeka o kanvuanza ka kexile bhu kididi kieniókio. Jezú ka bhingile ku mu saka, mukonda uexile muthu ua iuka, mu kiki, mukonda diahi muéne ua kexile bhu kididi kieniókio? O henda iê ku athu, iene ia mu bhangesa kuia bhenhobho. Bhuene bhua sange o diiala dia kate kiá thembu, ande dia Jezú kuíza mu ixi.Tanga Nzuá 5:5-9.

Jezú ua soto o athu a bhindamene kikuatekesu

10 Jezú uebhula o diiala, se ua mesenene kuenda dingi. Xinganeka o kuluuala kua kexile na-ku o diiala, kioso kia tangela Jezú kuila, ua mesenene ku disanza, maji ka kexile ni muthu phala ku mu kuatekesa ku tuluka mu dizanga. Jezú ua mu tumina kubhanga kima kia madiuanu. Ua mu tumina ku zangula o hama iê, nda ende. Mu kiki, o diiala dia katula o hama iê, anga uenda! O madiuanu iá, alondekesa o ima ia-nda bhanga Jezú ku mundu uobhe. A londekesa ué o henda ia Jezú ku athu. Muéne ua soto o athu a bhindamene kikuatekesu. O phangu ia Jezú, ia tokala ku tu suínisa ku suluka ku sota mu mbambe ietu, o athu a luuala mukonda dia ima ia iibha iene mu bhita ku mundu.

“MUKUAHI UA NGI BABATA O KIZUATU?”

11. Kiebhi o divulu dia Marku 5:25-34, dilondekesa kuila, Jezú ua zolele o jihaxi?

11 Tanga Marku 5:25-34. Saí muhatu ua  kexile mu kata mu 12 kia mivu. O uhaxi ua mu bhekela ibhidi iavulu ku muenhu, ua mu fidisile ué o kubheza. Muéne ua sotele kiá ji dotolo javulu, ua zangele kitadi kiavulu phala ku mu saka, maji mu veji dia ku disanza, o uhaxi uê ua dibandekesa dingi. Saí kizuua, o muhatu ua soto ndunge iéngi phala ku disanza, mu kiki, muéne ua bhiti bhu kaxi ka mundu, anga u kuata ku izuatu ia Jezú. (Ijila 15:19, 25) Kioso kia mono kuila, ku mukutu uê kua tundu kutena, Jezú uebhula se nanhi ua mu kuata. “Ni kuteketa ni uôma,” o muhatu “ua di bhale bhu pholo iê, iu ua mu tangela o kidi kioso.” Jezú uejidile kuila, Jihova ua sakele o muhatu iú, mu kiki, ni henda ioso, muéne uambe: “Mona, o kuxikana kué, kua ku bhulula. Ndeie ni kutululuka, u di sanze ku uhaxi ué.”

O madiuanu a Jezú alondekesa kuila, muéne ua mesena o mbote ietu, u thandanganha ué ni ibhidi ietu (Tala o kaxi 11, 12)

12. (a) Ni kikuatekesu kia milongi i tua di longo, kiebhi ki ueji jimbulula o ídifua ia Jezú? (b) Phangu iahi ia tu xisa Jezú?

12 Tu sanguluka kiavulu mu ku mona o henda ia londekesa Jezú ku athu, benge benge kua ió akexile mu kata. Muéne ka difu ni Satanaji, u sota ku tu bhangesa kuxikina kuila, ki tuala ni valolo, ni kuila, se-ku muthu ua tu zolo. O madiuanu a Jezú a londekesa kuila, muéne ua mesena o mbote ietu, u thandanganha ué ni ibhidi ietu. Tu sakidila mu ku kala ni Sobha ia henda, o Mukunji ua Dikota! (Jihebeleu 4:15) Ki bhonza ku tendela o hadi i tala o muthu uene mu kata mu mivu iavulu, benge benge se ki tua mu kata. Maji di te bhu kididi kia Jezú. Muéne ua kexile ni henda ia athu akexile mu kata, sumbala muéne nuka ua katele. Tua tokala ku di suínisa ku kaiela o phangu iê ia henda.1 Phetele 3:8.

“JEZÚ ANGA U DILA”

13. Ihi ilondekesa o difukunukinu dia Lázalu, ia lungu ni Jezú?

13 Jezú ua kexile ué mu kuívua o ndolo ia akuâ. Mu kifika, kioso kiafu kamba diê Lázalu, Jezú ua keme “ku muxima,” anga “malamba a mu kuata,” mu kuívua o ndolo ia kexile na-iu o muiji ua Lázalu, ni makamba  mê. (Tanga Nzuá 11:33-36.) Sumbala uejidile kuila ueji fukununa Lázalu, Jezú ua didi. Muéne ka kexile ni jisonhi ja athu. Jezú ua zolele kiavulu Lázalu ni muiji uê, mukonda dia kiki, ni kutena kua Nzambi, muéne ua fukununa Lázalu.Nzuá 11:43, 44.

14, 15. (a) Ihi ilondekesa kuila, Jihova ua mesena kuzubha o hadi ia mu tala o athu? (b) Ihi i tu longa o kizuelu “jimbila?”

14 O Bibidia i zuela kuila, Jezú ua difu ni Tat’ê, Jihova. (Jihebeleu 1:3) Mu kiki, o madiuanu a Jezú a londekesa kuila, Jihova ua mesena ué ku zubha o mauhaxi, o ndolo, ni kalunga. Kua kambe ngó bhofele, Jihova ni Jezú, a-nda fukununa athu avulu. Jezú uambe kuila, “kumbi dí diza, dia oso ala mu jimbila,” ku fukunuka.Nzuá 5:28, 29.

15 Jezú ua tumbula o kizuelu “jimbila,” phala kulondekesa kuila, Nzambi ka jimbi o athu ala-mu. Nzambi muene Suke-ku, muene o Mubhangi ua ngongo, mu kiki, muéne u tena ku lembalala o ima ioso ia lungu ni athu afu, katé muene ni ídifua iâ. (Izaia 40:26) Jihova kala ngó ni kutena kua ku a lembalala, muéne ua mesena ku a lembalala. O difukunukinu dia athu a a tange mu Bibidia, phangu iambote ia ima ia-nda bhita ku mundu uobhe.

IHI I TU LONGA O MADIUANU A JEZÚ

16. Ujitu uebhi ua-nda tambula o Jiselevende ja Nzambi?

16 Se tu kolokota mu ufiiele uetu, nange tua-nda kala ni ujitu ua ku mona o madiuanu a beta kota, o kubhuluka ku hadi ia dikota! Mu ku bhita kathangana, kioso kia-nda bhita o ita ia Alumajedone, tua-nda mona dingi madiuanu avulu. Mu kithangana kieniókio, o athu oso a-nda kala ni muenhu ua iuka. (Izaia 33:24; 35:5, 6; Dijingunuinu 21:4) Xinganeka o athu kuenda sé mauana, ji mbangala, ialu ia inema, mba ji makina ja a kuatekesa kuívua kiambote. Jihova uejiia kuila, o athu a-nda bhuluka ku Alumajedone, a-nda bhinga ku suína, ni ku kala ni sauidi iambote, mukonda a-nda kala ni kikalakalu kiavulu. Ene a-nda kalakala phala ku bhangesa o Ixi ietu ku kituka palaízu.Jisálamu 115:16.

17, 18. (a) Mukonda diahi Jezú ua bhangele madiuanu? (b) Mukonda diahi ua tokala ku bhanga ioso, phala ku bokona ku mundu uobhe ua Nzambi?

17 Kioso kia tanga o misoso ia lungu ni athu a a sake kuala Jezú, o “mundu uavulu” u suína dingi. (Dijingunuinu 7:9) O madiuanu iá, a suínisa o kidielelu kia athu kia kuila, ku hádia, ki tua-nda kata dingi. Alondekesa ué kuila, o Mon’a phande kumbi ua Nzambi, ua zolo kiavulu o athu. (Nzuá 10:11; 15:12, 13) O henda ia Jezú, ilondekesa kuila, Jihova ua zolo o jiselevende jê ni muxima uoso.Nzuá 5:19.

18 Lelu, o mundu uezala ni ndolo, ni hadi, ni kalunga. (Loma 8:22) Mukonda dia kiki, tua bhindamena o mundu uobhe ua Nzambi. Ku mundu uobhe, o athu oso a-nda kala ni sauidi ia iuka, kala kia kanena Nzambi. O divulu dia Malakiia 4:2, di tu kanena kuila, ni kisangusangu kioso, tua-nda ‘tuka-tuka kála tuana tua ngombe,’ mu kuijiia kuila, a tu bhulula ku uhaxi ni ituxi. O kisakidilu kietu kua Jihova, ni kixikanu kietu, kia tokala ku tu suínisa ku bhanga ioso, phala ku bokona ku mundu uobhe. O kuijiia kuila, o madiuanu a bhangele Jezú, alondekesa o ima ia-nda bhita ni athu ku utuminu uê, ku tu suínisa.