‘Mu bhanga jinga kienhiki mu ku ngi banze-me.’1 KOLINDO 11:24.

1, 2. Ihi ia bhange Jezú m’usuku ua kizuua kia 14, kia mbeji ia Nizá, kia muvu ua 33 K.K.? (Tala o foto ia dianga.)

M’USUKU ua kizuua kia 14, kia mbeji ia Nizá, kia muvu ua 33 K.K., o dieji dia thetamene. Jezú ni maxibulu mê a bhangele o fesa ia Phasu, phala ku lembalesa o athu kiebhi Jihova kia bhulula akua Izalaiele ku Ijitu, 1.500 ja mivu ku dima. Mu usuku uenhó, Jezú ua bhange o fesa ionene, o lembalasa ia kufua kué, ni 11 dia jipoxolo jê ja fiiele, mu kiki, o akaiedi’ê a tokalele ku bhanga o fesa íii ku mivu ioso, phala ku lembalala o kufua kuê.Matesu 26:1, 2.

2 Jezú ua bhange o musambu, ua uana o mbolo sé felemendu ku jipoxolo jê, anga u zuela: ‘Tambulenu, mu die.’ Mu ku suluka, ua katula o kopho ia vinhu, ua sambe dingi, anga u zuela: “Nuenu-ku enuenu oso.” (Matesu 26:26, 27) O mbolo ni vinhu, ia kexile mu lombolola kima kia valolo. M’usuku uenhó, o  jipoxolo ja fiiele ja Jezú, a di longo ima iavulu.

3. Ibhuidisu iahi i tua-nda di longa mu milongi íii?

3 Jezú ua mesenene kuila, o maxibulu mê a lembalala o kufuá kuê, mivu ioso. O fesa íii a ixana ‘Fesa ia Lembalasa ia Kufuá Kua Jezú,’ mba Lembalasa. (1 Kolindo 11:20) Maji saí iâ ebhula: Mukonda diahi tua tokala ku lembalala o kufuá kua Jezú? Ihi i lombolola o mbolo ni vinhu? Kiebhi ki tu tena ku di pelepalala phala o Lembalasa? Nanhi ua tokala ku dia o mbolo ni kúnua o vinhu? Mu ku suka-ku, ihi ia tokala ku bhanga o Jikidistá phala ku londekesa kuila, a bhana valolo ku kidielelu kiâ?

MUKONDA DIAHI TUENE MU LEMBALALA O KUFUÁ KUA JEZÚ

4. O kufua kua Jezú, ku tu bhekela kidielelu kiahi?

4 Mukonda dia kituxi kia tele Adá, tua lundula o kituxi ni kalunga. (Loma 5:12) Mu kiki, sé-ku muthu u tena ku bhana kua Nzambi, o sata ia kukula, phala ku bhulula o muenhu uê, mba o muenhu ua akuâ. (Jisálamu 49:6-9) Maji Jezú ua bhana o muenhu uê ua iuka phala ku tu bhulula, anga u londekesa o valolo ia sata iê kua Nzambi. Mukonda dia kufuá kua Jezú, tuala ni kidielelu kia ku kala ku muenhu katé ku hádia ni hádia, sé dingi kituxi, mba kufuá.Loma 6:23; 1 Kolindo 15:21, 22.

Tu sakidila ni muxima uoso, o ima iene mu tu bhangela Jihova ni Jezú!

5. (a) Kiebhi ki tuejiia kuila Nzambi ni Jezú a tu zolo? (b) Mukonda diahi tua tokala kuia mu fesa ia Lembalasa?

5 Nzambi ua londekesa o henda iê ku athu, mu ku iudika o sata ia kukula. (Nzuá 3:16) Jezú ua londekesa ué o henda iê, mu ku bhana o muenhu uê phala ku tu bhulula. Ande dia kuíza mu ixi, Jezú ua ‘zolele o an’a athu.’ (Jisabhu 8:30, 31) Tu sakidila ni muxima uoso, o ima iene mu tu bhangela Jihova ni Jezú! Mukonda dia kiki, tu belesela o kitumu kia Jezú, kiambe: ‘Mu bhanga jinga kienhiki mu ku ngi banze-me.’1 Kolindo 11:23-25.

IHI I LOMBOLOLA O MBOLO NI VINHU

6. Kala ki tua mono, ihi i lombolola o mbolo ni vinhu?

6 Mu fesa ia sukina, ia bhangele ni jipoxolo jê, Jezú ka bhangele madiuanu, mu ku bhangesa o mbolo ku kituka o mukutu uê, mba o vinhu ku kituka o manhinga mê. Ia lungu ni mbolo, muéne uambe: ‘Íii ilombolola o mukutu uami.’ Ia lungu ni vinhu, muéne uambe: ‘Íii ilombolola o manhinga mami a kikutu kiobhe, a-nda bhubha phala ku a satela o athu.’ (Marku 14:22-24) Mu kiki, tu tena ku mona kuila, o mbolo ni vinhu, ijimbuete ngó.

7. Ihi ilombolola o mbolo sé felemendu?

7 M’usuku uenhó, Jezú ua bhana o mbolo ia kambele felemendu, a kexile mu i dia mu fesa ia Phasu. (Makatukilu 12:8) Saí bhabha, o Bibidia i tumbula o felemendu phala ku lombolola o kituxi. (Matesu 16:6, 11, 12; Luka 12:1) O mbolo sé felemendu ia bhana Jezú, ilombolola o mukutu uê ua  iuka. (Jihebeleu 7:26) Mukonda dia kiki, lelu ué kiene kimoxi, o mbolo mu fesa ia Lembalasa, kene mu i ta felemendu.

8. Ihi ilombolola o vinhu?

8 O vinhu ia bhana Jezú, ilombolola o manhinga mê, mba o muenhu uê, kála ki lombolola ué o vinhu mu fesa ia Lembalasa mu izuua ietu. Muéne ua fuila bhu kididi a k’ixana Ngolongota, mu ixi ia Jeluzaleme, phala n’a tu ‘loloke o ituxi.’ (Matesu 26:28; 27:33) Se tu bhana valolo ku ujitu iú, tua-nda di pelepalala mivu ioso, phala kuia mu fesa íii. Kiebhi ki tu tena ku di pelepalala?

MAUKEXILU A KU DI PELEPALALA PHALA O FESA IA LEMBALASA

9. (a) Mukonda diahi tua tokala ku tanga o ibatulu ia Bibidia ia lungu ni fesa ia Lembalasa? (b) Kiebhi ki u divua ia lungu ni sata ia kukula?

9 Tu tena ku di pelepalala phala o fesa ia Lembalasa, mu ku tanga o ibatulu ia Bibidia ia lungu ni Lembalasa, i tu sanga mu kadivulu Tanga o Mikanda Ikôla Izuua Ioso. O ku tanga o misoso ia Bibidia, kua-nda tu kuatekesa ku xinganeka mu ima ia bhangele Jezú ande dia kufuá. Saí phange ia muhatu uambe: “Tua mu kingila o kizuua kia fesa ia Lembalasa. Mivu ioso i uabha dingi. Ngi lembalala o kizuua ki ng’emana . . . mu ku tala o kimbi kia tat’etu, ni ku tendela kiambote o valolo ia sata ia kukula. . . . Aiué, ngejidile kiambote o ibatulu ioso ia Bibidia, ngejidile ué ku i jimbulula kiambote! Maji kioso ki ng’evu o ndolo i bheka o kalunga, kiene ngó kia sanguluka o muxima uami, mukonda dia ima iambote ia-nda bhita n’etu bhu kaxi ka sata íii ia kukula.” O ku xinganeka mu mbote i tu bhekela o sata ia kukula kua Jezú, ukexilu ua dikota ua ku di pelepalala phala o fesa ia Lembalasa.

Kioso ki tu tanga o ibatulu ia Bibidia ia lungu ni fesa ia Lembalasa, tua mu di pelepalala phala o fesa ia Lembalasa (Tala o kaxi 9)

10. Ihi dingi i tu tena ku bhanga phala ku di pelepalala phala o fesa ia Lembalasa?

 10 Tu tena ué ku di iudika, mu ku bandekesa o kikalakalu kietu mu ukunji, mu kuixana athu avulu phala kuia mu fesa ia Lembalasa. Nange tu tena ku kalakala kala muboki ua ithangana ni ithangana. Se tu zuelela akuetu ia lungu ni Nzambi, ni Mon’ê, ni kidielelu kia muenhu ua kalela-ku, tua-nda divua kiambote mu kuijiia kuila, tuene mu bhanga o kima kia mesena Nzambi ko-kuetu.—Jisálamu 148:12, 13.

11. Mukonda diahi Phaulu uambe kuila, athu avulu mu kilunga kia Kolindo a dile o mbolo ni kúnua o vinhu mu Lembalasa ni ufusa?

11 Kioso ki u di pelepalala phala o fesa ia Lembalasa, xinganeka mu milongi ia soneka Phaulu phala o Jikidistâ mu Kolindo. (Tanga 1 Kolindo 11:27-34.) Muéne uambe kuma, se o muthu u dia o mbolo ni kúnua o vinhu ni ufusa, muéne u kala ni kikuma kia “mukutu ua Ngana ni manhinga mê.” Mu kiki, se o muthu a mu undu mu nzumbi, udia o mbolo ni kúnua o vinhu, muéne “u dia hadi, u nua hadi.” Mu izuua ia Phaulu, athu avulu akua Kolindo akexile mu bhanga ima ia iibha. Nange avulu a dile kiavulu, mba a nuine kiavulu ande dia fesa ia Lembalasa, mba mu kithangana kia kexile mu bhanga o fesa, mu kiki, nange a kexile mu boa. Ene a bhukumukina o fesa íii, mu kiki, kioso kia di o mbolo ni kúnua o vinhu, Nzambi ka a xikina.

12. (a) Phaulu ua sokesa o fesa ia Lembalasa ni ihi? Ihi ia tendelesa ku athu a dia o mbolo ni kúnua o vinhu? (b) Ihi ia tokala ku bhanga o muthu u dia o mbolo ni kúnua o vinhu, se u ta kituxi kia dikota?

12 Mu ku sokesa o fesa ia Lembalasa ni kúdia, Phaulu ua tendelesa o athu a dia o mbolo ni kúnua o vinhu kuila: “Enu ki mu tena kunua mu kopho ia Ngana, ni mu kopho ia madimonho. Ki mu tena ue kudia ku meza ma Ngana ni ku meza ma madimonho.” (1 Kolindo 10:16-21) Se o muthu u dia o mbolo ni kúnua o vinhu u ta kituxi kia dikota, muéne ua tokala kuia ku tufunga, phala ku mu kuatekesa. (Tanga Tiiaku 5:14-16.) Se o muthu u londekesa kuila ua diela muene o ituxi iê, muéne ka mu bhukumukina o sata ia kukula kua Jezú, se u dia o mbolo ni kúnua o vinhu mu fesa ia Lembalasa.Luka 3:8.

Ki tu mesena ku bhukumukina o sata ia kukula ia Jezú

13. Mukonda diahi tua tokala ku samba ia lungu ni kidielelu kia tu bhana Nzambi?

13 Tu tena ué ku di iudika phala o fesa ia Lembalasa, mu ku samba ni ku xinganeka mu kidielelu kia tu bhana Nzambi. Ki tu mesena ku bhukumukina o sata ia kukula ia Jezú. Mu kiki, ki tu tokala ku dia o mbolo ni kúnua o vinhu, se tuala ni phata kuila, a tu undu. Nanhi-phe ua tokala ku dia o mbolo ni kúnua o vinhu?

NANHI UA TOKALA KU DIA O MBOLO NI KÚNUA O VINHU?

14. Kuma o Jikidistá a a undu a tokala ku kikutu kiobhe, ihi ia bhanga mu fesa ia Lembalasa?

14 O athu a dia o mbolo ni kúnua o vinhu  mu fesa ia Lembalasa, kala ni phata kuila, a tokala ku kikutu kiobhe. Ia lungu ni vinhu, Jezú uambe: “O kopho iii, kiene o kikutu kiobhe bhu kaxi ka Nzambi ni athu, kiojike kidimbu ni manhinga mami.” (1 Kolindo 11:25) Jihova ua bhangele o kikutu kia Kitumu ni akua Izalaiele, maji mu ku bhita thembu, muéne uambe kuma ueji bhanga kikutu kiobhe phala ku bhingana o kikutu kiki. (Tanga Jelemiia 31:31-34.) Nzambi ua bhange o kikutu kia ubhe ni Jikidistá a a undu. (Ngalásia 6:15, 16) O kikutu kiki, kia mateka kioso kiafu Jezú. (Luka 22:20) Jezú muéne o Mukunji ua kikutu kiobhe. O Jikidistá a a undu a fiiele, a tokala ku kikutu kiobhe, a-nda tunga kumoxi ni Jezú ku diulu.Jihebeleu 8:6; 9:15.

15. A nanhi a tokala ku kikutu kia Utuminu? Ujitu uahi ua-nda tambula, se a kolokota mu ufiiele uâ?

15 O Jikidistá a a undu ejiia kuila, ene a tokala ué ku kikutu kia Utuminu. (Tanga Luka 12:32.) O kikutu kiki, kio bhange bhu kaxi ka Jezú ni akaiedi’ê a a undu a fiiele, a tale nê o ‘hadi.’ (Filipe 3:10) Lelu, o Jikidistá a a undu a fiiele, a tokala ué ku kikutu kiki. Ene a-nda tumina kumoxi ni Kristu ku diulu, katé ku hádia ni hádia. (Dijingunuinu 22:5) Ene ala ni ujitu ua ku dia o mbolo ni kúnua o vinhu mu Fesa ia Lembalasa ia Kufuá Kua Jezú.

16. Jimbulula ihi ilombolola o divulu dia Loma 8:15-17.

16 O Jikidistá a a undu kala ni phata kuila, an’a Nzambi, ni kuila, a tokala ku dia o mbolo ni kúnua o vinhu. (Tanga Loma 8:15-17.) Phaulu uambe kuila, ene a dikôla: “Abha, Tata!” Mu dimi dia Alamaiku, o kizuelu “Abha,” kilombolola dijina dia henda, kala “papa,” mba dijina di londekesa o ku xila, kala “Tata.” O dijina didi, di londekesa o ukamba uambote u kala nau o Jikidistá a a undu ni Jihova, kioso kia tambula o ‘nzumbi ia a bhangesa ku kala an’a Nzambi.’ O nzumbi ia Nzambi i “bhana umbangi” ni nzumbi iâ, phala ejiie ni kidi kioso kuila, an’ê mu nzumbi. Ki kilombolola kuila, ene ka mesena ku tunga mu ixi. Ene ejiia kuila se a kolokota mu ufiiele uâ, katé kia fua, a-nda tumina kumoxi ni Jezú ku diulu. Ene ejiia kuila, Jihova ua a “lunduila o nzumbi Ikôla.” Lelu, kua xala ngó athu a tolo mu ixi, a tokala ku kibuka kia 144.000 a an’a Nzambi. (1 Nzuá 2:20; Dijingunuinu 14:1.) Ene a divua kuma a zukama kiavulu kua Jihova, mukonda dia kiki, a mu ixana “Abha, Tata!”

BHANA VALOLO KU KIDIELELU KIÊ KIA BIBIDIA

17. Kidielelu kiahi kiala na-kiu o Jikidistá a a undu? Kiebhi kiejiia kuila a a undu?

17 Se a ku undu mu nzumbi, ua-nda tumbula o kidielelu kiê mu misambu iê, ithangana ioso. Mu kiki, ua-nda bhana valolo ku Mikanda Ikôla. Mu kifika, kioso o Bibidia i zuela ia lungu ni ukaza ua Jezú ni “dibhanga” diê ku diulu, eie uejiia kuila ia lungu n’eie, mu kiki, u kingila o kizuua kiki ni hanji ioso. (Nzuá 3:27-29; 2 Kolindo 11:2; Dijingunuinu 21:2, 9-14) Uejiia ué kuila, kioso o Bibidia i jimbulula o henda ia Nzambi ku Jikidistá a a undu, ia mu ku zuelela eie. Ni kuila kioso ki u tanga misoso ia lungu ni Jikidistá a a undu mu Mak’â Nzambi, o nzumbi ikôla i ku kuatekesa ku i belesela. O nzumbi ikôla ia Nzambi, i “bhana umbangi” ni nzumbi iê kuila, o kidielelu kiê, kia kuia ku diulu.

18. Kidielelu kiahi kiala na-kiu o “jimbudi jamukuá?” Kiebhi ki u divua ia lungu ni kidielelu kiki?

 18 Se ua tokala ku “mundu uavulu, ” mba ku “jimbudi jamukuá,” Nzambi ua ku bhana o ujitu ua ku tunga mu Palaízu mu ixi, katé ku hádia ni hádia. (Dijingunuinu 7:9; Nzuá 10:16) Kiebhi ki u divua ia lungu ni kidielelu kiê? Kioso ki u xinganeka mu ima i zuela o Bibidia ia lungu ni Palaízu, u sanguluka. Ua kingila o kizuua ki ua-nda tunga kumoxi ni muiji uê, ni makamba mê, ku mundu ua tululuka. Ua mesena ku mona o dizubhilu dia nzala, ni uadiama, ni hadi, ni uhaxi, ni kalunga. (Jisálamu 37:10, 11, 29; 67:6; 72:7, 16; Izaia 33:24) Ua mesena kiavulu ku mona o difukunukinu dia jindandu jê ni makamba mê a kazola. (Nzuá 5:28, 29) U sakidila kiavulu Jihova, mukonda dia kidielelu kiki! Sumbala eie kuene mu dia o mbolo ni kúnua o vinhu, uia mu fesa ia Lembalasa, mukonda u bhana valolo ku sata ia kukula ia Jezú.

O KUILA UA-NDAIA MU FESA IA LEMBALASA?

19, 20. (a) Ihi i ua tokala ku bhanga phala ku kala ni muenhu ua kalela-ku? (b) Mukonda diahi ua tokala kuia mu fesa ia Lembalasa?

19 Eie u tena ku kala ni muenhu ua kalela-ku mu ixi mba ku diulu, se u xikina Jihova Nzambi, ni Jezú, ni ku sata ia kukula. Kioso ki ua-ndaia mu fesa ia Lembalasa, xinganeka ku kidielelu kiê, ni valolo ia kufuá kua Jezú. Kia Sesa, kioso kia-nda boba o dikumbi, mu kizuua kia 3, kia mbeji ia Kasamanu, kia muvu ua 2015, mazunda ni mazunda a athu ku mundu uoso a-ndaia mu fesa ia Lembalasa mu Ididi ia Ubhezelu, ni idi ia mukuá.

20 Se tu di iudika kiambote phala kuia mu fesa ia Lembalasa, tua-nda sakidila kiavulu o sata ia kukula ia Jezú. Se uivua kiambote o diskursu mu fesa ia Lembalasa, ua-nda kala ni vondadi ia ku londekesa o henda iê ku akuenu, ni ku a tangela ia lungu ni henda ni vondadi ia Jihova phala etu. (Matesu 22:34-40) Bhanga ioso phala kuia mu fesa íii.