‘Muéne ua fukunuka.’MATESU 28:6.

1, 2. (a) Ihi ia mesenene kuijiia o atuameni a jingeleja, ni kiebhi Phetele kia tambuijila? (Tala o foto ia dianga) (b) Mukonda diahi Phetele ua zuela sé uôma?

KI KU bhitile semana javulu, kioso kiafú Jezú, o poxolo Phetele ua di bhana ni kizukutisu kia kibuka kia atuameni a ji Judé. Ene a bhangele o ndunge ia ku jibha Jezú. Mu kiki, a kexile ni njinda ia Phetele, mukonda muéne ua sakele diiala uexile kinema. Ene ebhula kua Phetele: “O kubhanga kiki, mua ki bhange ni kutena kuahi, mba mu dijina dia nanhi?” Phetele ua tambuijila sé uôma: ‘Mu dijina dia Jezú Kristu dia Nazalé, mua mu jibhile ku taka, Nzambi anga u mu fukununa ku’alunga, muene mua disanzela o muthu iú uemana bhu pholo ienu bhenhabha.’Ikalakalu 4:5-10.

2 Ande dia ku bhita o maka enhá, Phetele uexile ni uôma, iú ua ditunu Jezú mu veji jitatu. (Marku 14:66-72) Mu kindala kiki, mu veji dia ku kala ni uôma, muéne ua londekesa ku suína bhu pholo ia atuameni a jingeleja. Mukonda diahi? Né muene ni kikuatekesu kia nzumbi ikola, maji Phetele ua dielele kuila Jezú ua kexile ku muenhu.  Mukonda diahi o poxolo ka kexile ni phata? Mukonda diahi etu ué tua tokala ku kala ni kidielelu kia soko?

3, 4. (a) Ihi a bhitile ande dia jipoxolo ja Jezú ku kala ku muenhu? (b) A nanhi a a fukunuine kua Jezú?

3 O jipoxolo a kijidile kuila, o athu afu ku hádia a-nda kua fukununa. Ande dia jipoxolo ku kala ku muenhu, Nzambi ua bhanene ku jipolofeta Ilizeu ni Elija, o kutena kua ku fukununa o athu afú. (1 Jisobha 17:17-24; 2 Jisobha 4:32-37) Saí kizuua, diiala ua fukunuka, kioso o mukutu ué kia u takula mu mbila iu ua di pupu ku ifuba ia Ilizeu. (2 Jisobha 13:20, 21) O Jikidistá ja dianga, a xikinine ku misoso íii kuila ia kidi, kala ki tuene ué mu xikina mu Mak’â Nzambi, kuila ene o kidi.

Nange eie u sanguluka kioso ki u tanga o misoso ia athu a a fukununa kua Jezú

4 Nange eie u sanguluka kioso ki u tanga o misoso ia athu a a fukununa kua Jezú. Mu kifika, xinganeka kiebhi kia divu o mutudi, kioso Jezú kia fukununa o mon’ê umoxielele. (Luka 7:11-15) Xinganeka ué o thembu, kioso Jezú kia fukununa o kilumba. Sé phata, o kikote kia kexile na-kiu o jitata jê, kia bhiluka ku sanguluka, kioso kia mono o mon’a ni muenhu! (Luka 8:49-56) Kisangusangu kiahi kia kexile na-kiu o athu, mu ku mona Lázalu ua mu tunda mu mbila ni muenhu!Nzuá 11:38-44.

MUKONDA DIAHI O DIFUKUNUKINU DIA JEZÚ, KI DI DIFU NI DIFUKUNUKINU DIA ATHU A MUKUÁ

5. Kiebhi o difukunukinu dia Jezú, ki di difuile ni a mukuá a bhitile ku dima?

5 O jipoxolo a kijidile kuila o difukunukinu dia Jezú, ki di difuile ni difukunukinu dia athu a mukuá dia bhitile m’ukulu. O athu a a fukunuine, akexile ni mukutu ua xitu, maji mu ku suluka, a vutuka dingi mu kufua. Jezú ua tambula mukutu ua nzumbi, ka tena ku u buika. (Tanga Ikalakalu 13:34.) Phetele ua soneka kuila, Jezú “a mu jibhila mu xitu, a mu phaphumuina mu nzumbi.” Muéne ué “uaii ku diulu, iú uala ku madilu ma Nzambi. O kuenhoko ni ji-anju, ni makota ma ji-anju, ni mazonda ma mu belesela muène.” (1 Phetele 3:18-22) O difukunukinu dia athu a mukuá, diexile madiuanu, maji o difukunukinu dia Jezú, diexile o madiuanu uonene a moneke.

6. Kiebhi o difukunukinu dia Jezú dia kuatekesa o maxibulu mê?

6 O difukunukinu dia Jezú, dia kuatekesa kiavulu o maxibulu mê. Muéne ka kexile mu a lunga kala kia kexile mu banza o jinguma jê. Mu veji dia kiki, muéne uexile ku muenhu kala muthu mu nzumbi, mu kiki, ki ku kexile muthu mu xitu ueji mu bhanga dingi kima kia iibha.  O difukunukinu diê, dia londekesa kuila muéne uexile Mon’a Nzambi. Mukonda dia ku kijiia kuila muéne uexile ku muenhu, o maxibulu mê, ka luualele dingi, né ngó ku kala ni uôma. Ene a sangulukile mu ku kala ni kidielelu kua muéne. Se Jezú ka mu fukunuine, o vondadi ia Nzambi ki ieji di kumbidila, ni kuila o njimbu iambote ia kexile mu boka o maxibulu ki ieji kala ni valolo.

7. Ihi ia mu bhanga Jezú lelu, ni ibhuidisu iahi nange i tueji bhanga?

7 Tuejiia kuila, Jezú kexile ngó muthu uonene. Jezú uala ku muenhu, muéne ua mu kuendesa o kikalakalu kia ku boka ku mundu uoso. Muéne o Sobha ia Utuminu ua Nzambi ku Diulu, kua kambe ngó, muéne ua-nda zubha o ku iibha kuoso mu ixi ni ku i kitula palaízu, mua-nda tunga o athu ni muenhu ua kalelaku. (Luka 23:43) Ki kueji kala palaízu ni muenhu ua kalelaku, se Jezú ka mu fukunuine. Mu kiki, mukonda diahi tu tena ku xikina ni kidi kioso kuila, Jezú a mu fukununa k’u alunga? O difukunukinu dia Jezú di lombolola ihi phala etu?

Se Jezú ka mu fukunuine, o vondadi ia Nzambi ki ieji di kumbidila, o njimbu iambote ki ieji kala ué ni valolo

JIHOVA UALA NI KUTENA KUA KU TOLOLA O KALUNGA

8, 9. (a) Mukonda diahi o atuameni a Jijudé, a bhingile phala ku langa o mbila ia Jezú? (b) Ihi ia bhitile kioso o ahatu kia bhixila bhu mbila?

8 Kioso Jezú kia mu jibha, o atuameni a ji Judé, ejile kua Pilatu, ia a mu ambele: “Ngana, etu tua lembalala kuma mukua makutu’ó, kia kexile hanji ku muenhu, ua tangele, uixi: Izuua itatu ki i bhita, nga kà fukunuka. Kiki-phe tuma kulanga o mbil’oio ni muanu uoso, katé kizuua kia katatu; phala ki ki bhite kuila jixibulu jê jiia mu usuku hé ji mu nhana, n’a kà tangele o mundu, exi: Ua fukunuka ku’alunga, o makutu á keza-ku ni a kale kota, a diangele-ku ni a kale ndenge.” Pilatu ua a tambuijila uixi: “Masoladi a langa, enu-nâ; ndenu, kà langienu o mbila kioso ki muejiia.” Ene a bhange kienhiki.Matesu 27:62-66.

9 Mu ku mu funda, Jezú a mu tula mu mbila io kandele kiá, ia a xiti-ko ni ditadi dionene. O atuameni a jingeleja ja mesenene kuila, o mukutu ua Jezú u nangenena mu mbila. Maji ki kiene kia xinganekene Jihova. Mu ku bhita izuua itatu, Madiia dia Manda ni Madiia dia mukuá, maxibulu a Jezú, endele ku mbila. Ene a sangele o ditadi a di katula, a mona anju ia xikama ku ditadi. O anju ia bhingi ku ahatu phala ku tala moxi a mbila phala ku mona kuila, ki muala kima. O anju iambela o ahatu: “Muène bhabha kala-bhu; ua fukunuka.” (Matesu 28:1-6) Jezú ua kexile ku muenhu!

10. Kiebhi kia londekesa Phaulu kuila Jezú a mu fukununa?

10 O ia bhitile ku 40 a izuua a kaiela, ia londekesele sé phata kuila, Jezú a mu fukunuine muene. O poxolo Phaulu ua sonekena ku akua Kolindo uixi: “O kima kia kate-ku, ki nga tambulula eme uami, ki nga tuamene ku mi tambuisa-kiu, kien’iki: Kuila Kristu ua fuidile o ituxi ietu kala kia ki soneka mu Mikanda Ikôla. Kuma Muène a mu fundile, mu kizuua kia katatu anga u fukunuka kala kia ki soneka mu  Mikanda; anga u dianga kutukulukila Phetele, hé u tukulukila kiua o kuinhi ni kiiadi. Lua katatu u tukulukila hama jitanu ja axikani bhua-moxi. Ku en’ió, ala-ku kota, ala hanji ni muenhu, suke amoxi-ku-phe afu ue kiá. Uana, ua tukulukila Tiiaku, o tanu, u tukulukila Jipoxolo joso. Kiabhu ene oso, nga sukidila-ku eme, ku ngi tukulukila, kala mona a mu vuala musunda mu nzumbi, o kiene mù vuala akuá ki kiene.”1 Kolindo 15:3-8.

IMA I UANA I TU KUATEKESA KUIJIIA KUILA JEZÚ A MU FUKUNUNA

11. Kiebhi kia bhiti o difukunukinu dia Jezú “kala kia ki soneka mu Mikanda Ikôla?” o dia?

11 O difukunukinu dia Jezú, dia bhitile muene “kala kia ki soneka mu Mikanda Ikôla.” O Mak’â Nzambi a kanene o difukunukinu. Mu kifika, Davidi ua soneka kuila “muthu ué ua mu solo,” Nzambi ka tena ku mu xisa mu Mbila. (Tanga Jisálamu 16:10.) Mu kizuua kia Pendekoxi kia muvu ua 33, Phetele ua jimbulula kuila, o “muthu ué ua mu solo,” uexile Jezú, kioso kiambe: “[Davidi] kia ki mono m’okulu munhá, ua tange o kufukunuka kua Kristu, kuila: Muène ka mu xalesa m’alunga mua tunga o madifundu, o xitu iê kà iehela kusekumuka.”Ikalakalu 2:23-27, 31.

12. Nanhi ua monene Jezú kioso kia mu fukununa?

12 Athu avulu a mono Jezú kioso kia mu fukununa. Mu ku bhita 40 a izuua kioso kia mu fukununa, Jezú ua monekena ku maxibulu mê mu jaludim ia zukamene bhu mbila iê, mu kikoka kia Emaú, ni mu ididi ia mukuá. (Luka 24:13-15) Muéne ua zuelele ni athu mu ubheka-uâ, kala Phetele, mu ithangana ia mukuá ua zuelele ni athu avulu. Jezú ua monekena katé muene, bhu kaxi ka kibuka kia 500 ja athu ndenge. Ki tu tena ku dituna, mukonda athu avulu a mono Jezú kioso kia mu fukununa.

13. Kiebhi o muanhu ua maxibulu ua londekesa kuila ene a kijidile kuma Jezú a mu fukunuine?

13 O maxibulu a boko o difukunukinu dia Jezú. Ene a a zukutisile, a talele hadi, a mukua a a jibha mukonda dia ku boka mu dijina diê. Xinganeka ku maka iâ: Se Jezú ka mu fukunuine, o kuila Phetele ueji suína mu ku di ta mu kiluezu kia ku boka ia lungu ni difukunukinu dia Kristu, ku athu a zembele Jezú, ia a bhangele o ndunge ia ku mu jibha? Phetele ni maxibulu a mukuá, a kijidile kuila Jezú ua kexile ku muenhu, ni kuila, muéne uexile mu kuendesa o kikalakalu kia ku boka. Ku mbandu ia mukuá, o difukunukinu dia Jezú, dia bhana dingi kidielelu kia kolo ku maxibulu mê kuila ene uâ a-nda kua fukununa. Mu kifika, Xitevá uafu ni kidielelu kia ku mu fukununa.Ikalakalu 7:55-60.

14. Mukonda diahi eie u xikina kuila Jezú uala ku muenhu?

14 Etu tuejiia kiambote kuila Jezú ua mu tumina kindala kala Sobha, muene uala ku pholo dia kilunga kia Jikidistá. O kilunga kia Jikidistá kia múia ni ku di bandekesa. O kuila kiki ki kieji bhita, se Jezú ka mu fukunuine mu’alunga? Mu kidi, etu ki tueji kuívua ia lungu ni Jezú, se ka mu fukunuine. Maji etu tu zuela ni kidi kioso kuila Jezú uala ku muenhu, ni kuila muéne ua mu kuendesa o kikalakalu kia ku boka ku mundu uoso.

O DIFUKUNUKINU DIA JEZÚ DILOMBOLOLA IHI PHALA ETU?

15. Mukonda diahi o difukunukinu dia Jezú di tu bhana ku suína phala ku boka?

15 O difukunukinu dia Jezú di tu bhana ku suína phala ku boka. Tundé mu thembu ia Jezú, o jinguma ja Nzambi ene mu bhanga ima ioso ia iibha phala ku  fidisa o kikalakalu kia ku boka, bhu kaxi ka ulongelu ua makutu, ku zuela kia iibha, ujibhangânga, ku talesa hadi ni ku jibha. Maji o Bibidia ia kanene: “Falamenda ioso ioso ióbhange phala ku ku kuama, ia-nda kulueza.” (Izaia 54:17) Etu ki tuala ni uôma ua ió ene mua funhisa kua Satanaji phala ku tu zukutisa. Jezú ua mu tu kuatekesa kala kia tu kanena. (Matesu 28:20) Etu tuala ni kidielelu kia kuila ene ka tena ku tu zozesa!

O difukunukinu dia Jezú di tu bhana ku suína phala ku boka (Tala o kaxi 15)

16, 17. (a) Kiebhi o difukunukinu dia Jezú di londekesa o ima ioso ia longo? (b) Kala ki zuela o divulu dia Nzuá 11:25, kutena kuahi kua bhana Nzambi kua Jezú?

16 O difukunukinu dia Jezú di londekesa o ima ioso ia longo. Saí muthu uene mu di longa o Bibidia ua soneka kuila, se Kristu ka mu fukunuine, o Jikidistá a xikina ku ima ia makutu. O poxolo Phaulu uambe kuila se Jezú ka mu fukunuine, o kikalakalu kia ku boka ni kixikanu kia Jikidistá, ki kieji kala ni valolo. Mu kidi, o madivulu a misoso ia Jezú, eji kala misoso ia malamba ngó, ia lungu ni muthu uambote mukua unjimu, a mu jibha ku jinguma jê. Maji, mukonda Jezú a mu fukununa muene, kiki kilondekesa kuila, ioso ia longo, ia kidi muene.Tanga 1 Kolindo 15:14, 15, 20.

17 Jezú uambe uixi: “Eme ngi difukunukinu ni muenhu. Uoso u ngi xikana eme, né uafu, u kala dingi ni muenhu.” (Nzuá 11:25) O kikanenu kiki kia Jezú, ki bhana kidielelu kuila, kia-nda di kumbidila mu kidi. Jihova ua bhana kua Jezú o kutena kua ku fukununa ió a-nda kala nau ku diulu, ni mazunda a athu a-nda tambula o  muenhu mu ixi. O sata ni difukunukinu dia Jezú, di tu bhana kidielelu kia kuila ku hádia ki kua-nda kala dingi kufua. Mu kiki, tu tena ku kala ni nguzu ia ku bhita mu ibhidi ioso ioso, katé muene ni ku kolokota mu kufua mukonda dia kixikanu!

18. O difukunukinu dia Jezú dia bhana kidielelu kiahi?

18 O difukunukinu dia Jezú, di tu bhana kidielelu kia kuila o athu a-nda kua fundisa, bhu kaxi ka itumu ia henda ia Jihova. Phaulu uambela ku mundu ua athu, o maiala ni ahatu ku mbanza ia Atena kuila, Nzambi ua-nda “kufundisa mundu uoso mu kidi, kua muthu uê ua mu tungula,” ni kuila “Nzambi-iú ua tumu ku k’ijidisa kua ene oso mu ku mu fukununa ku’alunga.” (Ikalakalu 17:31) Nzambi ua solo Jezú phala ku kala mufundixi uetu, etu tu tena ku dielela kuma muéne ua-nda fundisa ni ku iuka ni henda.Tanga Izaia 11:2-4.

Etu, tu bhana valolo ku kidielelu kia difukunukinu, mu kiki, tuala polondo phala ku belesela Jihova

19. O ku xikina o difukunukinu dia Jezú ku tu kuatekesa ku bhanga ihi?

19 Etu tua mesena o ku bhanga o vondadi ia Nzambi, mukonda tua xikina ku difukunukinu dia Jezú. Se Jezú ka bhakuile o muenhu uê ni ku mu fukununa, etu tueji nangenena mu kituxi ni mu kufua. (Loma 5:12; 6:23) Ki tueji kala ni kidielelu, tueji zuela ngó: ‘Tu dienu-tu, tu nuenu-tu, mukonda a tu kane kufua.’ (1 Kolindo 15:32) Etu ki tu dielela ngó ku muenhu iú, mu kudia ni kúnua. Maji etu, tu bhana valolo ku kidielelu kia difukunukinu, mu kiki tuala polondo phala ku belesela Jihova.

20. Kiebhi o difukunukinu dia Jezú, di londekesa o kutena kua Nzambi?

20 O difukunukinu dia Jezú, dilondekesa o kutena kua Jihova, ió “mukua kubhandulula oso a mu sota ni muanu.” (Jihebeleu 11:6) Jihova ua londekesa o kutena kuê kua unéne ni unjimu, mu ku fukununa Jezú phala ku mu bhana o muenhu ku diulu sé kufua. Nzambi ua londekesa ué o uhete uê, mu ku kumbidila o kikanenu kiê. Jihova ua kanena “mbutu” ia katunda, ieji batula o maka a lungu ni ungana ua ku tumina. Phala ku kumbidila o kikanenu kiki, o “mbutu,” Jezú, ua tokalele kufua ni ku mu fukununa.Dimatekenu 3:15.

21. O kidielelu kia difukunukinu kilombolola ihi phala eie?

21 Etu tu sakidila Jihova mukonda dia ku tu bhana o kidielelu kia difukunukinu. O Bibidia iambe: “Talesa, kindala o balaka ia Nzambi iala mu’axaxi ka athu! Nzambi muène uenda jinga-nâ, u kala Nzambi iâ. Muène u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.” O kikanenu kiki, a ki bhanene ku poxolo Nzuá, a mu ambele kuila: “Kiki soneka-kiu! Kuma maka ià a kidi, a tokala ku a dielela.” Nanhi ua tangela o maka enhá mu kisuma kua Nzuá? Jezú Kristu muéne ua bhanene o kisuma kiki!Dijingunuinu 1:1; 21:3-5.