Ku bokona mu madisá

Ku bokona mu madisá

 DIAMBU DIA KAPA

Kiebhi o Bibidia i Tena Kulungulula o Muenhu Uami?

Kiebhi o Bibidia i Tena Kulungulula o Muenhu Uami?

O Bibidia ki i sokela ni divulu dioso-dioso. Mu Bibidia muala itendelesu ia Mubhangi uetu. (2 Timote 3:16) O njimbu ia Bibidia i tena kutula ku muxima uetu. Mu kidi, o Bibidia iamba: “O kizuelu kia Nzambi kima kia muenhu, kiala ni kutena.” (Jihebeleu 4:12) O Bibidia iala ni kutena kua kulungulula o muenhu uetu, mu maukexilu aiiadi— i tu bhana itendelesu se kiebhi ki tua tokala kuenda ku mundu iú lelu, i tu kuatekesa ue kuijiia kiambote Nzambi ni ikanenu iê.1 Timote 4:8; Tiiaku 4:8

I tena kulungulula o muenhu ué kindala. O Bibidia i tena ku ku kuatekesa mu maukexilu avulu ku muenhu ué. Iene i bhana itendelesu ia tokala ia lungu ni ima íii.

  •   Ku di bhana kiambote ni athu.Efezo 4:31, 32; 5:22, 25, 28, 33.

  • Kukala ni muxima ua zele, ni sauidi iambote.Jisálamu 37:8; Jisabhu 17:22.

  • Kuijiia o ima iambote ni iaiibha.1 Kolindo 6:9, 10.

  • Kukalakala phala kukala ni kitadi kia soko.Jisabhu 10:4; 28:19; Efezo 4:28. *

Sai dikaza mu ixi ia Asia, a mono o valolo ia itendelesu ia Bibida. Kala ki bhita ni makaza a ubhe, ene akexile mu dibhana ni ibhidi iavulu ia lungu ni kudijiia kiambote mudiâ, ni kukala ni ukamba uambote mu ukaza. Mu kiki, ene a mateka kukumbidila o milongi ia kexile mu dilonga mu Bibidia. Ihi ia bhiti ni ene? O diiala Vicent, uambe: “O milongi i tua kexile mu dilonga mu Bibidia, ia tu kuatekesa ku di bhana ni ibhidi mu ukaza uetu, ni henda ioso. Kukumbidila o milongi kala ki zuela o Bibidia, kuene mu tu kuatekesa kukala ni kusanguluka ku muenhu.” O muhatu uê Annalou, uambe ue kiki: “O misoso ia athu a a tange mu Bibidia ia tu kuatekesa kiavulu. Lelu nga sanguluka dingi mu ukaza ni mu kukumbidila jimbambe ji tua xindi ku muenhu.”

I ku kuatekesa kuijiia Nzambi. Phala Vicent, o Bibidia ki ia kuatekesa ngó o ukaza uê, muene uambe dingi: “Mukonda dia kutanga o Bibidia, lelu nga zukama dingi kua Jihova mukulu ndenge.” O izuelu ia Vicent ilondekesa o kima kia beta-o-kota—o Bibidia i tena ku ku kuatekesa kukala ni ukamba ni Nzambi. Mu kubhanga kiki, eie kua-nda katula ngó mbote ku itendelesu ia Bibidia, maji ua-nda kuijiia ue Nzambi kala kamba dié. Eie ua-nda mona ue kuila, muene u kanena ia lungu ni hádia, kioso ki ua-nda sanguluka ni “muenhu ua kidi”—ua-nda xalela katé ku hádia ni hádia. (1 Timote 6:19) Sé-ku divulu dia mukuá di tena ku kubhana o kidielelu kia muenhu iú.

Se u kolokota mu kutanga o Bibidia, ua-nda tena ue kutambula o mabesá iá—kubhanga kiki kua-nda ku kuatekesa kukala ni muenhu uambote ni kuijiia kiambote Nzambi. Maji kioso ki uia ni kutanga o Bibidia, eie ua-nda banza mu ibhuidisu iavulu. Se kiki ki bhita, xinganeka mu phangu iambote ia ngolambole mukua Etiiopia, ua tungile 2000 a mivu ku dima. Muene ua kexile ni ibhuidisu iavulu ia lungu ni Bibidia. Kioso kia mu ebhuidisa se ua tendela o musoso ua kexile mu tanga, muene ua tambuijila: “Ki ngala kutanga ki ngi jimbulukila kiebhi, sé muthu ku ngi lomboluela-kiu?” * Muene ua xikinine o kikuatekesu kia Felipe uexile dixibulu dia Jezú, Felipe uexile mulongexi uambote ua Bibidia. (Ikalakalu 8:30, 31, 34) Kiene kimoxi ue, se ua mesena kuijiia dingi ia lungu ni Bibidia, eie u tena kubhinga o milongi ia Bibidia bhu kaxi ka kijimbuete kia www.jw.org mba kusonekena mu ijimbuete iala mu Mulangidi iú. Eie u tena ue kubhinga ku Jimbangi ja Jihova, ala mu diembu dié mba kuia mu Kididi kia Ubhezelu bhua zukama ku inzo ié. Mukonda diahi ku tange o Bibidia kindala, phala o milongi iala-mu i ku kuatekese kukala ni muenhu uambote?

Se ua mu dibhuidisa kuila u tena kudielela mu Bibidia, tua ku dióndo tala o vidiu Como Podemos Ter Certeza de que a Bíblia é Verdadeira? Eie u tena kusanga o vidiu íii mu kukatula o kijimbuete kiala ku luiji mba mu jw.org, mu kusoneka o diambu dia vidiu mu mbandu ia kutokuesa.

^ kax. 8 Phala kuijiia dingi ia lungu ni itendelesu ia mukuá ia Bibidia, ndé mu kijimbuete kietu kia jw.org. Mu mbandu ENSINOS BÍBLICOS >PERGUNTAS BÍBLICAS RESPONDIDAS.

^ kax. 11 Tala ue o mbandu mu Mulangidi iú “O kuila ki ua tokala kutendela kiambote?