JINGELEJA javulu mu ngongo kala o Ngeleja ia Katólika, ni ia Ortodoxa, Budista ni jingeleja ja mukuá dingi, ene mu jijidika o atuameni a ngeleja ni akunji’â kukala makudi. Maji athu avulu ene mu mona kuila, o kijila kiki kiene mu bheka milonga iavulu ia undumbu bhu kaxi ka atuameni a jingeleja.

Mukonda dia kiki, kima kiambote kudibhuidisa, o kuila o Mikanda Ikôla i jijidika o Jikidistá kukala makudi? Phala kutambuijila o kibhuidisu kiki, tua-nda dilonga o dimatekenu dia kijila kiki ni ihi i banza Nzambi ia lungu ni maka enhá.

MUSOSO UA KIJILA KIA UKUDI MU NGELEJA

O divulu Enciclopedia Británica di tanga kuila, o ukudi “ulombolola kukala sé kukazala, sé kuzeka ni muhatu mba diiala, kioso o muthu kiaia ni kukumbidila o ukunji ua ngeleja.” Mu diskursu dia bhangele ku muvu ua 2006 phala o Isengele iê mu Loma, o Papa Bento XVI uambe kuila o ukudi “ki kijila kia lelu kana, kia tundu ukulu kioso kia bhiti o thembu ia Jipoxolo.”

Maji ku hama ia dianga, mu ilunga ia Jikidistá ki mu kexile kijila kia ukudi. Mu kidi, o poxolo Phaulu ua tungile ku hama ia dianga, ua dimuine o jiphange jê mu nzumbi kuila mu kilunga mueji moneka mala eji zuela ima i “sendula” ni ku “kidika o kukazala.”1 Timote 4:1-3.

O kijila kia ukudi kia mateka ku hama ia kaiadi mu jingeleja ja “Jikidistá,” mu kubhita thembu ieza mu kala o Ngeleja ia Katólika ia Loma. Sai divulu di zuela ia lungu ni ukudi mu jingeleja, diambe kuila, mu thembu ienióio, “mu Utuminu ua Loma a mateka kubhana ijila iavulu i fidisa o mala mba ahatu kuzeka kumoxi.”

 Mu mivu ia kaiela-ku, o Jitata ja Ngeleja ambe kuila o akunji mba atuameni a ngeleja, a tokala kukala makudi. Mudiá, o ukexilu ua diiala ni muhatu kuzeka kumoxi, ukexilu ua ufusa, ki u fuamene ni ikalakalu ia kexile mu bhanga mu ngeleja. Maji o divulu Enciclopedia Británica iambe kuila “mu 10 dia hama, jipadele javulu katé muene ni jibispu ja kexile ni ahatu.”

O kijila kia kuila o atuameni a Ngeleja a tokala kukala makudi, a ki kôlesa mu Kiônge kia bhiti mu mbonge ia Latrão ia bhiti ku muvu ua 1123 ni 1139, mu ixi ia Loma, katé lelu o Ngeleja ia Katólika ia Loma i xikina ni kidi kioso o kijila kia ukudi. O kijila kiki a ki bhangele phala kufidisa o jipadele ja kazala, kubhana o ungana mba jimbote ja ngeleja ku tuana tuâ.

KIEBHI NZAMBI KIA MONA O UKUDI

O ibanzelu ia Nzambi ia lungu ni ukudi io tange kiambote mu Maka mê, o Bibidia. Mu Bibidia tu sanga-mu o izuelu ia Jezú ia lungu ni ió akexile makudi kála kiexile muene, “mukonda dia Utuminu ua Diulu.” (Matesu 19:12) O poxolo Phaulu ua zuela ue ia lungu ni Jikidistá a solo kukaiela o phangu iê ia ukudi “mukonda dia Njimbu Iambote.”1 Kolindo 7:37, 38; 9:23.

Maji Jezú ni Phaulu ka tumina o akunji kukituka makudi kana. Jezú ua zuela kuila ko athu oso a tena kukala makudi. Mu kiki ko akaiedi’ê oso ala ni ujitu iú. Kioso Phaulu kia soneka ia lungu ni “makudi a an’a ilumba,” muene uambe: “Ki ngala ni kijila kia ngi bhana Ngana. Maji ngi mi longesa-phe kioso ki nga fika.”Matesu 19:11; 1 Kolindo 7:25.

O Bibidia i tu londekesa ue kuila poxolo Phetele ni Jikidistá javulu ku hama ia dianga, a kazalele. (Matesu 8:14; Marku 1:29-31; 1 Kolindo 9:5) Mu kidi, mukonda dia ufusa ni undumbu mu Utuminu ua Loma mu izuua ienioio, Phaulu ua soneka kuila o kafunga, se dikaza, ua tokalele kukala ni “muhatu uê umoxi,” ni “kubhangesa kuila an’ê a kala mu ku mu tumaka ni ujitu uoso.”1 Timote 3:2, 4.

O izuelu íii ki i lombolola kuila o makaza ka tokalele kuzeka kumoxi, mukonda o Bibidia iamba kuila “o diiala di bhange muhatu m’onzo o mbote ia mu tokala ku i bhana” ni kuila o makaza “kiiadi kiâ kana muthu u di tuna mukuá.” (1 Kolindo 7:3-5) Mu kidi, Nzambi ka tumina o jiselevende jê kukala makudi, ni kuila ki kijila phala o Jikidistá kana.

MUKONDA DIA KUBOKA O NJIMBU IAMBOTE

Se o kukala dikudi ki kijila phala o Jikidistá, mukonda diahi-phe Jezú ni Phaulu a ximana kiavulu o ukudi? Mukonda o muthu uala dikudi, u kala ni ithangana iavulu phala kutula o njimbu iambote ku athu. Kuma o makudi ka thandanganha kiavulu ni ima kala ki bhanga o makaza, ene a tena kudibhakula dingi mu sidivisu ia Nzambi.1 Kolindo 7:32-35.

Tala o musoso ua Davidi, ua tungile mu Mbanza ia Mexico, ua kexile mu nganhala kitadi kiavulu maji ua xisa o salu iê iu uai mu ixi ia Costa Rica mu longa o Bibidia ku athu. O kuila Davidi ua tenene kubhanga kiki mukonda dikudi? Muene ua tambuijila: “Kiene muene. Kia bhonzele kiavulu kukala mu ixi iengi, maji kuma nga kexile ubheka, ki ngi lalekele kiavulu phala kuiji-dila.”

Kalaudia, Kidistá dikudi, uai mu tunga mu kididi kia bhingile aboki, uambe kiki: “Nga uabhela kiavulu o sidivisu iami kua Nzambi. Kioso ki ngi mona o lukuaku lua Nzambi, o kixikanu ni ukamba uami ni muene u kola dingi.”

“Ki kale se ua kazala mba u dikudi, ua-nda sanguluka se u sidivila Jihova Nzambi ni muxima ué uoso.”Kalaudia

O ukudi ki u tokala kukala kima ki xina o muthu kana. Kalaudia uambe dingi kiki: “Ki kale se ua kazala mba u dikudi, ua-nda sanguluka se u sidivila Jihova Nzambi ni muxima ué uoso.”Jisálamu 119:1, 2.