Ku bokona mu madisá

Ku bokona mu madisá

 O BIBIDIA I LUNGULULA O UKEXILU UA ATHU

Ki Ngi Mesenene Kufua!

Ki Ngi Mesenene Kufua!
  • MUVU UA MU VUALA: 1964

  • MUKUA: INGLATERRA

  • MUSOSO: KA KEXILE NI KILUNJI, UA VUALA MONA MU UNDENGE

MUSOSO UAMI

A ngi vualela mu sanzala ia Paddington, mu mbanza ia Londres, mu ixi ia Inglaterra. Nga tungile ni mam’etu ni jiphange jitatu ja ahatu, makot’ami. Mukonda dia uhólua, tat’etu ka tu suuile kiavulu.

Mu undenge uami, mam’etu ua ngi longo kusamba mu mausuku oso. Nga kexile ni Bibidia iofele, iene ia kexile ngó ni divulu dia Jisálamu, nga bhangele ue mikumbi phala kuimba o Jisálamu jenhojo. Sai kizuua, nga tange kima mu divulu diami dia jingijiie, katé kiki kiala hanji ku muxima uami, diambele kiki: “Ku hádia, ki kua-nda kala dingi muenhu.” O izuelu íii ia ngi bhangesa kufula kilu mu mausuku, mu kubanza ku hádia. Nga kexile mu xinganeka: ‘Mu kidi, o muenhu uene ngó iú? Se kiene, mukonda diahi-phe ngala ku muenhu?’ Ki ngi mesenene kufua!

Nga uabhelele kiavulu o ima ia lungu ni uanga. Nga fikisa kuzuela ni madifundu, nga kexile muia ku jimbila ni jikoleka jami, ni kutala jifilime ja madimonho. Tua sangulukile kiavulu ku ji tala, maji ja kexile ue mu tu kuatesa uôma uavulu.

Nga mateka kubhanga ima iaiibha kioso ki nga kexile ni kuinhi dia mivu. Nga mateka kubuakula makanha, mu kusuluka, nga kexile mu buakula ithangana ioso. Mu kubhita kithangana, nga mateka kubuakula diamba. Kioso ki nga kexile ni 11 ia mivu, nga mateka kúnua uhólua. Sumbala ki ngi uabhelele o kutouala kua uhólua, maji nga zolele kukodiua. Nga zolele ue mimbu ni kukina. Nga kexile muia mu jifesa ni mu jinzo ja kukina mu usuku. Nga kexile mu tunda mu mausuku ni kuvutuka ku makolombolo. Mukonda dia kubhuila, mu ithangana iavulu nga kexile mu fonga mu xikola. Mu xikola, nga kexile mu nua mu kithangana kia kunhoha.

Ku muvu ua sukina mu xikola, ki ngi ditundu kiambote. Mu ithangana iavulu, mam’etu mu kukamba kuijiia o ukexilu uami uaiibha, muene ua kexile mu luuala ni kukala ni njinda. Tua kexile mu zoka kiavulu, mu kiki nga tundu kubhata dietu. Mu kithangana kienhiókio, ngai mu tunga ni saí iami, Tony, uexile Rásta. Muene ua kexile mu ta ituxi ia makota, kusumbisa jidroga, a muijiidile ue kala kisuéia. Kioso ki nga kexile ngó ni 16 ia mivu, a ngi mitisa, nga vuala mon’a diiala.

 O BIBIDIA IA LUNGULULA O UKEXILU UA MUENHU UAMI

Nga zuelele ni Jimbangi ja Jihova mu veji ia dianga, kioso ki nga kexile mu inzo mua kexile mu langa o ahatu a a sengele ni tuana tuâ. Muenhomo a ngi bhé dixilu, ku jinguvulu ja mbanza ienióio. Kiiadi kia ahatu Jimbangi ja Jihova, a kexile mu kunda ilumba ia mukuá a kexile ue kiá ni tuana. Sai kizuua ngai mu kuívua o milongi iâ. Nga mesenene kulondekesa o makutu a Jimbangi ja Jihova. Maji ni kulenduka kuoso, ene a ngi tambuijila bhu kaxi ka Bibidia, o ibhuidisu ioso i nga kexile na-iu. Ene a ngi londekesa henda, o ukexilu iú ua ngi tula muene ku muxima. Mu kiki, nga xikina kudilonga o Bibidia ni ene.

Mu kithangana kienhókio, nga dilongo kima mu Bibidia kia lungulula o muenhu uami. Tundé mu unzangala uami, nga kexile ni uôma uavulu. Mu kithangana kiki kiene ngó ki nga dilongo o milongi ia Jezú ia lungu ni difukunukinu! (Nzuá 5:28, 29) Nga dilongo uê kuila, Nzambi ua ngi zolo. (1 Phetele 5:7) O izuelu mu divulu dia Jelemiia 29:11 ia ngi tula muene ku muxima, iamba: “Kuma ixinganeku ioso i ngala ku mi xinganeka na-iu, nga ijiia kiambote muene, eme ngi Jihova, ixinganeku ia uembu, ki ia phulu, kana, nda ngi mi bhane dizubhilu di muene ku kinga.” Eme nga mateka kuxikina kuila, ngeji kala ni kidielelu kia kukala mu Palaizu mu ixi katé ku hádia ni hádia.Jisálamu 37:29.

O Jimbangi ja Jihova ja ngi londekesa henda ia kidi. Kioso ki ngai mu veji ia dianga mu kiônge, nga mono o ukexilu uâ uambote, ni kuila a dizolele kiavulu mudiâ! (Nzuá 13:34, 35) O ukexilu iú, ki nga u muene mu ngeleja ia mukuá mu nga ile. O Jimbangi ja Jihova a ngi tambulula kiambote, né muene ni ima iaiibha i nga kexile mu bhanga. Ene a ngi bhana mátui, a ngi kuatekesa, ni ku ngi langa ni muanhu uoso. Nga divuile kuila, nga bhangele mbandu ia muiji ua dikota, muiji ua henda.

Bhu kaxi ka milongi ia Bibidia, nga muene kuila nga tokalele kubhanga nguzu phala kutula o ifua iaiibha, phala kubelesela o itumu ia iuka ia Nzambi. Kia ngi bhonzele kutula o ukexilu ua kubuakula makanha. Mu kithangana kienhókio, nga muene kuila, o mimbu i nga kexile mu kuívua ia kexile mu ngi bhangesa kumesena dingi kubuakula diamba. Phala kukala ngi muthu uambote, ngeha kuia mu jifesa ni mu jinzo ja kukina mu usuku. Mu kiki nga soto makamba engi, eji ngi kuatekesa kukala ni ukexilu uambote ua muenhu.Jisabhu 13:20.

Mu kithangana kienhókio, Tony ua kexile ue mu dilonga o Bibidia ni Jimbangi ja Jihova. Kioso o Jimbangi ja Jihova kia kexile mu tambuijila o ibhuidisu iê bhu kaxi ka Bibidia, muéne ua xikina kuila ua kexile mu dilonga o kidi. Muene ua xisa ue ima iavulu ku dima: Ua xisa o makamba mê okulu aiibha, o usuéia, ueha o kubuakula diamba. Phala ku sangulukisa kiambote Jihova, kiiadi kietu tua mono kuila tua tokalele kutula o ukexilu ua iibha ua ufusa, ni kulanga kiambote mon’etu. Tua kazala ku muvu ua 1982.

“Kindala ki nga mu fula dingi kilu mu usuku, mu kubanza ia lungu ni hádia mba kufua”

Ngi lembalala hanji kioso ki nga kexile mu sota mu Mulangidi ni Despertai! * misoso ia athu a lunguluile o ukexilu ua muenhu uâ, nga mesenene ue kukaiela o phangu iâ. O milongi i nga sange-mu ia ngi kuatekesa kiavulu! Ia ngi kuatekesa kusuluka mu kulungulula o ukexilu ua muenhu uami, mu veji dia kubhuila. Nga suluka mu kusamba kua Jihova, phala kukolokota ku ngi kuatekesa. Eme ni Tony a tu batizala kala tu Jimbangi ja Jihova ku muvu ua 1982.

MABESÁ U NGA TAMBULA

Kukala ni ukamba uambote ni Jihova Nzambi, kua bhulula o muenhu uami. Eme ni Tony tuene mu mona o kikuatekesu kia Jihova mu ithangana ia bhonzo. Tuene mu dilonga kudielela kua Nzambi mu ithangana ia ibhidi, tu mona kuila Jihova uene mu tu kuatekesa, ni kudikila o ibhindamu ia muiji uetu.Jisálamu 55:22.

Kisangu-sangu kia dikota, ki ngala na-kiu kukuatekesa o tuana tuetu kuijiia ue Jihova. Kindala ngi sanguluka kiavulu kumona alaula’mi kuijiia ue o Nzambi ia kidi.

Kindala ki nga mu fula dingi kilu mu usuku, mu kubanza ia lungu ni hádia mba kufua. Eme ni Tony tuene mu bhanga ikalakalu iavulu, mu kukuatekesa o athu avulu mu ilunga ia Jimbangi ja Jihova. Etu tuene mu longa ue akuetu, mu kiki se ene a kala ni kixikanu kua Jezú, a-nda tambula o muenhu ua kalelaku.

^ kax. 17 A di bhange ue ku Jimbangi ja Jihova.