‘O kalunga, o nguma ia sukidila-ku, a-nda ku i buika.’1 KOLINDO 15:26.

1, 2. Kiebhi kiexile o muenhu ua Adá ni Eva ku dimatekenu? Ibhuidisu iahi i moneka lelu?

KIOSO kia bhange Adá ni Eva, ene ka kexile ni jinguma. Ene a kexile mu palaízu, exile athu a iuka. Ene exile ni ukamba uambote ni Jihova, mukonda exile an’ê. (Dimatekenu 2:7-9; Luka 3:38) Nzambi ua a bhanene kikalakalu kia dikota. (Tanga Dimatekenu 1:28.) Thembu kuxi a tokalele ku kala ku muenhu phala ku bhanga o kikalakalu kiki? Ene keji bhinga ku kala ni muenhu ua kalela-ku phala ‘ku izalesa o ixi ioso, ni ku i tolola,’ maji, eji bhinga ku kala ni muenhu ua kalela-ku phala ku langa o “iama ioso ia muenhu iendela ku mavu.” Ene eji bhanga o kikalakalu kiki, katé ku hádia ni hádia.

2 Mukonda diahi lelu o ima ia lunguluka? Mukonda diahi tuala ni jinguma javulu, ja mesena ku katula o ku sanguluka kuetu, kala o kalunga, o nguma ietu ia dikota? Kiebhi Nzambi kia-nda buika o jinguma jiji? O itambuijilu ia ibhuidisu íii, tu i sanga mu Bibidia. Tua-nda di longa o itambuijilu ia ibhuidisu íii, mu milongi íii.

 KITENDELESU KIA HENDA

3, 4. (a) Kitumu kiebhi kia bhana Nzambi kua Adá ni Eva? (b) Mukonda diahi ene a tokalele ku belesela?

3 Né muene Adá ni Eva, a a bhangele phala ku kala ni muenhu ua kalela-ku, maji ka a bhangele ni muenhu u a fidisa o ku fua. Phala ku kala ku muenhu, ene a bhingile ku bhuima, ku nua, ku zeka ni kudia. Phala ku kala ku muenhu, a bhingile ué ku kala ni ukamba uambote ni Jihova, o Mubhani ua muenhu uâ. (Matendelelu 8:3) Ene eji kala ni muenhu ua kalela-ku se a belesele Jihova. Ande dia ku bhanga Eva, Jihova ua tendelesele Adá: “Ku mixi ioso mu dibhia u die-ku kioso ki ua mesena; maji ku muxi-phe ua kuijiia kia uabha ni kiaiibha, kana kudia-ku; mukonda o kizuua ki ua kà dia-ku, ijiia na-kiu kuma ua kà fua muene.”Dimatekenu 2:16, 17.

4 O ‘muxi ua kuijiia kia uabha ni kia iibha’ ua londekesa kuila, Nzambi muene ua kexile ni ujitu ua ku sola o ima iambote ni ima ia iibha. Adá uejidile o kima kiambote ni kia iibha, mukonda a mu bhangele mu kidifuanganu kia Nzambi, muéne ua kexile ué ni kitongoluelu kia zele. O muxi ua kexile mu lembalesa Adá ni Eva kuila, ene a bhingile ku a endesa mu itendelesu ia Jihova phala kuenda kiambote. Se a dile ku muxi, eji londekesa kuila ka ‘bhindamena o itendelesu’ ia Nzambi. Mu kiki, ene ni an’ê eji fua, kala kia tangele Nzambi.

KIEBHI KIA MONEKA O KALUNGA MU IXI?

5. Mukonda diahi Adá ni Eva a xibhaka Jihova?

5 Adá ua tangela Eva o kitumu kia bhanene Jihova. Eva uejidile kiambote o kitumu kiki mukonda, mu ku bhita kithangana, muéne ua ki bhitulula. (Dimatekenu 3:1-3) Muéne ua bhitulula o kitumu kiki kua Satanaji, kioso kia zuela nê bhu kaxi ka nhoka. Satanaji uehela o hanji iê ia ku kala ni ku tena ni ku di tumina, ku di bandekesa. (Sokesa ni Tiiaku 1:14, 15) Satanaji ua tangela Eva kuila, Nzambi mukua makutu, ni kuila se ua xibhakele Nzambi keji fua, maji ueji sokela ni Nzambi. (Dimatekenu 3:4, 5) Eva ua mu xikina, iu uadi o kibundu, mu ku suluka ua bhana ué kua Adá. (Dimatekenu 3:6, 17) Satanaji ua mu nganala. (Tanga 1 Timote 2:14.) Adá uejidile kuila kituxi, maji muéne uevu o dízui dia muhatu uê. Nange o nhoka ia monekene kuma dikamba, maji o muthu ua kexile mu zuela bhu kaxi ka nhoka, uexile nguma. Muéne uejidile o ibhidi ieji bheka o makutu’ê.

6, 7. Kiebhi Jihova kia fundisa Adá ni Eva?

6 Adá ni Eva a bhukumukina o Nzambi ia a bhanene o muenhu ni ima ioso iambote ia kexile na-iu. Mu kidi, Jihova uejidile  o ima ioso ia bhitile. (1 Malunda 28:9; tanga Jisabhu 15:3.) Maji muéne uehela Adá, ni Eva, ni Satanaji ku londekesa se a mu zolele muene mba kana. Muéne ua divu kia iibha mukonda, uexile Tata iâ. (Sokesa Dimatekenu 6:6) Maji mukonda muéne mufundixi, ua a fundisa.

Jihova uehela Adá ni Eva, ni Satanaji, ku londekesa se a mu zolele muene mba kana

7 Kia lungu ni muxi ua kuijiia kia iibha ni kia uabha Nzambi ua ambela Adá: “O kizuua ki ua kà dia-ku, ijiia na-kiu kuma ua kà fua muene.” Nange Adá ua banzele, kuila ueji fuá ande dia ku boba o dikumbi. Maji mu ku bhita kithangana mu kizuua kieniókio, Jihova ua zuela ni Adá ni Eva. (Dimatekenu 3:8) Mukonda muéne mufundixi ua iuka, ua dianga ku a evua. (Dimatekenu 3:9-13) Mu ku suluka ua a xindi o kufuá. (Dimatekenu 3:14-19) Se Nzambi ua a jibhile mu kithangana kieniókio, o vondadi iê phala o athu, ki ieji di kumbidila. (Izaia 55:11) Sumbala Adá ni Eva a mateka ku di bhana ni ibhidi mu kithangana kieniókio, maji Nzambi ka a jibha, ua a ehela phala ku vuala an’a eji zediua ku muenhu. Tundé o kizuua Adá ni Eva kia tele o kituxi, Nzambi ua kexile mu ku a mona kála afu kiá. Jihova u mona o 1.000 ia mivu kala kizuua kimoxi ngó, mukonda dia kiki, phala muéne Adá ni Eva ka bhitile né ngó “kizuua” kimoxi ku muenhu.2 Phetele 3:8.

Tundé o kizuua kia tele Adá ni Eva o kituxi, Nzambi ua kexile mu ku a mona kála afu kiá

8, 9. Ibhidi iahi ia bheka o kituxi kia Adá ku an’ê? (Tala o foto ia dianga.)

8 O kuila o an’a a Adá ni Eva eji di bhana ué ni ibhidi mukonda dia kituxi kia tele o jitata jâ? Sé phata, ene eji di bhana ué ni ibhidi. O divulu dia Loma 5:12 di zuela: “Mukuâ ni kia bokona o ituxi mu ngongo ku muthu umoxi, o kufua kù kuejila mu ituxi; kiene ue kia bhiti o kufua ku thandu dia athu oso, kuma ene oso ituxi a i te.” O poxolo Phaulu uambe ué: “Mu kuxibhaka kua muthu umoxi, mundu a di bhangele akua ituxi.” (Loma 5:19) Abele, o diiala dia fiiele, muene ua diangele o ku fua. (Dimatekenu 4:8) Mu ku suluka o an’a mukuá ni alaula a Adá a kuka anga afu ué. O athu a lundula o kituxi ni kalunga, ene ka tena ku bhuluka bhu maku a jinguma jiiadi jiji. Ki tuejiia kiambote kiebhi o an’a a Adá kia lundula o kituxi ni kalunga, maji tu tena ku mona o hadi i bheka o kituxi ni kalunga.

9 Mukonda dia kiki, o Bibidia i sokesa o kituxi ni kalunga ni “kivunga-mutué mua mu suamena akua jixi,” ki lombolola kima kia ‘di futu na-kiu o athu oso.’ Se-ku muthu u tena ku lenga o kituxi ni kalunga. Mukonda dia kiki, o Bibidia i zuela kuila ‘ene oso a fuila mua Adá.’ (1 Kolindo 15:22) Mu kiki, Phaulu uebhula: “Nanhi u ngi kudila ku mukutu iú ua mu ngi bheka mu kalunga.” (Loma 7:24) O kuila  kua kexile muthu ueji tena ku bhulula Phaulu? *—Tala ku luiji.

KI KUA-NDA KALA DINGI KITUXI NI KALUNGA

10. (a) Iebhi o ibatulu ia Bibidia i londekesa kuila Jihova ua-nda buika o kalunga? (b) Ihi i tu longa o ibatulu íii ia lungu ni Jihova ni Mon’ê?

10 Mu kidi, Jihova ua kexile ni kutena kua ku bhulula Phaulu. O Bibidia i zuela: “O kalunga ua ka ká buisa-ku muene nzaká, kienhiki Jihova ua kà kondona o masoxi mu pholo joso.” (Izaia 25:8) Kála o tata u bhanga ioso phala ku batula o maka a mu bhangesa o tuana tuê ku tala hadi, anga u kondona o masoxi mâ, Jihova uala ué ni hanji ia ku buika o kalunga. Jezú ua mu kalakala nê phala ku buika o kalunga. O divulu dia 1 Kolindo 15:22 di zuela: ‘Ene oso a phaphumukina mua Kristu.’ Phaulu ua tambuijila ué o kibhuidisu kiê kiambe: “Nanhi u ngi kudila ku mukutu iú ua mu ngi bheka mu kalunga.” Muéne uambe: “Nga sakidila-phe Nzambi, kuma sai-ku kubhanduluka mua Jezú Kristu, Ngana ietu!” (Loma 7:25) Mu kiki, tu mona kuila Jihova ka zembe o athu mukonda dia kituxi kia Adá ni Eva. Jezú, ua bhangele Adá ni Eva kikuatekesu kia Jihova, ua zolo ué o athu. (Jisabhu 8:30, 31) Maji kiebhi kieji bhulula o athu ku kituxi ni kalunga?

Jihova ka zembe o athu mukonda dia kituxi kia Adá ni Eva

11. Ihi ia bhange Jihova phala ku bhulula o athu?

11 Kioso Adá kia te o kituxi, Jihova ua mu xindi o kufuá. Mukonda dia kiki, o athu oso a lundula o kituxi ni kalunga. (Loma 5:12, 16) O divulu dia Loma 5:18 di zuela: “Kala kiejile o mulonga ku thandu dia athu oso mu kituxi kimoxi ngó.” Ihi ia tokalele ku bhanga Jihova phala ku bhulula o athu, ni ku batula o maka ni iuka kuoso? Jezú ua tambuijila o kibhuidisu kiki kioso kiambe kuila, muéne uéza phala “kubhana o muenhu uê mu kukula mundu.” (Matesu 20:28) Mukonda Jezú uexile muthu ua iuka, muéne ua kexile ni kutena kua ku bhana sata ia kukula. Kiebhi o sata íii i batula o maka ni ku iuka kuoso?1 Timote 2:5, 6.

O muenhu ua iuka, a u futu ué ku muenhu ua iuka

12. Kiebhi o kukula kua batula o maka ni ku iuka kuoso?

12 Jezú kuma uexile muthu ua iuka, muéne uexile ni kutena kua ku kala ni muenhu ua kalelaku. Kiki kiene kia mesenene Jihova phala Adá. Mukonda dia henda iê kua tat’é ni ku muiji ua Adá, Jezú ua satela o muenhu ué, ua difu ni muenhu ua texi Adá. Mu ku suluka, Jihova ua fukununa mon’é ku muenhu, kala muthu mu nzumbi ku diulu. (1 Phetele 3:18) O kukula kua batula o maka ni ku iuka, mukonda o muenhu ua iuka, a u futu ué ku muenhu ua iuka. Jezú ua bhange  ioso phala o muiji ua Adá, a kale ni muenhu ua kalelaku. Kiki, kiene kia bhangesa Phaulu kuixana Jezú dia “Adá ia sukidila-ku,” lelu, muéne uala ni muenhu ku diulu.1 Kolindo 15:45.

13. Ihi ia-nda bhanga o “Adá ia sukidila-ku,” kua ió afu kiá?

13 Kua kambe ngó bhofele o “Adá ia sukidila-ku,” uanda bhana muenhu ua kalelaku ku muiji uoso ua Adá. Kiki kia-nda bhita katé ku athu afú kiá ukulu. Ene a-nda kua fukununa phala ku kala ku muenhu mu ixi.Nzuá 5:28, 29.

Abele, o muthu ua diangele o kufua, a-nda mu fukununa, mukonda dia sata ia kukula kua Jezú (Tala o kaxi 13)

14. Kiebhi o athu kia-nda kituka athu a iuka?

14 Kiebhi o athu kia-nda kituka athu a iuka? Jihova ua bhange nguvulu ku diulu, phala ku bhanga o kikalakalu kiki. O a-nda tumina, Jezú ni 144.000 ia athu a a solo mu ixi. (Tanga Dijingunuinu 5:9, 10.) Mukonda o 144.000 dia athu, exile ué athu akua ituxi, ene a-nda kuijiia ni ku tendela kiambote o ibhindamu ia athu a-nda tunga mu ixi. Mu 1.000 ia mivu, Jezú ni Jikidistá a undu a-nda kuatekesa o athu, n’a kale athu a iuka.—Dijingunuinu 20:6.

15, 16. (a) Mu Bibidia ihi i lombolola o kizuelu ‘O kalunga, o nguma ia sukidila-ku?’ Thembu kuxi ‘a-nda ku i buika’? (b) Kala kilondekesa o divulu dia 1 Kolindo 15:28, ihi ia-nda bhanga Jezú?

15 Kioso kia-nda bhua o 1.000 ia mivu,  o athu a belesela a-nda kala athu a iuka, ka-nda fua dingi. Phaulu uambe: “Uila ene oso kia fuila mua Adá, kiene ue kia phaphumukina ene oso mua Kristu. ‘Maji ene oso mu umoxi-umoxi: Kristu muéne ua diangela kua ene oso, hé ku kaiela oso akua Kristu, muéne hinu kiá kéza. Kiene kiua kia kéza o dizubhilu. Kristu hinu ua kà zubha-ku o mautuminu oso a nzumbi, ni maungana moso, ni nguzu joso, hé ungana uoso ua kà u bhakuila Nzambi, muéne Tata. Kuma Kristu muene ua bhingi u kala-ku ku ungana, katé Nzambi kia tolola o jinguma jê joso, hé ua kà ji ta bhoxi dia inama ia Kristu muene. O kalunga o nguma i sukidila-ku a-nda ku i buika.” (1 Kolindo 15:22-26) Mu kithangana kiki, o kalunga ku tua lundula kua Adá a ka buika. O “kivunga” kiki, kivunga o athu oso, ki kia-nda kala-ku dingi katé ku hádia ni hádia.Izaia 25:7, 8.

Kioso kia-nda bhua o 1.000 ia mivu, o athu a belesela a-nda kala athu a iuka, ka-nda fua dingi

16 Phaulu uambe: “kioso kia kà zubha ima ioso kutolokela Kristu, hé i kala bhoxi dia ungana uê, kiene ue kiua, o Mona muene, kia kà di tula bhoxi dia ungana ua Nzambi, ió ua tena kutolola o ima ioso, iú ua i tula bhoxi dia ungana ua Kristu. Kienhokio kiene kiua Nzambi kia kà kala mù tumina sé mbambe ku thandu dia ima ioso.” (1 Kolindo 15:28) Mu kithangana kiki, Jezú ua-nda kumbidila kiá o ima ioso ia lungu ni utuminu uê. Mu kiki, muéne ua-nda bhana o Ungana kua Jihova ni ku mu londekesa o athu oso a iuka mu ixi.

17. Ihi ia-nda bhita ni Satanaji?

17 Ihi ia-nda bhita ni Satanaji, ió ua bhekela o hadi ioso ku athu mu ixi? O kitambuijilu tu ki sanga mu divulu dia Dijingunuinu 20:7-15. Mu disukilu dia 1.000 ia mivu, Satanaji a-nda mu ehela phala ku fikisa ku nganala o athu a iuka mu polova ia sukina. Mu ku suluka, Satanaji ni akaiedi’ê, a-nda kua buika. O ku buika kuku, a ku ixana “o kùfua kua kaiadi.”(Dijingunuinu 21:8) O ku fua kuku, ka-nda ‘ku ku buika,’ mukonda oso afu mu “kùfua kua kaiadi” ka tena dingi ku vutuka ku muenhu. Se tu kolokota mu ufiiele uetu kua Jihova, ki tua-nda thandanganha, mu ku banza kuila tu tena o kufua, mu “kùfua kua kaiadi.”

Athu oso, a-nda kala athu a iuka, mu kiki, a-nda kala polondo phala Jihova kua bhana o muenhu ua kalelaku

18. Kiebhi o kikalakalu kia bhanene Nzambi kua Adá kia-nda di kumbidila?

18 Athu oso, a-nda kala athu a iuka, mu kiki, a-nda kala polondo, phala Jihova kua bhana o muenhu ua kalelaku. O jinguma joso jene mu fidisa o athu ku sanguluka, ka-nda kala-ku dingi. O kikalakalu kia bhanene Nzambi kua Adá, kia-nda di kumbidila sé muéne ku kala-mu. O muiji ua Adá a-nda sanguluka mu ku langa o ixi ni iama. Tu tena ku sanguluka mu kuijiia kuila, kua kambe ngó bhofele o kalunga, o nguma ia sukidila-ku a-nda ku i buika’ kua Jihova!

^ kax. 9 O divulu Estudo Perspicaz das Escrituras di zuela kuila, kioso o jingijiie kia jimbulula se mukonda diahi o athu a kuka anga a fuá, ka jimbulula kiambote o maka. Ene ka xikina kuila o Mubhangi ua ima ioso mu ngongo, muene ua xindi o kufua ku jitata jetu ja dianga mukonda dia kituxi. Mukonda dia kiki, ene ka tena kuijiia kiambote o maka enhá.Volume 3, página 782.