TIMOTE uala mu njila, ua múia dikanga, dikanga dia muiji uê, ua mu xinganeka mu ima ia-nda bhanga ku pholo. O makamba mê ala ku pholo ia njila, Timote uejiia kiambote o njila mua mu bhitila. Bhofelele-bhofele, o mbanza ia Listra, iala ku thandu dia mulundu, ia mu xala dikanga. Timote ua mu kuelela mu ku mona kuila manh’â ni kuku’ê, a sanguluka, sumbala a mu dila ku muxima mukonda muéne ua mu kuenda njila. O kuila Timote ua tokala ku bhiluka dingi phala kua lekela?

Maji o poxolo Phaulu ua kexile mu tala Timote ni kusanguluka kuavulu. Muéne uejidile kuila Timote uexile hanji mukua jisonhi maji Phaulu ua sangulukile kiavulu mu kumona o kusanguluka kua Timote. Timote uexile munzangala nange ua kexile mu kitala kia 20, muéne ua zolele kiavulu Phaulu ni ku mu xila. Mu kiki, Timote ua kexile mu kaiela o diiala didi dia nguzu ni kixikanu, sumbala ueji kala dikanga dia muiji uê. Ene eji kuendela bhoxi, ni mu ulungu ni kudibhana ni iluezu iavulu mu njila. Mu kidi, Timote kejidile se hádia ueji vutuka dingi kubhata.

Ihi ia suínisa o munzangala Timote kukaiela o njila íii? Mabesá-hi a tambula muéne? Kiebhi o kixikanu kiê ki suínisa o kixikanu kietu?

“TUNDÉ UNDENGE”

Tu vutuke mivu iiadi mba itatu kudima katé ku mbanza ia Listra, nange kuene kua vualela Timote. Listra iexile mbanza iofele, mua kexile idima iavulu ni menha. O athu ejidile kiambote o dimi dia Ngeleku maji akexile hanji mu zuela o dimi dia uvualukilu, Likaónio. Listra iexile mbanza ia tululuka maji saí kizuua, o athu a thandanganhele kiavulu ni ku bhanga jibuia javulu. Akunji a iadi, poxolo Phaulu ni kamba diê, Barnabé, a tundile ku mbanza ia dikota ia Ikonio ia zukamene ni mbanza ia Listra. Kioso kia kexile mu boka, Phaulu ua mono diiala uexile kinema, maji ua kexile ni kixikanu kia kolo. Kienhiki, Phaulu ua sake o diiala dienhódio!—Ikalakalu 14:5-10.

Athu avulu akua Listra a xikinine ku misoso ia makutu ia kuila o jinzambi ja kexile mu kuíza mu mbanza mu idifanganu ia athu. Kienhiki o athu a luku Phaulu o dijina dia Kalongolo, o Barnabé a mu luku Nganga-Zumba! O Jikidistá jiiadi jiji, mukonda dia kulenduka kuâ, a fudisa o mundu kua a satela.—Ikalakalu 14:11-18.

Maji saí athu mu mbanza ia Listra, ka kexile mu mona Phaulu ni Barnabé kála jinzambi ja jiphagão kana. Mu kifika, Eunice, muhatu Judé ua kazalele ni diiala mukua Ngeleku, kexile Kidistá, * ni manh’â Loide, evuile kiambote ni kisangusangu kioso o njimbu ia Phaulu ni Barnabe. O Jijudé a mesenene kiavulu kuívua o njimbu ioio ia kuila—Mexiia uejile mu ngongo iu ua kumbidile ikanenu iavulu io sonekene mu Mikanda Ikola ia lungu ni muéne!

Xinganeka kiebhi Timote kia divu mu kumona Phaulu. Timote a mu longele “tundé undenge” kutanga ni kuzola o Mikanda Ikola ia Hebalaiku. (2 Timote 3:15) Kála manh’â ni kuku’ê, Timote uejidile kuila Phaulu ni Barnabe, akexile mu zuela o  kidi kia lungu ni Mexiia. Xinganeka ué o diiala diexile kinema, a mu sakele kuala Phaulu. Tundé undenge, Timote nange ua kexile mu mona o diiala diodio izuua ioso ua xikama mu ikoka ia mbanza ia Listra. Maji mu kindala kiki, Timote ua mono o diiala dia mu kuenda! Kiki kia suínisa Eunice, Loide ni Timote ku kituka Jikidistá. Lelu ué, o jikuku ni jitata a tena kudilonga disá dia dikota ku musoso ua Loide ni Eunice. O kuila mu tena kubhana phangu iambote ku minzangala?

“KUBHITA MU MALEBHU AVULU”

O a kituka Jikidistá mu mbanza ia Listra, a sangulukile kiavulu mu kuívua o kidielelu kieji tambula o akaiedi a Kristu. Maji a di longo ué kuila eji bhita mu ibhidi iavulu mukonda dia ku kituka maxibulu a Jezú. O jinguma akua Ikonio ni Andiioka, a bokona mu mbanza ia a suínisa o mundu phala ku bhilukila Phaulu ni Barnabé. Ki ku bhiti ithangana iavulu, o mundu uéza kua Phaulu ia a mateka ku mu buba ni matadi. A mu kuama kiavulu iu ua bu bhoxi. O jinguma a koko Phaulu katé bhu kanga dia mbanza, a mu fikile kuila uafu.—Ikalakalu 14:19.

Maji o maxibulu mu mbanza ia Listra ai mu sota Phaulu, o kia mu sange a mu te mu kaxi. Ene a sangulukile kiavulu kioso Phaulu kia di mexena iu uemana. Ni kusuína kuoso ua vutuka dingi ku mbanza ia Listra! Mu kizuua kia kaiela, muéne ni Barnabé ai ku mbanza ia Derbe phala kusuluka kuenhoko ni kikalakalu kia kuboka. Ku Derbe a bhange-ku ué maxibulu, ni kusuína kuoso a vutuka dingi ku mbanza ia Listra né muene ni kuijiia kuila eji bhita mu iluezu. Mukonda diahi a vutuka? O musoso u tu tangela kuila, a vutuka phala, “kukolesa o mixima ia jixibulu ni ku a longesa kujijila o kuxikana.” Xinganeka o munzangala Timote ua mu kuívua Phaulu ni Barnabe a mu longa o Jikidistá kuila o kidielelu kiâ ku hádia kia betele-o-kota o ibhidi ndenge. Ene ambe kuma: “Tu bhinga tu bokona mu Utuminu ua Diulu mu kubhita ni malebhu mavulu.”—Ikalakalu 14:20-22.

Timote ua bhakele ku muxima uê o milongi ioso iévu kua poxolo Phaulu

Timote ua mono Phaulu ku bhita ni ibhidi maji ua kukolokota phala kuboka o njimbu iambote ku athu. Timote uejidile ué kuila se muéne ua kaiele o phangu ia Phaulu akua Listra eji ku mu zukutisa; O tat’ê ueji mu zukutisa ué. Maji Timote kehela kuila o kizukutisu ki mu fidisa kusidivila Nzambi. Lelu kuala minzangala iavulu ia mu kaiela o phangu ia Timote. Ene ala ni unjimu ua ku sota makamba ala ni kixikanu kia kidi, a tena ku a suínisa.  Ene kehela kuila o kizukutisu kia a fidisa ku sidivila o Nzambi ia kidi!

“MUÉNE A MU TUMBULA KIAMBOTE KUALA O JIPHANGE JOSO”

Kala ki tua mono ku dimatekenu, Phaulu ua vutuka ngó kioso kia bhiti mivu iiadi mba itatu. Xinganeka o kisangusangu kubhata dia Timote mu veji ia kaiadi kioso kia vutuka Phaulu, kiéza kumoxi ni Sila. Phaulu ua sangulukile ué kiavulu. Muéne ua mono o jimbutu ja kunine mu Listra. Ua sange Loide ni Eunice, a kitukile Jikidistá, ezalele ni kuxikana “kua kidi, ki kua ku di bhangesa” kana, Phaulu ua diuanene. (2 Timote 1:5) Ihi ia kexile mu bhita ni Timote?

Phaulu ua mono kuila o munzangala Timote ua kudile mu nzumbi tundé o veji ia dianga kioso kia a kundile. O Timote akexile ku “mu tumbula kiambote kuala o Jiphange joso” ja kexile mu Listra ni mu Ikonio, o dikanga diê 32 ji kilómetulu. (Ikalakalu 16:2) Kiebhi kia tena ku kala ni ukexilu iú uambote?

O “Mikanda Ikôla” ia mu longele kuku’ê ni manh’â—“tundé undenge” ia lungile ué ni milongi ia lungu ni minzangala. (2 Timote 3:15) Mu kifika a mu longo kuila “Mu izuua ia unzangala ué, lembalala Ió uoso ua ku bhanga.” (Ndongixi 12:1) O izuelu íii ia kexile ni valolo ia dikota kua Timote kioso kia kituka Kidistá. Muéne ua mono kuila o ukexilu uambote ua ku lembalala o mubhangi uê o ku bokela akuâ o njimbu iambote ia lungu ni Kristu, Mon’â Nzambi. Bhofele-bhofele Timote ueha o jisonhi iu ua suína, mu kutangela akuâ o njimbu iambote ia lungu ni Jezú Kristu.

O tufunga mu kilunga a mono kuila Timote ua kexile mu kula mu nzumbi. Mukonda dia kiki ene a sangulukile kiavulu mu ku mona o munzangala ku bhana phangu ni ku suínisa akuâ. Maji o kia betele-o-kota, Jihova Nzambi ua kexile mu mona o ukexilu ua Timote. Nzambi ua tumina kusoneka ikanenu ia lungu ni Timote—nange ia lungile ni ikalakalu ieji bhanga phala o ilunga ku pholo. Kioso kia a kundu, Phaulu ua mono kuila, Timote ueji kala múkuatekexi uambote mu jinjila jeji kuenda mu ukunji. O jiphange mu Listra a xikina. Ene a te o lukuaku ku mutué ua Timote, mu kulombolola kuila ene a mu bhana o ujitu ua katunda mu sidivisu ia Jihova Nzambi.—1 Timote 1:18; 4:14.

Timote, ua divu kiambote maji ua londekesa o ukexilu ua kulenduka mukonda dia ujitu iú. Muéne ua kexile polondo phala kuia. * Maji kiebhi kia divu tat’ê ka kexile Kidistá mu kuijiia kuila o mon’ê ueji kala mukunji ua Nzambi? Nange muéne ua mesenene ima iéngi phala mon’ê kioso kieji kula. Ihi ia banzele o mama ni kuku’â Timote? O kuila alondekesa ngó kisangusangu, ka londekesa kuila akexile ni hele ia ibhidi ieji bhita na-iu o munzangala? Ki kieji kala kima kia iibha kukala ni hele.

Tuejiia ngó kuila Timote uai. Mu kimenemene kala ki tua tange ku dimatekenu, muéne ua mateka o sidivisu ia ukunji kumoxi ni poxolo Phaulu. Mu ku xisa Listra, o mbombota ku inama ni mbimbi ia iangu mua kexile mu vuua, ia kexile mu londekesa kuila ua kexile múia dikanga dia muiji uê. Mu kuenda kizuua kia muvimba o mala kitatu a tula mu Ikonio. Timote ua kexile mu tala kiebhi Phaulu ni Sila kia kexile mu tangela o jiphange o itendelesu ia ubhe ia kibuka kia utuminu mu Jeluzaleme, ni ku suínisa o Jikidistá mu mbanza ia Ikonio. (Ikalakalu 16:4, 5) Maji ene akexile ngó mu mateka.

Kioso kia zubha ku kunda o ilunga mu mbanza ia Ngalata, o akunji a xisa o ikoka ia Loma anga enda njila ia lebha mu milundu ia Filija ia kexile múia ku thunda mu kusuka-ku ai ku luiji. Ni kitendelesu kia nzumbi ikola ia Nzambi ene a kulumuka ku Tolouade, a kuata ulungu anga aia ku Masedonha. (Ikalakalu 16:6-12) Mu kithangana kieniókio Phaulu ua mono kuila Timote uexile kikuatekesu kia dikota. Phaulu ua xisa Timote ni Sila mu Beleia. (Ikalakalu 17:14) Ua mu tumikisa ué ubheka uê katé ku Tesalonika. Kuenhoko Timote ua kaiela o phangu ia kexile mu mona ku adiakimi,  iu ua kuatekesa o Jikidistá kuenhoko.—1 Tesalonika 3:1-3.

Mu kubhita kithangana Phaulu ua soneka ia lungu ni Timote: “Ki ngala dingi ni muthu ua sokela-nê muxima, u mi kala ni muanu ua kidi mu ku mi tambula konda.” (Filipe 2:20) O ukexilu uambote ua Timote ki ua moneka ngó kana. Timote ua suínine kiavulu mu sidivisu ia Nzambi sumbala ni ibhidi iavulu. Muéne phangu iambote phala o minzangala lelu! Kana ku jimba kuila eie u tena ku kala ni ukexilu uambote mba ua iibha. Eie se u munzangala, uala ni ujitu ua ku sola ukexilu uambote mu ku dianga ku bhanga o vondadi ia Jihova ku muenhu uê ni ku xila akuenu.

“BHANGA KIOSO KI UA TENA PHALA KU NGI SANGA KUNU”

Tundé mu unzangala ué, Timote ua dibhakula mu sidivisu ia ukunji ua Nzambi

Timote ua kalakala kiavulu ni kamba diê poxolo Phaulu mu 14 ia mivu. Muéne ua bhiti ué mu ibhidi mua kexile mu bhita Phaulu, maji ua sangulukile ué ni ima iambote mu sidivisu iê. (2 Kolindo 11:24-27) Timote a mu tele ué mu kaleia mukonda dia kixikanu kiê. (Jihebeleu 13:23) Muéne ua kexile ué ni henda ia jiphange jê Jikidistá kála kiexile Phaulu. Kienhiki Phaulu ua mu sonekena: “Ngi xinganeka o masoxi mé.” (2 Timote 1:4) Kala kiexile mu bhanga Phaulu, Timote ua kexile ué ‘mu dila kumoxi ni ió akexile mu dila,’ ni ku a kuatela henda phala ku tena ku a kuatekesa kiambote. (Loma 12:15) Tua tokala ku kaiela o phangu iâ!

Sé phata, mu ku bhita kithangana Timote ua kituka kafunga kambote. Phaulu ka mu dielela ngó o kikalakalu kia ku kunda o ilunga ni ku i suínisa, maji ua mu bhana ué o ujitu ua ku sola mala a fuamene ku kala tufunga ni akuatekexi a tufunga mu kilunga.—1 Timote 5:22.

Phaulu ua zolele kiavulu Timote ua kexile ku mu bhana milongi iambote kála mon’ê. Muéne ua tendelesa Timote ku suluka mu ku kula mu nzumbi. (1 Timote 4:15, 16) Muéne ua suínisa Timote kuzokela o kidi. (1 Timote 1:3; 4:6, 7, 11, 12) Phaulu ua mu tendelesa kiebhi kia tokalele ku dibhana ni uhaxi ua kexile ku mu thandanganhesa, nange sai ithangana mu mala mua kexile ku mu kata.—1 Timote 5:23.

Phaulu ua mono kuila ua zukamene kiá o kufua kuê; nange eji ku mu nhenga. Muéne ua tumikisa o mukanda ua sukina kua Timote. Muala o izuelu íii: “Bhanga kioso ki ua tena phala ku ngi sanga kunu kindala.” (2 Timote 4:9) Phaulu ua zolele kiavulu Timote, ua mu tumbula kuila eie u “mon’ami’a henda, ua fiiele mua Ngana.” (1 Kolindo 4:17) Sé phata muéne ua mesenene kuila o kamba diê u kala bhu mbandu iê kioso kieji kufua! Muthu ni muthu mudietu ua tokala u dibhudisa, ‘o kuila o athu a ngi sota kioso kia kala ni malamba?’

O kuila Timote ua sange Phaulu kiluua a mu jibha? Ki tuejiia. Maji tuejiia kuila Timote ua kondo malamba kua Phaulu ni ku suínisa akuâ akexile mu bhita mu ibhidi. Muéne ua bhange kala kilombolola o dijina diê, “Muthu u ximana Nzambi.” Muéne ua tu xila phangu iambote ia kixikanu phala ku i kaiela, ki kala o minzangala mba adiakimi.

^ kax. 9 Tanga o mbandu “Eie ua Kijidile” mu Mulangidi iú.

^ kax. 20 Timote ka ditunu kioso kia mu bhingi kua Phaulu phala ku mu saia—muéne ka xikina ngó mukonda kiexile kitumu phala o Jikidistá, kana, maji mukonda Phaulu ka mesenene kuila o Jijudé eji kuívua o njimbu a dituna mukonda dia tat’â Timote kukala Ngeleku.—Ikalakalu 16:3.