Mona kilumba u mona dixi dia mu tunda mu ditenda, dia mu di muanga ku diulu kala matuta. Mu kiki, muene u banza kuila, o ditenda a dibhange phala kubhanga matuta. Kukamba kutendela kiambote, kala kia bhange o mona iú ki tu bhangesa kuolela. Maji se tu kamba kutendela kiambote mu ima ia makota ku muenhu, kubheka maka. Mu kifika, se ku tange kiambote o dijina dia milongo, kutena ku kubhekela maka a dikota.

Kukamba kutendela kiambote o maka a lungu ni Nzambi kubheka dingi maka a dikota. Mu kifika, athu avulu ka tendela kiambote o ulongelu ua Jezú. (Nzuá 6:48-68) Mu veji dia kubhana mátui, ene a ditunu o maka oso a longo Jezú. Kima kiaiibha!

O kuila eie uene mu tanga o Bibidia phala ku kuendesa? Se kiene, kima kiambote. Maji o kuila sai kiluezu mu kukamba kutendela o Bibidia? Kiki kiene mu bhita ni athu avulu. Tala ima itatu athu kene mu i tendela kiambote mu Bibidia.

  • Amoxi ene mu tendela kiaiibha o kitumu kia Bibidia kia ku “xila Nzambi mba ku mu kuatela uôma.” Ene amba kuila, o kitumu kiki kilombolola kukala ni uôma uavulu kua Nzambi mba kuteketa. (Ndongixi 12:13) Maji Nzambi ka mesena kuila abhezi’ê a kala ni ibanzelu kala íii. Muene uambe: “Kana kukala ni uoma, kuma eme ngala bhuamoxi n’eie; kana kubhuuama, mbata eme ngala ngi Nzambi ié; eme ngi ku suinisa, hé ngi ku kuatekesa.” (Izaia 41:10) Kukala ni uôma ua Nzambi kilombolola, ku mu xila kiavulu ni ku mu ximana.

  • O kuila o ixi a-nda i buikisa ni túbhia?

    Sai athu kene mu tendela kiambote o izuelu íii ia Bibidia: “Ima ioso iala ni kithangana kiê kia i xindila Nzambi, . . . sai thembu ia kuvuala, ni thembu ia kúfua.” Ene amba kuila Nzambi ua xindi kiá o kizuua kala muthu kia-nda fua. (Ndongixi 3:1, 2) Maji mu kidi, o izuelu íii ia mu londekesa ngó o ukexilu ua muenhu uetu, kuila u jimuka. O Mak’â Nzambi a longa kuila o ima i tu sola i tena kubandekesa o muenhu mba ku u tolesa. Mu kifika o Bibidia iamba: “Uoma ua Jihova uia ni kubandekeza ku izuua.” (Jisabhu 10:27; Jisálamu 90:10; Izaia 55:3) Kiebhi-phe? O kuxila o Mak’â Nzambi kua-nda tu kuatekesa kuxisa o maukexilu aiibha, kala o uhôlua ni kubhanga undumbu.—1 Kolindo 6:9, 10.

  • Sai athu kioso kia tanga mu Bibidia kuila o diulu ni ixi “ia xikamena tubhia,” ene a banza kuila Nzambi ua-nda buikisa o ixi ioso. (2 Phetele 3:7) Maji Nzambi ua kanena kuila o ixi mu tuala nuka a-nda i buikisa. Nzambi “ua tena kutula madisesa ma’xi katé ia kuata, ki i xikina ku i lundumuna.” (Jisálamu 104:5; Izaia 45:18) Mu kidi o ima iaiibha ia mundu iú iene ia-nda buika, ia-nda buika katé ku hádia ni hádia kala mu túbhia. Maji o kizuelu maúlu kilombolola o diulu diezala ni jithethembua mba o kididi kua tungu Nzambi. O kididi kiki ki kia-nda buika.

MUKONDA DIAHI O BIBIDIA KENE MU I TENDELA KIAMBOTE?

Kala ki ua mono mu ifika íii, athu avulu kene mu tendela kiambote o ima iene mu tanga mu Bibidia. Maji mukonda diahi Nzambi uene mu kuehela o ima íii kubhita? A mukuá ene mu banza kiki: ‘Se Nzambi uala ni unjimu uonene, muene ua tokalele ku tu bhana divulu diosoneke ni izuelu ia bhebhuluka, phala athu oso a tene ku di tendela kiambote. Mukonda diahi muene ka bhange kiki?’ Tala o maukexilu atatu a bhangesa athu kukamba kutendela kiambote o Bibidia.

  1. O Bibidia a i soneka phala ku i tendela ku athu a lenduka, a mesena kudilonga. Jezú uambe kua Tat’ê: “Nga ku ximana Tata, Ngana ia diulu ni ixi! Mukonda im’iíi ua i suekela jihete ni jinjimu,  maji ua i tukuluila ana-ndenge ni iá kejiia kima.” (Luka 10:21) O Bibidia a i soneka mu ukexilu uambote phala ió ala ni muxima uazele, a tene kutendela o njimbu iê. Athu ala ni ukumbu—ene mua exana “jihete ni jinjimu,”—ene mu tendela kiaiibha o Bibidia. Maji o athu ene mu tanga o Bibidia ni muxima uazele a difu ni “ana-ndenge”—alenduka ala ni hânji ia ku i tendela—a a kuatekesa kutendela kiambote o njimbu ia Nzambi. Nzambi ua tumina kusoneka o Bibidia mu ukexilu ua katunda!

  2. O Bibidia a i sonekena athu a sota o kikuatekesu kia Nzambi phala kua longa. Jezú ua londekesa kuila, athu a bhingile kikuatekesu phala kutendela kiambote o milongi ia kexile mu longa. Kiebhi ene kieji tambula o kikuatekesu? Jezú ua lomboluela uixi: “O mukuatekexi ió-phe, muène muène Nzumbi Ikôla, a-ndu mu tumikisa kuala Tata mu dijina diami, muène u mi longa ima ioso.” (Nzuá 14:26) Nzambi u bhana o nzumbi iê ikôla—o nguzu iê ilenda ioso—phala kukuatekesa o athu kutendela ima iene mu tanga mu Bibidia. Maji Nzambi kene mu bhana o nzumbi iê ikôla kua ió kene mu dielela kua muene, mu kiki o milongi ia Bibidia a i mona kala ia bhonzo. O nzumbi ikôla iene mu kuatekesa ué o Jikidistá ejiia kiambote o milongi ia Bibidia, phala kukuatekesa o athu a mesena kutendela o Bibidia.Ikalakalu 8:26-35.

  3. Sai jimbandu ja Bibidia, athu a tena ngó ku ji tendela mu kithangana kia xindi Nzambi. Mu kifika, o polofeta Daniiele, a mu tumine kusoneka kikanenu kieji dikumbidila ku hádia. O anju ua mu tangela: “Daniiele, maka ià jika-u a suke bhenhabha; jika ue idimbu ku divulu didi, katé bhua kà suka o thembu.” Ku jihama javulu ja mivu, athu a tange o divulu dia Daniiele, maji ka di tendela kiambote. Katé muene ni Daniiele, ka tendela o maka a mukuá a sonekene muene. Muene ni kulenduka kuoso ua zuela: “Eme-phe kia zuel’iki nga k’ivu maji ki kia ngi jimbulukila.” Maji kupholo dia kuenda o athu eji tendela kiambote o kikanenu kia Nzambi kia soneka Daniiele, maji mu kithangana ngó kia tokala kia xindi Nzambi. O anju ia zuela: “Katuka, Daniiele, mbata mak’ama a ma jika, ia ate-ku kidimbu katé kia k’eza o thembu ia kà sukidilá-ku.” Nanhi ueji tendela o kikanenu kia Nzambi? “Akua phulu né ngó umoxi ka kà tena kutetuluka; maji oso ala jinjimu, kia kà a tetulukila muene.” (Daniiele 12:4, 8-10) Mu kienhiki, Nzambi kene mu lombolola jimbandu ja Bibidia ande dia kubhixila o kithangana.

O kuila m’ukulu o Jimbangi ja Jihova ka tendela kiambote o milongi ia Bibidia mukonda ki kiexile luua o kithangana kia xindi Nzambi? Kiene. Maji kioso kia bhixila o thembu ia Nzambi kulombolola kiambote o maka, o Jimbangi ja Jihova a lungulula o ibanzelu iâ ni lusolo. Ene a xikina kuila mu kubhanga kiki a mu kaiela o phangu ia jipoxolo ja Kristu, ni kulenduka kuoso a xikinine kulungulula o ibanzelu iâ, kioso Jezú kia kexile mua bazela.Ikalakalu 1:6, 7.

O kibanzelu kia mona kilumba kia lungu ni matuta, kilombolola kukamba kutendela kiambote. Maji o milongi ia Bibidia ia beta kukala ni valolo ku muenhu ué. O njimbu ia Bibidia iala ni valolo ia dikota. Mu kiki kima kiambote kusota kikuatekesu phala ku i tendela. Sota ió ene mu tanga o Bibidia ni kulenduka kuoso, athu a dielela mu nzumbi ikôla ia Nzambi phala kutendela o Bibidia, athu a xikina kuila tuala mu izuua isukidila-ku, ni kuila Nzambi ua mesena, tu tendela kiambote o Bibidia. Kana kukala ni jisonhi ja kuzuela ni Jimbanji ja Jihova, mba ja kutanga o milongi iala mu kijimbuete kia jw.org. O Bibidia i kanena: “Se u di ta mutendu mu sota o kuijiia . . . [ua-nda] d’ijiia kiambote ni Nzambi.”Jisabhu 2:3-5.